Ngatalelwa edolobheni laseMulhouse lelisenyakatfomphumalanga yeFrance. Bantfu labanyenti kulelidolobha bayasebenta futsi lidvume ngebugebengu. Intfo lengiyikhumbula kakhulu lebeyenteka ngisakhula budlova lobebenteka emakhaya endzaweni yangakitsi. Ekhaya kitsi bantfu besifazane bebabukelwa phansi futsi bekungakavami kutsi emadvodza afune kuva labakucabangako. Ngafundziswa kutsi umsebenti wemfati kuba sekhishini, anake indvodza nebantfwana.

Ngikhule kamatima. Nangineminyaka lelishumi babe wabulawa kunatsa kakhulu tjwala. Ngemva kweminyaka lesihlanu babe ashonile bhuti wami lomdzala watibulala. Kuwona lowo mnyaka tihlobo tami talwa futsi kwaba khona lofako. Ngetfuka kakhulu. Bantfu basekhaya bangifundzisa kutsi umukhwa netibhamu kusetjentiswa njani, nekutsi kufanele ngikhone kutilwela noma nini nakubita kutsi ngilwe. Bengihlala ngikhatsatekile, ngako ngacala kunatsa tjwala ngaphindze ngafaka ema-tattoo wonkhe lomtimba.

Nangineminyaka lengu-16 besenginatsa emabhodlela etjwala langu-10 noma langu-15 ngelilanga. Ngacala nekusebentisa tidzakamiva. Bengitsengisa tinsimbi nobe ngebe, kuze ngitfole imali yekutsenga letidzakamiva. Nangineminyaka lengu-17, ejele besekusekhaya. Ngaboshwa kangu-18, ngiboshelwa kweba nebudlova.

Nangineminyaka lengu-20 simo besesibi kakhulu. Bengibhema titiki tensangu letingu-20 ngelilanga, kanye ne-heroin naletinye tidzakamiva letingekho emtsetfweni. Kukanyenti ngiphose ngifa ngenca yekubhema kakhulu. Ngacala kutsengisa tidzakamiva letingekho emtsetfweni, ngako bengihlala ngiphetse imikhwa netibhamu. Ngalelinye lilanga ngake ngadubula lenye indvodza, nhlanhla yayo lenhlavu yashaya insimbi yelibhande lebeyiligcokile yasindza kanjalo. Nangineminyaka lengu-24, make washona futsi ngaba sidlova kakhulu kunakucala. Nangihamba esitaladini bantfu bebesaba kwengca eceleni kwami, nangichamuka bebavele bawele umgwaco. Ngenca yekutsi bengisilwi bekuvame kutsi ngetimphelasontfo ngilale emaphoyiseni noma esibhedlela kuze bangitfunge lapho ngilimele khona.

Nangineminyaka lengu-28, ngashada. Njengoba ungacabanga nje, umfati wami bengingamphatsi kahle. Bengimetfuka ngiphindze ngimshaye. Bekungabonakali kutsi sishadile ngoba tintfo besingatenti ndzawonye. Bengiyaye nje ngimuphe bucwebe lebengibeba ngobe ngicabanga kutsi nguloko lokutamjabulisa. Ngalelinye lilanga kwenteka intfo lebengingacabangi kutsi iyoke yenteke. Umfati wami wacala kufundza liBhayibheli naBoFakazi  BaJehova. Watsi asafundze kanye nje kuphela, wayekela kubhema, wanginiketa bonkhe lobucwebe lebengimuphe bona futsi bekangasafuni ngimuphe imali yekwebiwa. Ngakwata ngagcwala kokane. Bengingafuni kutsi achubeke nekufundza liBhayibheli futsi bengitsi nangibhema ngikhiphele lentfutfu ebusweni bakhe. Bengihamba ngibukisa ngaye emmangweni.

Ngalobunye busuku bengidzakwe ngingunangu umhlaba. Kutsi indlu yetfu ngayishisa nini nami angati. Umkami wangisindzisa kanye nendvodzakati yetfu lebeyineminyaka lesihlanu. Nasebuphelile lotjwala, ngadliwa ngunembeza. Bengiva ngatsi Nkulunkulu akayuze angicolele. Ngakhumbula lokwashiwo ngulomunye umfundisi, kutsi bonkhe bantfu lababi baya esihogweni. Nadokotela wetinhlanya lebengiya kuye, watsi: “Sekute kwakho! Kute lengingakusita ngako.”

