Imisebenti Yebaphostoli 6:1-15
6 Kulawo malanga, njengobe bafundzi bandza, emaJuda lakhuluma siGriki acala kukhonona ngemaJuda lakhuluma siHebheru, ngobe bafelokati lebebakhuluma siGriki bebangemukeliswa kudla lobekwabiwa malanga onkhe.+
2 Ngako baphostoli labangu-12 babitela ndzawonye sicumbi sebafundzi batsi: “Akukafaneli* kutsi tsine siyekele umsebenti wekufundzisa ngelivi laNkulunkulu kuze sabe kudla ematafuleni.+
3 Ngako-ke bazalwane, funani emadvodza langu-7 emkhatsini wenu, lakhulunyelwa kahle*+ futsi lagcwele umoya waNkulunkulu nekuhlakanipha,+ kuze ente lomsebenti lobalulekile,+
4 khona tsine sitewutinikela ekuthantazeni nasekufundziseni ngelivi laNkulunkulu.”
5 Loko labakusho kwasijabulisa sonkhe lesicumbi. Ngako sakhetsa Stefano, indvodza lebeyinekukholwa lokucinile futsi igcwele umoya longcwele, sakhetsa naFiliphu,+ naPhrokhorusi, naNikhano, naThimoni, naPhamenasi, kanye naNikholawusi wase-Antiyokhi, lobekagucukele enkholweni yebuJuda.
6 Babaletsa kubaphostoli, kwatsi nasebathantazile bababeka tandla.+
7 Ngako livi laNkulunkulu lachubeka landza,+ nelinani lebafundzi lakhula kakhulu+ eJerusalema; futsi baphristi labanyenti baba ngemakholwa.+
8 Stefano lobekemukelwa nguNkulunkulu futsi anemandla lamakhulu lawaphiwe nguNkulunkulu, wenta timangaliso netibonakaliso letinkhulu emkhatsini webantfu.
9 Kodvwa kweta emadvodza latsite elicembu lokutsiwa liSinagoge Lebantfu Labakhululiwe, akanye nalamanye laphuma eSirene, e-Alekzandriya, eSilisiya kanye nase-Asiya, kuze atophikisana naStefano.
10 Nanobe kunjalo ehluleka kumphikisa ngoba bekakhuluma ngekuhlakanipha futsi bekasitwa ngumoya longcwele.+
11 Lamadvodza akhutsata bantfu ngasense kutsi batsi: “Simvile ahlambalata Mosi naNkulunkulu.”
12 Enta kutsi bantfu, nemadvodza lamadzala kanye netati temtsetfo basuse siphitsiphitsi, futsi beta ngekushesha babamba Stefano ngenkhani bamyisa eNkantolo YemaJuda.
13 Babese baletsa bofakazi bemanga, labafike batsi: “Lomuntfu solo ukhuluma kabi ngalendzawo lengcwele nangeMtsetfo.
14 Simuve atsi loJesu waseNazaretha utawudzilita lendzawo, futsi agucule imitsetfo lesayinikwa nguMosi.”
15 Njengobe bonkhe lebebakhona kuleNkantolo YemaJuda bebambukile, babona buso bakhe bunjengebuso bengilosi.
