BoFakazi BaJehova benta umsebenti lobalulekile wekusita bantfu emaveni langetulu kwa-200. Kodvwa ngemave langu-35 kuphela latfola iminikelo leyenele levela emabandleni lasensimini yeligatja lawo kuze anakekele tidzingo tawo. Emave lete imali lenyenti atinakekela njani tidzingo tawo?

 Sigungu Lesibusako saBoFakazi BaJehova sicabanga ngaloko BoFakazi BaJehova labasemhlabeni wonkhe labakudzingako kute bakhonte Jehova futsi bashumayele tindzaba letimnandzi. Iminikelo isetjentiswa kahle. Nangabe ligatja litfola imali lenyenti kunaleyo ledzingekile kuze linakekele tindzingo talo, libese litsatsa lemali lesele liyinikete emave lete imali leyenele yekunakekela tidzingo tawo. Lelilungiselelo lifana naloko lokwentiwa ngemaKhristu elikhulu lekucala lasitana ‘kuze kube nekulingana.’ (2 KubaseKhorinte 8:14) Asebentisa imali leyasala nakanakekela tidzingo tawo kuze asite emaKhristu labengenayo imali leyenele.

 Bativa njani bazalwane labatfole imali levela emagatjeni lanemali leyenele? Sibonelo saloko kutsi hhafu webantfu baseTanzania uphila ngemali lengephansi kwa-2 dollars nobe 33 emalangeni ngelilanga. Lemali levela kulamanye emagatja isite ekulungiseni liHholwa LeMbuso lelisetjentiswa libandla laseMafinga. Lelibandla labhala latsi: “Kusukela kulungiswe liHhlolwa letfu, linani lebantfu lababakhona emihlanganweni yetfu likhule kakhulu. Simbonga kakhulu Jehova ngenhlangano yakhe, kanye nebazalwane labasemhlabeni wonkhe, ngemoya wekwephana losisitile kutsi sibe nendzawo lenhle yekukhontela.”

 Labanye bazalwane betfu labaseSri Lanka bete kudla lokwenele ngenca yeCOVID-19. Labanye labatsintsekile ngu-Imara Fernando kanye nendvodzana yakhe leseyincane, Enosh. Nobe kunjalo, siyayibonga iminikelo levela kulamanye emave, ngobe batfole lusito lebebaludzinga. Bakha likhadi futsi babhala kutsi: “Sibonga bazalwane kutsi bakhombise kutsi bayasitsandza kulesikhatsi lesimatima. Sijabula kakhulu ngekuba yincenye yalomndeni, futsi sihlale sithantaza kuJehova kutsi asite bonkhe bazalwane betfu kulamalanga ekugcina.”

 Nobe ngabe bazalwane nabodzadze wetfu bahlala kuyiphi indzawo, bahlanganyela tintfo labanato nalabanye. Sibonelo saloko kutsi Enosh wenta libhokisi lelincane kuze abhange kulo imali labetawunikela ngayo kuze kusitwe imindeni ledzingile. Guadalupe Álvarez naye wakhombisa umoya lofanako wekwephana. Uhlala kulesinye sifundza saseMexico lapho khona labanye bantfu bahola imali lencane nobe bangaholi lutfo. Nobe kunjalo, unikela ngaloko langakukhona. Wabhala watsi: “Ngimbonga kakhulu Jehova ngebuhle bakhe kanye nelutsandvo lwakhe lolucotfo. Ngiyati kutsi umnikelo wami utawengetwa kuleyentiwe ngulabanye futsi usentjentiselwe kusita bazalwane labadzingile.”

 Emahhovisi eligatja ayakujabulela kutfumela imali etidzaweni letidzingile. Anthony Carvalho lolilunga leKomidi yeLigatja laseBrazil utsi: “Kwaphela iminyaka leminyenti live letfu lisekelwa ngulamanye emave ngekwetimali. Ngenca yalokusekelwa, sibone kwandza lokukhulu. Nyalo, simo setfu semnotfo sesincono, futsi sesiyakhona nekusita lamanye emagatja. Njengebafundzi baJesu labanemoya wekutidzela, bazalwane baseBrazil babuka umsebenti lowentiwa emhlabeni wonkhe bese bayabona kutsi bangasita kuphi.”

 BoFakazi BaJehova bangabasekela njani bazalwane kanye nabo dzadzewabo labadzingile? Ngeke babasekele ngalokucondzile ngekutsi batfumele imali emahhovisini eligatja lakulamanye emave, kepha bangakwenta ngekunikelela umsebenti wemhlaba wonkhe. Loku kungentiwa ngekutsi kunikelwe emabhokisini lasebandleni labhalwe kutsi “Umsebenti Wemhlaba Wonkhe” nobe ku-donate.mt1130.com. Sibonga kakhulu ngeminikelo yenu.