Kulandzisa KwaJohane 18:1-40
18 Nakacedza kusho letintfo, Jesu wesuka nebafundzi bakhe baya ensimini+ lebeyingesheya kweSihosha saseKhidroni.+
2 NaJudasi lobekamtsengisile bekayati lendzawo, ngobe Jesu bekavame kuhlangana khona nebafundzi bakhe.
3 Ngako Judasi wahamba nelibutfo lemasotja kanye nabogadzi lebebatfunywe baphristi labakhulu nebaFarisi, baya kulendzawo baphetse tibane netikhali.+
4 Jesu bekakwati konkhe lobekutakwenteka kuye, ngako wasondzela watsi kubo: “Nifuna bani?”
5 Bamphendvula batsi: “Sifuna Jesu waseNazaretha.”+ Watsi kubo: “Nginguye.” Judasi lobekamtsengisile bekeme nabo.+
6 Kodvwa ngesikhatsi Jesu atsi: “Nginguye,” bahlehlela emuva futsi bawa.+
7 Waphindze wababuta watsi: “Nifuna bani?” Bona batsi: “Sifuna Jesu waseNazaretha.”
8 Jesu wabaphendvula watsi: “Nginitjelile kutsi nginguye. Nangabe nifuna mine, bayekeleni laba.”
9 Loku kwenteka kuze kugcwaliseke loko bekakushito nakatsi: “Kute ngisho namunye kulabo longinike bona lolahlekile.”+
10 Simoni Phetro bekaphetse inkemba, ngako wayihoshula, wasusa indlebe yangesekudla yesisebenti semphristi lophakeme.+ Libito lalesisebenti bekunguMalkhusi.
11 Kodvwa Jesu watsi kuPhetro: “Buyisela lenkemba esikhwameni sayo.+ Akukafaneli yini ngiyinatse lendzebe lengiyinikwe nguBabe?”+
12 Emasotja, nendvuna yemasotja, kanye nabogadzi bemaJuda bambamba Jesu, bambopha.
13 Bacale bamyisa ku-Anasi, ngobe bekangubabetala waKhayafase,+ lobekangumphristi lophakeme ngalowo mnyaka.+
14 Khayafase nguye lowatjela emaJuda kutsi kufa kwemuntfu munye ngenca yabo bonkhe bantfu bekutawasita.+
15 Simoni Phetro kanye nalomunye umfundzi balandzela Jesu.+ Lolomunye umfundzi bekatiwa ngumphristi lophakeme, ngako wangena naJesu ebaleni lalomphristi,
16 kodvwa Phetro wema ngephandle emnyango. Ngako lomfundzi lobekatiwa ngumphristi lophakeme, waphuma wakhuluma nentfombatana lebeyigadze emnyango futsi yangenisa Phetro.
17 Lentfombatana yatsi kuPhetro: “Wena awusuye yini lomunye webafundzi balomuntfu?” Phetro watsi: “Cha, angisuye.”+
18 Tisebenti nabogadzi bebeme eceleni kwemlilo lebebawubasile futsi bebotsa ngobe bekubandza. NaPhetro wema nabo, naye wotsa.
19 Umphristi lomkhulu wabuta Jesu mayelana nebafundzi bakhe nangetimfundziso takhe.
20 Jesu wamphendvula watsi: “Ngikhulume embikwabo bonkhe bantfu. Bengihlale ngifundzisa emasinagogeni nasethempelini,+ lapho onkhe emaJuda bekabutsana khona, futsi kute lebengikukhuluma emasitseleni.
21 Ubutelani mine? Buta labantfu labeva loko lengakusho, ngobe bona bayakwati.”
22 Ngesikhatsi Jesu acedza kusho loko, lomunye gadzi lobekeme edvute wamshaya ngemphama ebusweni,+ watsi: “Uphendvulwa kanjena yini umphristi lomkhulu?”
23 Jesu watsi kuye: “Nangabe kukhona lokubi lengikukhulumile, ngitjele kutsi kuyini; kodvwa nangabe loko lengikukhulumile kukahle, ungishayelani-ke?”
24 Ngako Anasi watfumela Jesu kuKhayafase umphristi lophakeme,+ futsi Jesu bekasolo aboshiwe.
25 Simoni Phetro bekemile otsa umlilo. Babese batsi kuye: “Angitsi nawe ungulomunye webafundzi bakhe?” Yena waphika watsi: “Angisuye.”+
26 Lesinye sisebenti semphristi lophakeme, lebesisihlobo salendvodza Phetro layisusa indlebe+ satsi: “Ngikubonile lensimini uhamba naye, angitsi?”
27 Kodvwa Phetro waphindze waphika; masinyane lichudze lakhala.+
28 Ekuseni kakhulu, emaJuda esuka naJesu kuKhayafase amyisa ekhaya lembusi.+ Kodvwa wona awazange angene ngobe bekangafuni kutingcolisa+ kuze akhone kudla liPhasika.
29 Ngako Pilatu waphuma waya kuwo watsi: “Nguliphi licala lenimbeka lona lomuntfu?”
30 Wona amphendvula atsi: “Kube lomuntfu bekete licala,* besingeke simletse lapha kuwe.”
31 Ngako Pilatu watsi kuwo: “Mtsatseni nine, nimehlulele ngemtsetfo wenu.”+ LamaJuda atsi kuye: “Asikavumeleki kutsi sibulale umuntfu.”+
32 Loku kwenteka kuze kugcwaliseke emavi lashiwo nguJesu nakachaza indlela lebekatawufa ngayo.+
33 Pilatu wabuyela ngekhatsi futsi wabita Jesu, watsi kuye: “UyiNkhosi yemaJuda yini?”+
34 Jesu wamphendvula watsi: “Ubutiswa kutsi ufuna kwati yini, nobe ubutiswa kutsi kunebantfu labakutjele ngami?”
35 Pilatu watsi: “Kantsi ngingumJuda yini mine? Sive sakini nebaphristi labakhulu ngibo labakunikele kimi. Yini loyentile?”
36 Jesu wamphendvula watsi:+ “UMbuso wami awusiyo incenye yalelive.+ Kube bewuyincenye yalo, balandzeli bami bebangangilwela kuze nginganikelwa kumaJuda.+ Kodvwa-ke uMbuso wami awuveli kulelive.”
37 Pilatu watsi kuye: “Manje-ke uyinkhosi yini?” Jesu watsi: “Sewuvele ushito kutsi ngiyinkhosi.+ Ngatalelwa kona loku, futsi ngetela loku eveni, kutsi ngifakazele liciniso.+ Wonkhe umuntfu lophila ngeliciniso, uyalilalela livi lami.”
38 Pilatu watsi kuye: “Liyini liciniso?”
Nakacedza kusho loko, waphindze waphuma waya kulamaJuda, watsi kuwo: “Kute licala lengilitfola kulomuntfu.+
39 Ngetulu kwaloko, ngekusho kwelisiko lenu kufanele nginikhululele umuntfu ngeliPhasika.+ Ngako nifuna nginikhululele leNkhosi yemaJuda yini?”
40 Wona amemeta atsi: “Cha, khulula Bharaba!” LoBharaba bekasigebengu.+
Imibhalo lengentansi
^ Nobe “bekangasiso sigebengu.”
