Umphostoli Pawula wabhalela Thimothi naye lebekangulomunye lomdzala welibandla watsi: “Ngiyakuyalisisa embikwaNkulunkulu, embikwaKhristu Jesu nasembikwetingilosi letikhetsiwe, kutsi ugcine leticondziso ngaphandle kwekubandlulula nobe kukhetsa.”​—1 Thim. 5:21.

Kwekucala, asesicoce ngalabo lesingeke sitsi banguletingilosi lokukhulunywa ngato. Kuyacaca kutsi akusibo labo labangu-144 000. Ngesikhatsi Pawula abhalela Thimothi, emaKhristu lagcotjiwe bekasengakacali kuvuselwa ezulwini. Baphostoli kanye nalabanye labagcotjiwe bebasengakabi tidalwa letingumoya, ngako angeke sitsi ‘banguletingilosi letikhetsiwe.’​—1 Khor. 15:50-54; 1 Thes. 4:13-17; 1 Joh. 3:2.

Ngetulu kwaloko, ‘letingilosi letikhetsiwe’ angeke kube nguletingilosi letingazange tilalele ngesikhatsi saZamcolo. Letingilosi leti tasekela Sathane taba ngemadimoni futsi taba titsa taJesu. (Gen. 6:2; Luk. 8:30, 31; 2 Phet. 2:4) Esikhatsini lesitako titawuvalelwa emgodzini longenamkhawulo iminyaka lengu-1 000, ngemuva kwaloko tibhujiswe naDeveli.​—Juda 6; Semb. 20:1-3, 10.

‘Letingilosi letikhetsiwe’ Pawula lakhuluma ngato kungenteka tingilosi lebetisezulwini lebetisekela ‘Nkulunkulu naKhristu Jesu,’ lokukhulunywa ngabo kulelivesi.

Kunetingilosi letinyenti kakhulu letetsembekile. (Heb. 12:22, 23) Akukafaneli sicabange kutsi tonkhe tingilosi tiniketwa umsebenti lofanako ngesikhatsi lesifanako. (Semb. 14:17, 18) Khumbula kutsi lenye ingilosi yaniketwa umsebenti wekubhubhisa emasotja ema-Asiriya langu-185 000. (2 Khos. 19:35) Kungenteka letinye tingilosi tiniketwe umsebenti ‘wekukhipha eMbusweni [waJesu] tonkhe tintfo letibangela bantfu kutsi bone, tikhiphe nalabo labenta lokubi.’ (Mat. 13:39-41) Letinye kungenteka ‘tigcogcela ndzawonye labakhetsiwe’ kutsi baye ezulwini. (Mat. 24:31) Ngetulu kwaloko, letinye tiniketwe umsebenti ‘wekusivikela nobe ngukuphi lapho siya khona.’​—Hla. 91:11; Mat. 18:10; catsanisa naMatewu 4:11; Lukha 22:43.

‘Letingilosi letikhetsiwe’ lokukhulunywa ngato ku-1 KuThimothi 5:21 kungenteka tingilosi lebetiniketwe umsebenti lobalulekile lophatselene nebantfu baNkulunkulu. Kulendzaba, Pawula bekeluleka labadzala belibandla kutsi bayente njani imisebenti yabo nekutsi libandla kufanele libahloniphe. Labadzala belibandla kufanele bente imisebenti yabo “ngaphandle kwekubandlulula nobe kukhetsa” futsi akukafaneli basheshe bente sincumo nobe behlulele bangakacabangisisi. Sizatfu lesibalulekile sekutsi balalele leseluleko semphostoli Pawula lesiphefumulelwe kutsi basebenta ‘embikwaNkulunkulu, embikwaKhristu Jesu nasembikwetingilosi letikhetsiwe.’ Ngako kusebaleni kutsi letinye tingilosi tiniketwe umsebenti lophatselene nelibandla, njengekulivikela, kucondzisa umsebenti wekushumayela kanye nekumikisa umbiko kuJehova.​—Mat. 18:10; Semb. 14:6.