Buve baseRoma bebenta kutsi umuntfu abe nemalungelo latsite kunobe nguyiphi indzawo lakuyo embusweni waseRoma. Umuntfu longumRoma bekangaphansi kwemtsetfo waseRoma, hhayi imitsetfo yemadolobha lamancane. Nakamangalelwe, bekangavuma kutsi atekiswe licala kulandzelwa imitsetfo yelidolobha labekulo, kodvwa abesolo analo nelilungelo lekutsi lelicala litekwe enkantolo yemaRoma. Nangabe atfola sigwebo sekufa, abenalo lilungelo lekwendlulisela licala lakhe kumbusi.

Nakakhuluma ngalamalungelo, Cicero, labeyindvodza lengumRoma lehamba embili kutepolitiki, watsi: “Kulicala kubopha sakhamuti saseRoma; kusishaya kubi kakhulu; kantsi kusibulala kufanana nekubulala umtali wakho nobe sihlobo sengati.”

Umphostoli Pawula washumayela kuto tonkhe tindzawo letatingephansi kweMbuso wemaRoma. Kunetikhatsi letintsatfu letibhaliwe eBhayibhelini lapho awasebentisa khona emalungelo akhe njengobe abesakhamuti saseRoma: (1) Watjela bomantji baseFiliphi kutsi bebephule lilungelo lakhe ngekumshaya. (2) Ngesikhatsi aseJerusalema, waveta kutsi ungumRoma kuze angashaywa. (3) Wendlulisela licala lakhe kuze litekwe nguKhesari, umbusi waseRoma.​—Imisebenti 16:37-39; 22:25-28; 25:10-12.

Jakobe welusa timvu tamalume wakhe Labani iminyaka lengu-20. Wacale wasebenta iminyaka lengu-14 kuze atsatse emadvodzakati lamabili aLabani awente bafati bakhe, kwase kutsi eminyakeni lesitfupha yekugcina, wabhadalwa ngetimvu. (Genesisi 30:25-33) Magazini lonesihloko lesitsi “Biblical Archaeology Review,” utsi: “Tivumelwane tekwelusa letinjengaleso lesentiwa nguLabani naJakobe betetayeleke kakhulu kubabhali basendvulo kanye nakubafundzi bemibhalo yeliBhayibheli.”

Tivumelwane takadzeni letatfolakala eNuzi, eLarsa, kanye nakuletinye tindzawo letise-Iraq tiyakufakazela loko lokwakwentiwa. Sivumelwane besicala kusebenta ngemnyaka lokuhhulwa ngawo timvu kuze kuyofika umnyaka lolandzelako wekuhhulwa kwato. Belusi bebaniketwa linani lelitsite letilwane kutsi balinakekele futsi letilwane betibhalwa eluhlwini ngeminyaka yato kanye nekutsi tindvuna nobe tinsikati. Ngemuva kwemnyaka, umnikati wato abetfola linani lebebavumelene ngalo leboya, tintfo letentiwe ngelubisi, tilwane letisetincane, kanye nalokunye. Tonkhe tintfo lebetisala betitsatfwa ngulomelusi.

Kwandza kwemhlambi bekuya ngekutsi tingakanani timvu letinsikati lomelusi lanikwe tona kutsi ateluse. Esikhatsini lesinyenti, timvu letinsikati letilikhulu bekulindzeleke kutsi titale emazinyane laphilako langu-80. Umelusi bekufanele abhadale nobe ngutiphi timvu letishodako nobe letilahlekile. Ngaleso sizatfu, abenemtfwalo lomkhulu wekutsi atinakekele kahle letilwane lanikwe tona.