Njengoba indlu yetfu beseyishile sahamba sayohlala ekhakhami. Ngesikhatsi BoFakazi bavakashele umkami ngababuta, “Kusengenteka yini kutsi Nkulunkulu angicolele?” Bangikhombisa umBhalo wa-1 Khorinte 6:9-11. LomBhalo ubala lonkhe luhlobo lwemikhuba lemibi Nkulunkulu langayifuni, bese utsi: “Nguloko labanye benu lebebangiko.” Lamavi anginiketa litsemba lekutsi bengingakhona kushintja. BoFakazi bangikhombisa umBhalo wa-1 Johane 4:8 lowangenta ngabona kutsi Nkulunkulu usangitsandza. Njengoba besebangikhutsatile, ngabacela kutsi bangifundzise liBhayibheli kabili ngeliviki futsi ngacala kuya nasemihlanganweni yabo yelibandla. Bengithantaza njalo kuJehova.

Ingakapheli nenyanga ngavele ngayekela kusebentisa tidzakamiva nekunatsa tjwala. Ngeva ngatsi kukhona lobekulwisana nemtimba wami. Bengihlushwa maphupho lamabi, ngibulawa yinhloko, ngiphatfwa ngemaphelekece kanye naletinye tintfo lebetibangelwa kuyekela tjwala netidzakamiva. Nanobe bekumatima, ngeva shengatsi Jehova ungibambe ngesandla futsi uyangicinisa. Ngativa njengaPawula. Acabanga ngendlela Nkulunkulu lamsita ngayo, Pawula wabhala: “Ngobe nginemandla kuto tonkhe tintfo ngenca yaloyo longipha emandla.” (Filiphi 4:13) Ngekuhamba kwesikhatsi ngagcine ngikhonile kuyekela kubhema ligwayi.​—2 Khorinte 7:1.

LiBhayibheli aligcinanga nje ngekungisita ngishintje kuphila kwami kodvwa laphindze lenta indlela lesiphila ngayo nemndeni wami yajabulisa. Yashintja nendlela lebengimphatsa ngayo umkami. Besengimhlonipha, nangikhuluma naye bengisebentisa emagama lanjengekutsi “ngiyacela” nekutsi “ngiyabonga.” Ngaba ngubabe lokahle nakumntfwanami. Nasekuphele umnyaka ngifundza liBhayibheli ngatinikela kuJehova ngase ngiyabhajatiswa, ngilandzela sibonelo semkami.

Ngiyabona kutsi timiso teliBhayibheli takushintja kuphila kwami. Ngisho netihlobo tami letingasibo BoFakazi tiyabona kutsi kube akusilo liBhayibheli, ngabe kudzala ngabulawa tjwala, tidzakamiva kanye nekulwa.

Lokwashintja kuphila kwemndeni wami kutsi liBhayibheli langifundzisa, ngakubona lokufanele kwentiwe yindvodza ekhaya. (Efesu 5:25; 6:4) Sacala kwenta tintfo ndzawonye njengemndeni. Nyalo sengiyati kutsi umfati akasiwelikhishi nje kuphela, sengiyamelekelela emisebentini leminyenti layentako njengobe asebentisa sikhatsi lesinyenti ashumayela. Naye uyangisita ngikhone kwenta imisebenti yelibandla njengobe sengingulomdzala ebandleni.

Indlela Jehova Nkulunkulu lanemusa nelutsandvo ngayo ingitsintse kakhulu. Ngifisile kutjela labanye ngebuntfu baJehova, ikakhulukati bantfu lokucatjangwa kutsi angeke basasitakala njengobe nami bantfu bebacabanga kutsi nginjalo. Ngiyati kutsi liBhayibheli linemandla ekusita nobe ngabe ngubani kutsi aphile imphilo lehlantekile nalenenjongo. LiBhayibheli alikagcini nje ngekungifundzisa kutsi ngitsandze bantfu besifazane nemadvodza kodwa liphindze langifundzisa kutsi ngitihloniphe nanami.