1, 2. (a) Ungaba yini umphumela wekucabanga nekukhuluma ngemuntfu lomtsandzako? (Buka sitfombe lesisekucaleni kwalesehluko.) (b) Ngumiphi imibuto lesitayicabangela?

KUCABANGA nekukhuluma ngemuntfu lesimtsandzako, kungacinisa budlelwane betfu naloyo muntfu. Kunjalo nasebuhlotjeni betfu naNkulunkulu Jehova. Njengobe abengumelusi, Davide wacitsa busuku lobunyenti abuka emazulu lagcwele tinkhanyenti futsi azindla ngeMdali longeke acatsaniswe nalutfo. Naku lakubhala: “Nangibuka etulu esibhakabhakeni sakho ngibona umsebenti wetandla takho, inyanga netinkhanyeti lotimisile, ngitsi: ‘Pho, umuntfu abeyini-ke kutsi ungadzimate umkhumbule; nendvodzana yemuntfu beyiyini-ke kutsi ungadzimate uyinakekele?’” (Hla. 8:3, 4) Ngemuva kwekucabanga ngendlela injongo yaJehova lemangalisako lebeyigcwaliseka ngayo ngalokuphatselene nema-Israyeli akamoya, umphostoli Pawula watsi: “Maye, kujula kwemcebo, nekwenhlakanipho, nekwelwati lwaNkulunkulu!”—Rom. 11:17-26, 33.

² Nasisemsebentini wekushumayela, sicabanga futsi sikhulume ngaJehova. Loko kusikhutsata kakhulu. Labanyenti labakhone kungenela umsebenti wasikhatsi sonkhe, batfole kutsi sibusiso sekukhulisa sikhatsi labasisebentisa emsebentini weMbuso, kujula kwelutsandvo labanalo ngaNkulunkulu. Nanome usemsebentini wasikhatsi sonkhe nome wenta imetamo yekufinyelela lowo mgomo, cabangela loku: Umsebenti wasikhatsi sonkhe ungabucinisa njani buhlobo bakho naJehova? Nangabe ulihlahlandlela, tibute loku: ‘Yini letangisita kutsi ngichubeke kulomsebenti loletsa tibusiso?’ Nawusengakabi lihlahlandlela, tibute: ‘Ngutiphi tingucuko lengingatenta kute ngibe ngilo?’ Asesicabangele tindlela umsebenti wasikhatsi sonkhe longabucinisa ngato buhlobo betfu naNkulunkulu.

3. Emsebentini wekushumayela, kusitsintsa njani kukhuluma ngetibusiso teMbuso?

³ Kucoca nalabanye ngetibusiso letita neMbuso kusenta sisondzelane naJehova. Ngumuphi umbhalo lotsandza kuwusebentisa nawushumayela emtini ngemuti? Kungenteka yini kutsi utsandza Tihlabelelo 37:10, 11; Danyela 2:44; Johane 5:28, 29; nome Sembulo 21:3, 4? Ngaso sonkhe sikhatsi nasicoca ngaletetsembiso nalabanye, natsi siyakhunjutwa kutsi Nkulunkulu wetfu lonemusa ungumuphi ‘wato tonkhe tipho letinhle naletiphelele.’ Loko kusenta sisondzelane naye.—Jak. 1:17.

4. Yini lebangela kutsi kwatisa kwetfu ngebuhle baNkulunkulu kujule nasibona indlela bantfu labangamati ngayo?

⁴ Kubona kutsi bantfu lesishumayela kubo abati ngaNkulunkulu kujulisa indlela lesilatisa ngayo liciniso. Bantfu emhlabeni wonkhe bete sicondziso labangasetsemba kutsi sitawubasita baphumelele futsi bajabule. Labanyenti bakhatsateke ngelikusasa futsi bete litsemba. Bafuna injongo yekuphila. Kantsi labanye labatsi bayakholwa, banelwati loluncane ngemiBhalo. Bacishe bafane nebantfu baseNineve yasendvulo. (Fundza Jona 4:11.) Nangabe sinesikhatsi lesinyenti sekushumayela, siwubona ngalokucacile umehluko emkhatsini webantfu labangamati Nkulunkulu nebantfu baJehova. (Isa. 65:13) Sikhunjutwa ngebuhle baJehova ngobe akagcini nje ngekwenetisa tidzingo tetfu temoya kodvwa uphindze asimeme sonkhe kutsi sitfole kudla kwakamoya lokucabulako futsi sibe nelitsemba sibili.—Semb. 22:17.

