Embikweni wanga-June 2022, mengameli we-World Bank Group wecwayisa, “Simo semnotfo emhlabeni sesiphindze sisengotini. Intsengo yetintfo ikhula ngekushesha futsi ngesikhatsi lesifanako bantfu bete imali yekutsenga tintfo labatidzingako.”

 “Intsengo ya-petrol neyekudla ikhula ngekushesha futsi loku kubatsintse kakhulu bantfu labasemaveni laphuyile,” kuphawula i-International Monetary Fund.

 LiBhayibheli liyasisita sicondze kutsi yini lebangela letinkinga tesimo semnotfo lesibhekene nato, indlela lesingabhekana ngayo nato kanye nekutsi likhona yini litsemba lekutsi titawucedvwa ngalokuphelele.

•   LiBhayibheli libita lesikhatsi lesiphila kuso ngekutsi ‘ngemalanga ekugcina.’—2 KuThimothi 3:1.

•   Jesu watsi bekutawukwenteka “tintfo letetfusako” kulesikhatsi lesiphila kuso. (Lukha 21:11) Kwenyuka kakhulu kwentsengo yetintfo kwenta bantfu besabe. Bantfu bakhatsatekile ngelikusasa labo nangekutsi batawukhona yini kunakekela imindeni yabo.

•   Incwadzi yeSembula yaphrofetha ngekwenyuka kwentsengo yekudla kulesikhatsi lesiphila kuso. “Ngase ngiva livi . . . litsi: ‘Libinta lakolo wekudliwa ngelilanga lelingatsengwa ngeliholo lelilanga, nemabinta lamatsatfu emabele langatsengwa ngeliholo lelilanga.’”—Sembulo 6:6, LiBhayibheli LesiSwati Lelivamile.

 Kuze ufundze lokunyenti ‘ngemalanga ekugcina’ kanye nangesiphrofetho lesisencwadzini yeSembulo, bukela i-video letsi Kusukela Nga-1914, Tintfo Tashintja Emhlabeni futsi ufundze sihloko lesitsi “Bobani Labagibeli Bemahhashi Labane?”

•   “Bayawukwakha tindlu bahlale kuto, bayawuhlanyela emasimu emagilebisi, badle titselo tawo. Angeke bakhe bese kuhlala lomunye, futsi angeke bahlanyele bese kudla lomunye.”—Isaya 65:21, 22.

•   “Kutawuba nenala yekudla emhlabeni; kube kunyenti ngisho naseticongweni tetintsaba.”—Tihlabelelo 72:16.

•   “Jehova utsi: ‘Ngenca yekutsi bantfu labahluphekile bayacindzetelwa, nangenca yekububula kwabo, ngitawusukuma.’”—Tihlabelelo 12:5. a

 Madvutane Nkulunkulu utawucedza simo semnotfo lesingatenetisi tidzingo tabo bonkhe bantfu, hhayi eveni linye nje kuphela, kodvwa emhlabeni wonkhe. Kuze ubone kutsi utawukwenta kanjani loko, fundza sihloko lesitsi “Simo Semnotfo Lesenetisa Tidzingo Tabo Bonkhe Bantfu Singaba Khona Yini?”

 Ngisho nalamuhla liBhayibheli lingakusita ubhekane nalokwenyuka kwentsengo yetintfo. Kanjani? Lineteluleko letisebentisekako tendlela yekusebentisa kahle imali lonayo. (Taga 23:4, 5; Umshumayeli 7:12) Kuze utfole lokunyenti, fundza sihloko lesitsi “Vikela Imali Nezinto Onazo” nalesitsi “Indlela Ongaphila Ngayo Ngokuncane.”