Yu no e agri taki te wan libimakandra kruka, dan iniwan tirimakti na ini a libimakandra dati o kruka tu? Efu dati de so, dan wan tirimakti di no kruka, no musu de fu libisma. Bijbel e taki fu so wan tirimakti. Dati na Gado Kownukondre, a tirimakti di Yesus ben leri den bakaman fu en fu begi fu a kon.—Mateyus 6:9, 10.

Gado Kownukondre na wan tirimakti di e tiri komoto fu hemel. A o kon na ini a presi fu ala libisma tirimakti (Psalm 2:8, 9; Openbaring 16:14; 19:19-21). Wan fu den blesi di a Kownukondre o tyari kon gi libisma, na taki a o tyari wan kaba kon na kruka tirimakti. Wi kan bribi a sani disi te wi e luku siksi sani fu a Kownukondre disi.

A PROBLEMA: Na den borgu fu wan kondre e horibaka gi libisma tirimakti, èn nofo tron den e du dati nanga a belasting-moni di den e pai. Te son lantiman e si a moni disi, dan den wani fufuru en, èn trawan fu den e teki tyuku fu sma di no wani pai lanti furu belasting noso tra moni. Na so a e pasa taki ibri leisi te lanti lasi moni fu di sma e du den kruka sani disi, dan lanti e hei a belasting-moni. Ma dati e meki baka taki sma e du moro kruka sani srefi. Na ini so wan libimakandra den sma di e pina moro na den wan di no kruka.

FA A O LUSU: Gado Kownukondre e kisi en makti fu Yehovah Gado, na Almaktiwan (Openbaring  11:15). * A no abi belasting-moni fanowdu fu man tiri. Ma fu di Gado „abi furu makti” èn fu di a lobi gi sani, meki wi kan de seiker taki a Kownukondre o gi ala den borgu fu en san den abi fanowdu.—Yesaya 40:26; Psalm 145:16.

A PROBLEMA: Efu wi wani tyari wan kaba kon na den kruka sani di e pasa, dan wi „musu bigin na den tiriman”, na so Susan Rose-Ackerman di kari na ini a fosi artikel, e taki. Sma e lasi bribi na ini tirimakti te den pruberi fu tyari wan kaba kon na den kruka sani di skowtu noso duane e du, aladi den e tapu ai gi den kruka sani di hei lantiman e du. Srefi den moro bun tiriman e meki fowtu. Bijbel e taki dati „nowan reti-ati sma no de na grontapu, di e du bun ala ten”.—Preikiman 7:20.

FA A O LUSU: Yesus Krestes, di Gado poti leki Tiriman fu a Kownukondre de tra fasi leki libisma. Nowan sma man kori en fu du sani di no bun. A ben weigri srefi fu teki a moro bigi tyuku di wan sma ben kan teki. Iya, Satan ben wani gi en „ala den kownukondre fu grontapu”. Yesus ben o kisi ala den sani disi efu a ben anbegi Didibri, a tiriman fu grontapu, wán leisi nomo (Mateyus 4:8-10; Yohanes 14:30). Srefi di den ben e pina Yesus fosi a dede, toku a no meki a sani dati tapu en fu du san reti. Dati meki a weigri fu dringi wan sani di ben o safu a pen gi en, ma di ben kan meki taki a no de nanga krin frustan moro (Mateyus 27:34). Gado gi Yesus wan opobaka fu libi na hemel, èn a sori taki a bun nofo fu de Tiriman fu a Kownukondre.—Filipisma 2:8-11.

A PROBLEMA: Furu kondre e hori verkiezing baka wan tu yari, èn te yu luku en bun, dan disi e gi sma okasi fu puru kruka tiriman na makti. Ma san wi e si, na taki nofo tron furu kruka sani e pasa te sma e meki propaganda gi verkiezing èn te den e stem. Srefi na ini gudu kondre a sani disi e pasa. Fu di guduman e gi moni nanga tra sani fu horibaka gi den verkiezing disi, meki den kan abi krakti tapu tiriman di de na makti now èn den wan di o kon baka den.

Krutuman John Paul Stevens fu a Hei Krutubangi fu Amerkankondre, skrifi taki a sani disi e meki sma tweifri „efu den tirimakti disi bun nofo fu tiri èn a e meki sma lasi frutrow na ini den”. Dati meki furu sma na heri grontapu e taki dati politiek partèi na den moro kruka organisâsi di de.

FA A O LUSU: Sma no ben abi fu hori verkiezing noso stem na wan kruka fasi so taki Gado Kownukondre ben kan kon na makti. Dati de so fu di  a Tirimakti disi seti bun èn a o tan fu ala ten (Danièl 7:13, 14). Fu di na Gado poti a Tiriman fu a Kownukondre disi, meki sma no ben abi fu stem fu poti en èn sma no man puru en. Fu di a o tan fu ala ten, meki wi kan de seiker taki ala ten a o du bun sani gi den borgu fu en.

