EMINYAKENI lengaba lishumi leyendlulile Gregorio na-Marilou, balingani bemshado labaseminyakeni yabo-30, bebangemahlahlandlela eManila ngesikhatsi lesifanako basebenta umsebenti wekutiphilisa wasikhatsi sonkhe. Kwakuyinsayeya kodvwa baphumelela. Marilou wakhushulelwa esikhundleni sekuba ngumenenja welibhange lebekasebenta kulo. Utsi: “Imisebenti yetfu leholela kahle yasivumela kutsi siphile imphilo lentofontofo.” Ecinisweni, bebanemali kangangekutsi bancuma kwakha indlu lebebayifisa endzaweni lenhle leyayingemakhilomitha langu-19 kusuka emphumalanga yaseManila. Bacasha inkapane letsite kutsi ibakhele lendlu futsi bahlela kuyibhadala njalo ngenyanga kuze kuphele iminyaka lelishumi.

Marilou utsi: “Umsebenti wami lomusha wawudla sikhatsi sami lesinyenti nemandla kangangekutsi inshisekelo yami ngetintfo tebuKhristu yehla. Ngabona kutsi ngebela Jehova.” Uchubeka atsi: “Ngangingasamniketi Jehova sikhatsi lebengihlele kumniketa sona.” Ngalelinye lilanga boGregorio naMarilou bacoca ngendlela lebebasebentisa ngayo kuphila  kwabo njengobe besingabajabulisi lesimo sabo. Gregorio utsi: “Besifuna kwenta lushintjo kodvwa besingakwati kahle loko lebekufanele sikwente. Sacoca ngekutsi singakusebentisa njani kuphila kwetfu kute sisebentise sikhatsi lesinyenti emsebentini waJehova njengobe singenabo bantfwana. Sathantaza kuJehova sicela kutsi asisite.”

Kuleso sikhatsi, beva tinkhulumo letinyenti mayelana nekukhonta lapho kunesidzingo lesikhulu khona sebamemeteli beMbuso. Gregorio utsi: “Seva shengatsi leto tinkhulumo tiyimphendvulo yemithantazo yetfu.” Laba labashadene bathantazela kutsi babe nesibindzi sekutsi batsatse sincumo lesifanele. Insayeya lenkhulu bekukubhadala lenkapane leyabakhela lendlu ngobe besebayibhadele iminyaka lemitsatfu. Kwakufanele benteni? Marilou utsi: “Nasiyekela kubhadala, besitawulahlekelwa ngiko konkhe lebesesikubhadele, lokwakuyimali lenyenti. Kwakulitfuba lekukhetsa kutsi sifuna kubeka Jehova kucala yini nome tifiso tetfu.” Ngekucabanga ngemavi emphostoli Pawula, ‘ekulahlekelwa ngiko konkhe,’ bayekela kubhadala lendlu, bayekela imisebenti yabo baphindze batsengisa konkhe lebebanako, batfutsela endzaweni yasemakhaya lesesichingini sasePalawan, lesingemakhilomitha langu-480 eningizimu yaseManila.—Fil. 3:8.

Ngaphambi kwekutsi bahambe, boGregorio naMarilou bebetamile kutilungiselela kutsi baphile imphilo lemelula kodvwa bebangati kutsi kuphila kwabo lokusha kutawuba njani bate befika lapho bebaya khona. Marilou utsi: “Samangala ngobe bekute gesi, kwakute lebekwenta lemphilo ibe ntofontofo. Imphilo beyihlukile kuneyasedolobheni. Ngangikhumbula kuvakasha edolobheni nekuya etitolo tekudlela.” Nome kunjalo, laba labashadene bachubeka batikhumbuta kutsi kungani balapho futsi kungakahambi nesikhatsi lesidze bakhona kuvumelana nesimo saleyondzawo. Marilou utsi: “Manje ngijatjuliswa kubona buhle bendalo lobuhlanganisa kukhanya kwetinkhanyeti ebusuku. Injabulo lenkhulu, kubona labo lesishumayela kubo bajabulile. Ngekukhonta kulendzawo, ‘sayifundza imfihlo’ yekweneliswa.”—Fil. 4:12.

