UMdali Wetfu Lonelutsandvo Uyasinakekela
1. UMDALI WETFU NGUYE LOWENTA LILANGA LIPHUME
Ase ucabange kutsi kuphila bekutawubanjani emhlabeni kube bekute lilanga? Lilanga liniketa tihlahla emandla kute tikhicite emacembe, timbali, titselo, kanye nenhlanyelo. Liphindze lente timphandze tesihlahla tikwati kumunya emanti emhlabatsini tiwamikise emacembeni lapho aphuma khona sekangumswakama.
2. UMDALI WETFU WENTA KUTSI IMVULA INE
Nkulunkulu usinikete imvula leyenta kutsi umhlaba ukhicite kudla lesitakudla. Nkulunkulu usehlisela imvula ezulwini, asiletsele tikhatsi tenala, asinike nekudla lokunyenti futsi agcwalise netinhlitiyo tetfu ngenjabulo.
3. UMDALI WETFU USINIKETA KUDLA NEKWEKWEMBATSA
Bobabe labanyenti bakhatsatwa kutsi bangakutfola njani kudla lokwenele kwemindeni yabo kanye netintfo tekwembatsa. Naka kutsi imiBhalo itsini: “Nakisisani tinyoni; atilimi, ativuni futsi tite netinyango. Kodvwa uYihlo losezulwini uyatondla. Nine anikabaluleki yini kwendlula tona?”—Matewu 6:25, 26.
“Fundzani endleleni timbali tesiganga letikhula ngayo . . . ; [neNkhosi] Solomoni ebukhatikhatini bakhe abengembatsi njengato. Ngako nangabe Nkulunkulu atembatsisa ngalendlela timbali tesiganga . . . , ngeke yini anembatsise kakhulu nine?”—Matewu 6:28-30.
Njengobe Nkulunkulu akhona kusiniketa kudla nekwekwembatsa, singaciniseka kutsi angakhona kusiniketa naletinye tintfo lesitidzingako ekuphileni. Nkulunkulu angayibusisa imetamo yetfu yekulima noma asisite sitfole umsebenti kute sikhone kutsenga lesikudzingako, kuphela nje nasenta intsandvo yakhe.—Matewu 6:32, 33.
Ecinisweni, sinetizatfu letinhle tekutsandza Nkulunkulu nasibuka lilanga, imvula, tinyoni kanye netimbali. Lesihloko lesilandzelako sitawucoca ngendlela uMdali wetfu bekakhulumisana ngayo nebantfu.
Lokunye Longatsandza Kukuhlola
KWABA KHONA NJANI KUPHILA?
Iplanethi Lephilako
Kuphila emhlabeni bekungeke kube khona kube kute luhlelo loluphelele etintfweni le-tinyenti. Loluhlelo loluphelele lwamane lwativelela yini noma lwadalwa ngekuhlakanipha?