A PROBLEMA: Kande yu ben o denki taki te sma meki nyun wet, dan sani o go moro bun. Ma sabiman kon si taki nofo tron, o moro sma e meki wet o moro sma e feni okasi fu du kruka sani. Boiti dati, lanti musu du furu muiti fu meki den wet disi, toku den wet disi no e tyari furu wini kon leki fa den ben fruwakti.

FA A O LUSU: Den wet fu Gado Kownukondre bun omeni tron moro den di fu libisma tirimakti. Fu eksempre, na presi fu poti wan lo wet gi wi, Yesus e leri wi a tumusi prenspari sani disi: „Ala sani di unu wani meki sma du gi unu, na dati un musu du gi den tu” (Mateyus 7:12). Wan prenspari sani, na taki den wet fu a Kownukondre abi krakti tapu wi ati èn tapu den sani di wi e du. Yesus ben taki: „Yu musu lobi tra sma leki fa yu lobi yusrefi” (Mateyus 22:39). A no de fu taki dati na Gado wawan di sabi san de na ini wi ati, kan meki den sortu wet disi.—1 Samuel 16:7.

A PROBLEMA: Na fu di sma abi bigi-ai èn fu di den e denki densrefi nomo, meki den e du kruka sani. Nofo tron lantiman nanga borgu e sori den takru fasi disi. Soleki fa wi ben si na ini a fosi artikel, dan a bigi wenkri na ini Seoul ben broko fadon fu di lantiman ben teki tyuku fu den sma di ben e bow a wenkri. Den sma dati ben sabi taki te den ben pai tyuku, dan den ben kan bai moro bunkopu matriaal èn den no ben o abi fu hori densrefi na den bow-wet.

Sobun, fu man tyari wan kaba kon na den kruka sani di e pasa, dan sma musu leri fu no abi bigi-ai moro èn fu no denki densrefi nomo. Ma libisma  tirimakti no wani leri sma den sortu sani disi èn den no man du dati tu.

FA A O LUSU: Gado Kownukondre e bigin na a rutu fu a problema, fu di a e leri sma fu tapu nanga takru fasi di e meki taki den e du kruka sani. * A leri disi e yepi sma ’fu meki a denki fu den kon nyun’ (Efeisesma 4:23). Den e leri fu no abi bigi-ai moro èn fu no denki densrefi nomo, ma fu breiti nanga san den abi èn fu denki trawan.—Filipisma 2:4; 1 Timoteyus 6:6.

A PROBLEMA: Srefi efu sma e kisi leri fa fu tyari densrefi na wan bun fasi, toku yu o abi sma di e bedrigi trawan èn di e du kruka sani. Sabiman e taki dati a sani disi meki taki libisma tirimakti no man tyari wan kaba kon na krukafasi. San lanti e howpu, na taki a problema disi no e kon bigi so te taki a e pori a libimakandra.

FA A O LUSU: Na ini a kruderi di Amerkankondre meki nanga tra kondre fu puru krukafasi, a skrifi taki tirimakti musu gi den borgu fu den deki-ati fu „du san reti, fu no abi bedrigi fasi èn fu sabi den frantwortu”. Aladi a moi taki den wani du dati, toku Gado Kownukondre e du moro leki dati. A no e gi sma deki-ati nomo fu sori den fasi disi, ma a e fruwakti dati fu den borgu fu en. Bijbel e taki dati „gridiman” nanga „leiman” no o kisi Gado Kownukondre.—1 Korentesma 6:9-11; Openbaring 21:8.

Sma man leri fu hori densrefi na den bun wet disi, soleki fa den fosi Kresten sori dati. Fu eksempre, di wan disipel di nen Simon ben wani bai santa yeye fu den apostel, dan den apostel weigri fu teki a tyuku dati èn den taigi en: „Abi berow fu a takru fasi fu yu.” Di Simon kon si sortu bakapisi a takru prakseri fu en ben kan abi, dan a aksi den apostel fu begi gi en so taki a ben kan wini a swakifasi dati.—Tori fu den apostel 8:18-24.

Awinsi fu sortu kondre yu de, yu kan tron wan borgu fu Gado Kownukondre (Tori fu den apostel 10:34, 35). A leri di a Kownukondre e gi, èn di de fu kisi na heri grontapu nownowde, o sori yu fa yu kan du dati. Yehovah Kotoigi o breiti fu sori yu fa den e studeri Bijbel nanga sma sondro taki sma abi fu pai gi dati. A studie disi kan teki awinsi tin miniti wan wiki. Yu o leri moro fu „a bun nyunsu fu Gado Kownukondre” èn fa a o tyari wan kaba kon na den kruka sani di tiriman e du (Lukas 4:43). Wi e gi yu a kari fu taki nanga den Kotoigi na ini a kontren fu yu, noso fu go na a Website jw.org/srn.