Gregorio utsi: “Nasifika kulendzawo bekunaboFakazi labane kuphela. Bajabula kakhulu nangicala kwetfula inkhulumo yelinyenti njalo ngeliviki nekuhlabela tingoma teMbuso ngelugitali lwami.” Kungakapheli nemnyaka, laba labashadene babona kwandza kwalelicembu lelincane liba libandla lelinebamemeteli labangu-24. Gregorio utsi: “Lutsandvo labasibonisa lona kulelibandla, lusitsintsa kakhulu.” Lamuhla, nababuka emuva kuleminyaka lesitfupha leyendlulile bakhonta kulendzawo lebeyikhashane, batsi: “Ayikho injabulo lengacatsaniswa nekubona bantfu labanyenti baba yincenye yelibandla. Nyalo sesiyativela nje kutsi kuphila kwetfu sekunenjongo kunakucala.”

EPhilippines, bazalwane nabodzadze labacishe babe ngu-3 000 batfutsela etindzaweni lapho kunesidzingo lesikhulu sebamemeteli beMbuso. Labanye labangu-500 kubo, bodzadze labangakashadi. Asesicoce nga-Karen njengesibonelo.

Karen, nyalo loseminyakeni yabo-20, wakhulela edolobheni iBaggao eCagayan. Nakaseminyakeni yekutfomba, bekavame kucabanga ngekwandzisa sikhatsi lasisebentisa emsebentini wekushumayela. Utsi: “Kwati kutsi sikhatsi lesesisele sesinciphile nekutsi lonkhe luhlobo lwebantfu kufanele luve umlayeto weMbuso, kwangenta ngafuna kukhonta lapho kunesidzingo lesikhulu sebamemeteli.” Nanobe labatsite emndenini wakubo bamcela kutsi atfole imfundvo lephakeme kunekuya endzaweni yasemakhaya kuyoshumayela, Karen wathantaza kuJehova wacela sicondziso. Waphindze wakhuluma nalabo labakhonta etindzaweni tasemakhaya. Nakaneminyaka lengu-18 budzala, watfutsela endzaweni yasemakhaya lebeyikadze ikhashane ngemakhilomitha langu-64 kunasedolobheni lakubo.

Lelibandla lelincane Karen laya kuyolisekela lisebenta insimu lesetintsabeni letisedvute nePacific Coast. Nakakhumbula Karen utsi: “Kuya nje kulelibandla lelisha nawusuka eBaggao, sasihamba emalanga lamatsatfu, sehla senyuka netintsaba futsi sewela imifula tikhatsi letingetulu kwa-30.” Uphindze atsi: “Kute sifike kulabo lebesibafundzela liBhayibheli, bengihamba ema-awa lasitfupha, ngilala kulomunye lebengimfundzela futsi ngakusasa ngangihamba lamanye ema-awa lasitfupha kute ngifike labengihlala khona.” Imiphumela lengayitfola iyakufanela yini konkhe loku? Ngekumomotseka lokukhulu, Karen uchubeka atsi: “Ngaletinye tikhatsi imilente yami beyiba buhlungu kodvwa ngichube tifundvo letinyenti letingaba ngu-18. ‘Nginambitsile ngabona kutsi Jehova muhle’!”—Hla. 34:8.

Yini leyenta Sukhi, dzadze longakashadi loseminyakeni yabo-40 lohlala eMelika, kutsi atfutsele ePhilippines? Nga-2011 waya emhlanganweni wesifundza lapho kwacocwa khona nalabashadene. Bachaza kutsi batitsengise njani tintfo tabo letinyenti base batfutsela eMexico kute basite emsebentini wekushumayela. Sukhi utsi: “Leyoncociswano yangenta ngacabanga ngemigomo lebengingakaze ngayicabanga.” Ngalesikhatsi Sukhi afundza kutsi kwakudzingeka lusito ePunjabi kubantfu labahlala ePhilippines, wase uncuma kuyosita ngobe naye abewaseNdiya. Wabhekana yini netinsayeya?