5. Kusita labanye kutsi bati Nkulunkulu kusisita njani kutsi sibhekane netinkinga tetfu?

⁵ Kusita labanye kutsi bati Nkulunkulu kwenta kube melula ngatsi kutsi singakhatsatwa tinkinga tetfu. Trisha, lolihlahlandlela lelivamile wabona buciniso balamavi ngesikhatsi batali bakhe badivosa. Utsi: “Lesi bekusikhatsi lesimatima kakhulu ekuphileni kwami futsi bengikwatile.” Ngalelinye lilanga bekabuhlungu kakhulu eva shengatsi kufanele ahlale ekhaya kodvwa watidvonsa wahamba wayewuchubela bantfwana labatsatfu sifundvo seliBhayibheli labebabhekene nesimo lebesimatima kakhulu ekhaya kubo. Babe wabo bekabalahlile kantsi umnakabo lomdzala bekabahlukumeta. Trisha uchubeka atsi: “Nome ngabe nguyiphi inkinga lebengibhekene nayo nome buhlungu benhlitiyo lebengibuva bebulite nabucatsaniswa nebalabantfwana. Njengobe sichubeka sifundza, bewubona nje ngebuso babo bumamatseka futsi bajabulile. Labantfwana bebasibusiso lesivela kuJehova, ikakhulukati ngalelolanga.”

6, 7. (a) Kukholwa kwetfu kuciniswa njani nasifundzisa emaciniso eliBhayibheli? (b) Nasibona bantfu lesifundza nabo liBhayibheli bashintja kuphila kwabo ngekusebentisa timiso temiBhalo, kwentekani endleleni lesikwatisa ngayo kuhlakanipha kwaNkulunkulu?

⁶ Kufundzisa ngemaciniso eliBhayibheli kucinisa kukholwa kwetfu. Umphostoli Pawula wabhalela lamanye emaJuda esikhatsini sakhe lehluleka kuphila ngekuvumelana naloko lebekakufundzisa watsi: “Njengobe ufundzisa labanye, wena awutifundzisi ngani?” (Rom. 2:21) Kwehluke kakhulu kumahlahlandlela lamuhla. Anematfuba lamanyenti ekufundzisa labanye liciniso newekuchuba tifundvo teliBhayibheli. Kute loko akwente ngemphumelelo kudzingeka alungiselele sifundvo ngasinye futsi mhlawumbe acwaninge kute atewuphendvula imibuto. Janeen lolihlahlandlela utsi: “Ngaso sonkhe sikhatsi nangitfola litfuba lekufundzisa labanye liciniso, lawo maciniso avele ajule engcondvweni nasenhlitiyweni yami. Ngesizatfu saloko, kukholwa kwami akukemi ndzawonye, kuchubeka kukhula.”

⁷ Kubona bantfu lesifundza nabo liBhayibheli bashintja kuphila kwabo ngekusebentisa timiso talo, kujulisa kukwatisa kwetfu kuhlakanipha kwaNkulunkulu. (Isa. 48:17, 18) Loku kusisita kutsi sitimisele kuchubeka sisebentisa timiso talo ekuphileni kwetfu. Naku lokwashiwo ngulelinye lihlahlandlela lelingu-Adrianna, litsi: “Kuphila kwebantfu kungamosheka nabangetsembela ekuhlakanipheni  kwabo. Kodvwa nabacala kwetsembela ekuhlakanipheni kwaJehova, kuvele kushintje kuphila kwabo.” Ngendlela lefanako, Phil utsi: “Ubona indlela Jehova lakhona ngayo kushintja bantfu lebebetamile kutishintja kodvwa behluleka.”

