Yekucala KubaseKhorinte 6:1-20
6 Ukhona yini kini lotsi nakangevani nalotsite+ bese uya enkantolo kubantfu labangakholwa, angayi kulabangcwele?
2 Anati yini kutsi labangcwele batawehlulela live?+ Nangabe live litawehlulelwa ngini, kunganehlula yini kwehlulela tindzaba letincane kangaka?
3 Anati yini kutsi sitawehlulela tingilosi?+ Pho tingasehlula njani-ke tindzaba talokuphila?
4 Nangabe-ke nitawehlulela tindzaba talokuphila,+ kungani nikhetsa kwehlulelwa bantfu labangemukeleki ebandleni?
5 Loku ngikukhuluma kuze nibe nemahloni. Kute yini lohlakaniphile emkhatsini wenu, longakhona kwehlulela bazalwane bakhe?
6 Umzalwane umangalela umzalwane wakhe enkantolo, kubantfu labangakholwa ngisho nekukholwa!
7 Kusho kutsi senivele nehlulekile nangabe nimangalelana nodvwa. Anivumi leni koniwa?+ Anivumi leni kutsatselwa tintfo tenu?
8 Kodvwa nine niyona futsi nitsatsele labanye tintfo tabo. Loku nikwenta ngisho nakubazalwane benu imbala.
9 Anati yini kutsi bantfu labangakalungi ngeke balidle lifa leMbuso waNkulunkulu?+ Ningadukiswa.* Tingwadla,*+ labakhonta tithico,+ tiphingi,+ titabane,+ emadvodza lalalana nemadvodza,+
10 emasela, bantfu lababukhali,+ tidzakwa,+ labetfukako* kanye netigebengu ngeke balidle lifa leMbuso waNkulunkulu.+
11 Nanobe kunjalo, nguloko labanye benu lebebangiko. Kodvwa senihlantiwe;+ seningcwelisiwe;+ futsi sekutsiwe nilungile+ egameni leNkhosi Jesu Khristu nangemoya waNkulunkulu wetfu.
12 Tonkhe tintfo tivumelekile kimi, kodvwa akusito tonkhe letilusito.+ Tonkhe tintfo tivumelekile kimi, kodvwa ngeke ngivume kulawulwa* ngunobe yini.
13 Kudla kwesisu, nesisu sekudla; kodvwa Nkulunkulu utawenta kutsi totimbili letintfo tibe lite.+ Ngako umtimba awusiwo wekugwadla,* kodvwa weNkhosi;+ neNkhosi yemtimba.
14 Nkulunkulu wayivusa iNkhosi,+ futsi natsi utasivusa ekufeni+ asebentisa emandla akhe.+
15 Anati yini kutsi imitimba yenu ingemalunga aKhristu?+ Ngako-ke ngingawatsatsa yini emalunga aKhristu ngiwahlanganise nengwadla? Cha!
16 Anati yini kutsi loyo lohlanganiswe nengwadla umtimba munye nayo? Ngobe Nkulunkulu utsi: “Laba lababili batawuba nyamanye.”+
17 Kodvwa loyo lohlanganiswe neNkhosi umoya munye nayo.+
18 Bubalekeleni bugwadla.*+ Tonkhe letinye tono umuntfu langatenta tingephandle kwemtimba, kodvwa loyo logwadlako wona umtimba wakhe.+
19 Anati yini kutsi imitimba yenu ilithempeli+ lemoya longcwele lokini, leniwunikwe nguNkulunkulu?+ Nine anisibo benu,+
20 ngobe natsengwa ngelinani lelikhulu.+ Yentani konkhe leningakwenta kuze nikhatimulise Nkulunkulu+ ngemitimba yenu.+
Imibhalo lengentansi
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Nobe “Ningayengeki.”
^ Nobe “labakhuluma inhlamba.”
^ Nobe “kugcilatwa.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
