Kulandzisa KwaJohane 5:1-47
5 Ngemuva kwaloko, kwaba nemkhosi+ wemaJuda, futsi Jesu wenyukela eJerusalema.
2 Egedeni Letimvu lebeliseJerusalema,+ bekunelichibi, ngesiHebheru lebelibitwa ngekutsi yiBhethesda, futsi belinemihubhe lesihlanu.
3 Kulemihubhe bekulele bantfu labanyenti labagulako, labangaboni emehlweni, labachutako nalabakhubatekile.
4 *——
5 Bekunalenye indvodza lebeseyigule iminyaka lengu-38.
6 Jesu wayibona ilele, futsi bekati kutsi beseyigule sikhatsi lesidze, ngako watsi kuyo: “Uyafuna yini kuphila?”+
7 Lendvodza yatsi kuye: “Mnumzane, kute umuntfu longangifaka kulelichibi nakutamatama lamanti, futsi ngivame kutsi nangita kube khona longengcelelako.”
8 Jesu watsi kuyo: “Sukuma, utsatse licansi lakho uhambe.”+
9 Masinyane lendvodza yaphila futsi yatsatsa licansi layo yahamba.
BekuliSabatha ngalelolanga.
10 Ngako emaJuda atsi kulendvodza lebeseyiphilile: “Lamuhla liSabatha, awukavumeleki kuphatsa lelicansi.”+
11 Kodvwa yawaphendvula yatsi: “Loyo longiphilisile utsite kimi: ‘Tsatsa licansi lakho uhambe.’”
12 Ayibuta atsi: “Ngubani lomuntfu lotsite kuwe: ‘Litsatse uhambe’?”
13 Kodvwa lendvodza beyingamati kutsi ungubani, ngobe Jesu besekakulesicumbi sebantfu lebesilapho.
14 Ngemuva kwaloko, Jesu wakhandza lendvodza ethempelini, watsi kuyo: “Buka sewuphilile. Ngako ungasaphindze wone, khona ungatowehlelwa ngulokubi kakhulu kunaloku.”
15 Lendvodza yahamba yatjela emaJuda kutsi iphiliswe nguJesu.
16 Ngako emaJuda amhlupha Jesu ngenca yekwenta letintfo ngeliSabatha.
17 Kodvwa watsi kuwo: “Babe solo usasebenta nanyalo, nami ngiyasebenta.”+
18 Ngako emaJuda bekasolo afuna kubulala Jesu, ngobe bekacabanga kutsi wephula liSabatha, nekutsi ufuna bantfu bacabange kutsi ulingana naNkulunkulu+ ngobe bekambita ngekutsi nguBabe wakhe.+
19 Jesu wawaphendvula watsi: “Ngicinisile, ngicinisile ngitsi kini: INdvodzana ayitenteli lutfo ngekwayo, kodvwa yenta kuphela loko lebona Babe wayo akwenta.+ Ngobe nobe yini Babe wayo layentako, neNdvodzana iyayenta.
20 Babe uyayitsandza iNdvodzana+ futsi uyikhombisa tonkhe tintfo latentako, utayikhombisa netintfo letinkhulu kunaleti kuze nitewumangala.+
21 Ngobe njengobe Babe avusa labafile futsi abenta baphile,+ neNdvodzana iyabaphilisa labo lefuna kubaphilisa.+
22 Babe akehluleli muntfu kodvwa wonkhe umsebenti wekwehlulela uwunike iNdvodzana,+
23 kuze bonkhe bantfu bayihloniphe njengobe nje bahlonipha Babe. Longayihloniphi iNdvodzana akamhloniphi naBabe lowayitfuma.+
24 Ngicinisile, ngicinisile ngitsi kini: Umuntfu lova livi lami futsi amkholwe Loyo longitfumile utawutfola kuphila lokuphakadze,+ ngeke ehlulelwe ngobe sowendlulile ekufeni waya ekuphileni.+
25 “Ngicinisile, ngicinisile ngitsi kini: Sikhatsi siyeta, futsi sengiso nanyalo, lapho labafile batawuva livi leNdvodzana yaNkulunkulu nalabo labalilalele batawuphila.
26 Njengobe nje Babe anekuphila,*+ neNdvodzana uyente yaba nekuphila.+
27 Uyinike neligunya lekwehlulela,+ ngobe iyiNdvodzana yemuntfu.+
28 Kunganimangalisi loku, ngobe sikhatsi siyeta lapho bonkhe labasemathuneni* batawuliva livi layo+
29 futsi baphume; labo labente lokuhle batawuvuselwa ekuphileni, labo labente lokubi bavuselwe ekwehlulelweni.+
30 Kute intfo lengingayenta ngekwami. Ngehlulela ngekwaloko lengikuva kuBabe, futsi ngehlulela ngekulunga+ ngobe angifuni kwenta intsandvo yami, kodvwa ngifuna kwenta intsandvo yaloyo longitfumile.+
31 “Nangabe kungimi ngedvwa lotifakazelako, bufakazi bami abusilo liciniso.+
32 Ukhona lomunye longifakazelako, futsi ngiyati kutsi bufakazi bakhe buliciniso.+
33 Nine nitfumele bantfu kuJohane, futsi ulifakazele liciniso.+
34 Mine angidzingi kufakazelwa bantfu, kodvwa letintfo ngitisho kuze nisindziswe.
35 Lomuntfu bekasibane lesivutsako nalesikhanyako, futsi nine benifuna kujabula sikhashana ekukhanyeni kwakhe.+
36 Mine nginebufakazi lobukhulu kunebaJohane, ngobe imisebenti Babe langitfume kutsi ngiyente, lokungulemisebenti lengiyentako, iyangifakazela kutsi ngitfunywe nguye.+
37 NaBabe lokunguye longitfumile ufakazile ngami.+ Nine anizange nilive livi lakhe nobe nibone buso bakhe,+
38 nelivi lakhe alihlali kini, ngobe loyo lamtfumile animkholwa.
39 “Nihlola imiBhalo+ ngobe nicabanga kutsi kuphila lokuphakadze nitakutfola ngayo; kantsi ngiyo* lelefakaza ngami.+
40 Nanobe kunjalo, anifuni kuta kimi+ kuze nitfole kuphila.
41 Mine angidzingi kudvunyiswa bantfu,
42 futsi ngati kahle kutsi animtsandzi Nkulunkulu.
43 Ngite ngelibito laBabe, kodvwa aningemukeli; kube kufike lomunye eta ngelibito lakhe benitamemukela.
44 Ningakholwa njani nangabe nidvumisana nodvwa futsi ningalufuni ludvumo loluvela kuNkulunkulu lokuphela kwakhe?+
45 Ningacabangi kutsi ngitanimangalela kuBabe; munye umuntfu lonimangalelako, nguMosi,+ loyo lenetsembele kuye.
46 Ecinisweni, kube namkholwa Mosi nami benitangikholwa, ngobe yena wabhala ngami.+
47 Nangabe ningakukholwa loko lakubhala, ningakukholwa njani loko lengikushoko?”
Imibhalo lengentansi
^ Fundza Sandzisanchazo A3.
^ Nobe “anemandla ekunika kuphila,” “anesipho sekuphila.”
^ Leligama lesiGriki lapha lelihunyushwe ngekutsi ‘lithuna’ linemcondvo wekutsi labo labasemathuneni batawukhunjulwa.
^ Lokusho, imiBhalo.