8. Kusebenta nebangani labakahle emsebentini wekushumayela kuba namuphi umtselela kitsi?

⁸ Kusebenta nebangani labakahle emsebentini wekushumayela kwakha buhlobo betfu naNkulunkulu. (Taga 13:20) Emahlahlandlela lamanyenti asebentisa sikhatsi lesinyenti emsebentini wekushumayela akanye nebazalwane bawo. Loko kuvula ematfuba lamanyenti ekutsi ‘basitakale kanyekanye.’ (Rom. 1:12; fundza Taga 27:17.) Lisa lolihlahlandlela utsi: “Emsebentini wekutiphilisa, kuhlale kunekuncintisana nemona. Onkhe emalanga utitfola usemkhatsini webantfu labahlebanako futsi labakhuluma lulwimi lolubi. Nguloyo naloyo ulwela kuba ngetulu kwalomunye. Ngaletinye tikhatsi uyahlaselwa nome uhlekwe bulima ngenca yekutiphatsa ngendlela yebuKhristu. Kwehlukile emsebentini wekushumayela ngobe kuba nemaKhristu kuyakha. Nakushona lilanga ngisuke ngicabulekile nome ngabe ngingafika ekhaya ngidzinwe kangakanani.”

9. Kuba ngemahlahlandlela nemlingani wemshado kungabucinisa njani buhlobo benu?

⁹ Kuba ngemahlahlandlela nemlingani wemshado kucinisa intsambo lenemicu lemitsatfu. (Shu. 4:12) Madeline lolihlahlandlela kanye nendvodza yakhe utsi: “Mine nendvodza yami siba nesikhatsi lesinyenti sikhuluma ngelilanga letfu emsebentini wekushumayela nome ngalesikutfolile nasifundza liBhayibheli lesingakusebentisa ensimini. Njengobe kuchubeka iminyaka singemahlahlandlela sobabili, sisondzelana kakhulu.” Trisha uphindze atsi: “Sobabili siphila imphilo lemelula kute singatifaki etikweledini, ngako asicatjaniswa yimali. Luhlelo lwetfu lwasensimini luyafana, ngako-ke siyakhona kuhamba ndzawonye siye kubantfu lesike sacoca nabo nakulesibafundzela  liBhayibheli lokusisita kutsi sisondzelane siphindze sisondzele kuJehova.”

10. Nasitibeka kucala tintfo letimayelana neMbuso futsi sibona indlela Nkulunkulu lasisekela ngayo, simetsemba kangakanani Jehova?

¹⁰ Kwetsembela kwetfu kuJehova kuyakhula nasitibeka kucala tintfo letimayelana neMbuso, sijabulela kusekelwa nguJehova futsi sibone nakaphendvula imithantazo yetfu. Ngelizinga lelitsite, kuliciniso loku kuwo onkhe emaKhristu letsembekile. Labo labenta umsebenti wasikhatsi sonkhe batfola kutsi kwetsembela kuJehova kungabasita kutsi bachubeke bangemahlahlandlela. (Fundza Matewu 6:30-34.) Curt lolihlahlandlela lophindze abe ngumbambeli wembonisi wesifundza, wavuma kuvakashela libandla lebelikhashane ngema-awa lamabili nehhafu nalapho bekahlala khona. Yena nemkakhe naye lolihlahlandlela, bebanaphethiloli lolingene kuya kuphela kulelobandla kantsi umholo bekatawutfola evikini lebelitawulandzela. Curt utsi: “Ngacala kutibuta kutsi ngitsetse sincumo lesikahle yini.” Ngemuva kwekuthantaza, bancuma kutsi batawukuya kulelobandla, betsembe kutsi Nkulunkulu utatinakekela tidzingo tabo. Nasebatawuhamba, lomunye dzadze wabashayela lucingo watsi unesipho sabo. Bekuyimali lelingene kutsi bakhone kubuya kulelobandla. Curt uchubeka atsi: “Nangabe uke wabhekana netimo letifana naleti, kumelula kubona indlela Jehova lasinakekela ngayo.”