Sukhi utsi: “Kuncuma kutsi ngutiphi tintfo lengangitatitsengisa kwaba matima kunaloko lebengikulindzele. Lokunye futsi kutsi ngemuva kwekuhlala ntofontofo endlini yami iminyaka lengu-13, ngahlala naletinye tihlobo tami kwesikhashana futsi bekungasafanani nasendlini yami. Bekungesimelula kodvwa  bekuyindlela lekahle yekutsi ngitilungiselele kuphila imphilo lemelula.” Ngutiphi tinsayeya labhekana nato nakutfutsela ePhilippines? Utsi: “Bumatima lobukhulu lengangibhekene nabo kwesaba tilwanyana letincane nekukhumbula ekhaya. Ngafundza kwetsembela kakhulu kuJehova.” Kwakufanele yini ngitidzele kangaka? Ngekumomotseka lokukhulu Sukhi utsi: “Jehova usitjela kutsi: ‘Ngilinge utewubona kutsi ngingeke yini nginitfululele tibusiso.’ Nyalo ngibona buciniso balamavi latsi: ‘Utawuphindze ubuye nini? Nginaleminye imibuto leminyenti,’ nakubuta lengicoca naye ensimini. Ngitfola injabulo nekwenetiseka ngekutsi ngikhone kusita bantfu kutsi bati Jehova.” (Mal. 3:10) Sukhi uphindze atsi: “Ecinisweni sincumo sekutfutsa sasimatima kakhulu. Ngemuva kwekutfutsa, kwangimangalisa kubona indlela Jehova langinakekela ngayo.”

Sime, umzalwane loshadile loseminyakeni yabo-30, wahamba ePhilippines kute ayosebenta umsebenti loholela kahle kulelinye live leliseningizimu lesenshonalanga ye-Asia. Aseselapho, watfola sikhutsato kumbonisi wesifundza nasenkhulumeni lebeyetfulwa lilunga leSigungu Lesibusako leyakhutsata Sime kutsi abeke Jehova kucala ekuphileni kwakhe. Sime utsi: “Kucabanga kuyekela umsebenti kwangetfusa kakhulu.” Nanobe kunjalo, wayekela emsebentini wabuyela ePhilippines. Lamuhla, Sime nemfati wakhe Haidee, bakhonta esifundzeni saseDavao del Sur, eningizimu yePhilippines lapho kwakunesidzingo sebamemeteli beMbuso kute bahlanganise insimu yakhona lebeyiyinkhulu kakhulu. Sime utsi: “Nangibuka emuva ngiyajabula kutsi ngakuncoba kwesaba kulahlekelwa ngumsebenti futsi ngabeka Jehova kucala. Ayikho intfo leyenetisako ekuphileni kwengca kuniketa Jehova lokuncono kakhulu lonako.”

Ramilo na-Juliet, labashadene labangemahlahlandlela labaseminyakeni yabo-30, batfola kutsi libandla lebelikhashane ngemakhilomitha langu-30 nasekhaya labo lidzinga lusito. Ngekutitsandzela baya kuyolisita. Njalo ngeliviki, lina nome libalele, Ramilo naJuliet bebahamba tikhatsi letinyenti ngesidududu sabo kute babe semihlanganweni yelibandla futsi baye ensimini. Nanobe kuhamba emigwacweni lenemabhampi nasemabhulohweni bekunetinsayeya, bayajabula ngekutsi bandzisa sikhatsi labasicitsa emsebentini wekushumayela. Ramilo utsi: “Mine nemfati wami sichuba tifundvo teliBhayibheli letingu-11. Kukhonta lapho kunesidzingo lesikhulu sebamemeteli, kubitela kutidzela kodvwa kuyasenetisa kakhulu.”—1 Khor. 15:58.

Ungatsandza yini kufundza kabanti ngekukhonta lapho kunesidzingo lesikhulu khona sebamemeteli eveni lakini nobe kulelinye live? Nakunjalo, khuluma nembonisi wesifundza lokuso uphindze ufundze sihloko lesitsi: “‘Ungawelela Yini EMasedoniya’?” ku-Msebenti Wetfu WeMbuso wanga-August 2011.