11. Ngutiphi letinye tetibusiso letitfolwa ngemahlahlandlela?

¹¹ Kuliciniso kutsi ngalokuvamile emahlahlandlela lasebenta ngekutimisela emsebentini waJehova futsi lenta konkhe lokusemandleni awo kute asondzele kuye, atfola kutsi ‘alandzelwa’ yimvula yetibusiso. (Dut. 28:2) Nome kunjalo, kuba lihlahlandlela kunetinsayeya tako. Kute inceku yaNkulunkulu legonyiwe etinkingeni letabangelwa kuvukela kwa-Adamu. Nanobe ngenca yetinkinga lamanye emahlahlandlela atfole kutsi kufanele ayekele sikhashana emsebentini wasikhatsi sonkhe, kungenteka leto tinkinga aticatulule nobe atigweme. Yini lengase isite emahlahlandlela kutsi achubeke nekujabulela umsebenti wasikhatsi sonkhe?

12, 13. (a) Yini lokufanele yentiwe lihlahlandlela nangabe linenkinga yekugcwalisa umgomo wema-awa? (b) Kungani kubalulekile kuba neluhlelo lwekufundza liBhayibheli onkhe emalanga, sifundvo lotichubela sona nekuzindla?

¹² Emahlahlandlela lamanyenti amatasatasa. Kungase kube matima kutsi tonkhe tintfo atente kahle, ngako, kubalulekile kutsi ahleleke. (1 Khor. 14:33, 40) Nangabe lihlahlandlela libhekene nebumatima bekufinyelela umgomo wema-awa, kungahle kudzingeke lihlole kutsi sikhatsi salo lisisebentisa njani. (Ef. 5:15, 16) Lingase litibute kutsi: ‘Ngicitsa sikhatsi lesingakanani ekutijabuliseni nome ekwenteni tintfo tami? Kudzingeka ngifundze kutibamba yini? Ngingakwati yini kwenta tingucuko eluhlelweni lwami lwemsebenti wekutiphilisa?’ Nome ngabe ngumuphi umKhristu angavuma kutsi kumelula kwengeta tintfo eluhlelweni lotentele lona, kungako labo labasemsebentini wasikhatsi sonkhe kungadzingeka bahlale baluhlola luhlelo lwabo, bente tingucuko nakunesidzingo.

¹³ Kufundza liBhayibheli onkhe emalanga, sifundvo lotichubela sona nekuzindla, kufanele kube khona eluhlelweni lelihlahlandlela. Ngako-ke, lihlahlandlela lidzinga kutekhuta kute imisebenti lengakabaluleki lingayiphatamisi esikhatsini lelisibekele tintfo letibalulekile. (Fil. 1:10) Nasi sibonelo: Ngeliso lengcondvo, bona lihlahlandlela libuya ekhaya ngemuva kwelilanga lelidze lelilicitse ensimini. Lelihlahlandlela litsi lihlela kusebentisa leyo ntsambama kute lilungiselele imihlangano yaleloviki. Licala ngekufundza tincwadzi letibuya eposini, livule ngcondvomshini walo bese lifundza ema-e-mail liphindze liwaphendvule. Kusenjalo, lingena kulenye i-Web site lifuna kuhlola kutsi intfo letsite lelifuna kuyitsenga seyehlile yini. Lingakanaki, cishe sekuphele ema-awa lamabili solo alikacali kutadisha. Yini leyenta lesento salo sibe yinkinga? Tingijimi  kufanele tinakekele imitimba yato nangabe tifuna kuchubeka titingijimi. Ngendlela lefanako, emahlahlandlela kufanele abe neluhlelo lolukahle lwesifundvo latichubela sona kute atewuchubeka acinisa buhlobo bawo naNkulunkulu futsi aphikelele emsebentini wasikhatsi sonkhe.—1 Thim. 4:16.

14, 15. (a) Kungani emahlahlandlela kudzingeka kutsi aphile imphilo lemelula? (b) Nangabe lihlahlandlela liba netinkinga, yini lokufanele liyente?

¹⁴ Emahlahlandlela laphumelelako alwela kuphila imphilo lemelula. Jesu wakhutsata bafundzi bakhe kutsi babe neliso lelihle. (Mat. 6:22) Bekaphila imphilo lemelula kute afeze umsebenti wakhe ngaphandle kwetiphatamiso. Washo kufanele kutsi: “Timphungutja tinemigodzi, netinyoni tinetidleke, kodvwa iNdvodzana yeMuntfu ite indzawo yekulala iphumule.” (Mat. 8:20) Emahlahlandlela lanesifiso sekufundza esibonelweni saJesu, enta kahle ngekukhumbula kutsi nawanemcebo lomnyenti, kutawudzingeka sikhatsi lesinyenti sekuwunakekela.

¹⁵ Emahlahlandlela ayacondza kutsi umsebenti lawentako ukhetsekile kodvwa awatiboni ancono kunalabanye. Nome ngabe ngusiphi sipho nome luhlobo lolutsite lwemsebenti wasikhatsi sonkhe lesingaba kuwo, silutfole ngenca yemusa lomkhulu waNkulunkulu. Ngaleso sizatfu, kute sichubeke singemahlahlandlela, kufanele setsembele kuJehova. (Fil. 4:13, NW.) Titawuba khona tinsayeya nebumatima lobutsite. (Hla. 34:19) Nakuvela timo letinjalo, emahlahlandlela kufanele ashiyele konkhe kuJehova kute atfole sicondziso futsi amnike litfuba lekuwasita esikhundleni sekutsi aphonse lithawula, awuyekele umsebenti wawo. (Fundza Tihlabelelo 37:5.) Nawabona kutsi Nkulunkulu uwasekela ngelutsandvo, atawusondzela kuye njengobe anguBabe wawo wasezulwini lonakekelako.—Isa. 41:10.

16. Nangabe unesifiso sekuba lihlahlandlela, yini lokufanele uyente?

¹⁶ Nangabe ufuna kutfola tibusiso letitfolwa ngulabo labasemsebentini wasikhatsi sonkhe, tjela Jehova ngesifiso sakho. (1 Joh. 5:14, 15) Coca nemahlahlandlela. Tibekele imigomo yekuba lihlahlandlela. Nguloko kanye lokwentiwa nguKeith na-Erika. Njengabo bonkhe bantfu labashadene lababontsanga yabo, bebasebenta umsebenti wekutiphilisa onkhe emalanga futsi batsenga indlu nemoto lensha nabasandza kushada. Batsi: “Besicabanga kutsi leto tintfo titasenetisa ekuphileni kodvwa atizange tisenetise.” Ngesikhatsi Keith aphelelwa ngumsebenti, waba lihlahlandlela lelisitako. Uyakhumbula, utsi: “Kuba lihlahlandlela kwangikhumbuta injabulo lenyenti loyitfola nawusemsebentini wekushumayela.” Bakha bungani nalabanye labashadene labangemahlahlandlela lababasita babona kutsi kunenjabulo letfolakala ngekuphila imphilo lemelula nekuba lihlahlandlela. Yini leyentiwa boKeith na-Erika? Batsi: “Sabhala phansi imigomo yetfu, sayinamatselisa efrijini. Nasesiwufinyelele umgomo lotsite, besimaka kuleliphepha.” Ngekuhamba kwesikhatsi baba ngemahlahlandlela lavamile.

17. Kungani kungaba kuhlakanipha kutsi ucabangele kushintja luhlelo lwakho nobe indlela lophila ngayo kute ube lihlahlandlela?

¹⁷ Ungaba yini lihlahlandlela? Nangabe kwanyalo ungaboni kutsi ungakhona, yenta konkhe lokusemandleni kute usondzelane naJehova ngekutsi uhlanganyele ngalokugcwele emsebentini wekushumayela. Nasewuthantazile ngalendzaba, ungase utfole kutsi kwenta lushintjo eluhlelweni lwakho nobe emphilweni yakho kungakusita kutsi ube lihlahlandlela. Nawungaba lihlahlandlela, injabulo lotayitfola itawuba yinkhulu kakhulu kunekutidzela lotakwenta. Utawuba nekwenetiseka lotakutfola ngekutsi ubeke uMbuso kucala kunetintfo lotitsandzako. (Mat. 6:33) Utawuba nenjabulo lenkhulu letfolakala ngekupha. Ngetulu kwaloko, utawuba nesikhatsi lesinyenti sekucabanga nekukhuluma ngaJehova, lokutakwenta ujulise lutsandvo lwakho ngaye futsi umjabulise.