INCENYE 5
Nkulunkulu Ubusisa Abrahama Nemndeni Wakhe
Situkulwane sa-Abrahama siyandlondlobala. Nkulunkulu uvikela Josefa eGibhithe
JEHOVA bekati kutsi lentsandvokati yakhe yayitawuhlupheka futsi ife ngalelinye lilanga. Siphrofetho lesikuGenesisi 3:15 sayiveta lendzaba kodvwa hhayi ngalokucondzile. Nkulunkulu abetawubasita yini bantfu bacondze kutsi abetawulahlekelwa kangakanani ngekufa kwendvodzana yakhe? LiBhayibheli liniketa sibonelo lesihle saloku. Nkulunkulu wacela Abrahama kutsi anikele nga-Isaka indvodzana yakhe.
Abrahama abeyindvodza lenelukholo lolucinile. Khumbula kutsi Nkulunkulu abemtsembise kutsi uMsindzisi webantfu abetawuvela ku-Isaka. Anelitsemba lekutsi Nkulunkulu abetamvusa Isaka, Abrahama walalela loko lokwakushiwo nguNkulunkulu, kutsi anikele ngendvodzana yakhe. Ingilosi yaNkulunkulu yamvimba asengakakwenti loku. Nkulunkulu wamncoma ngekungamgodleli loko lokwakuligugu kuye. Ngako-ke waphindza lesetsembiso abesente naye ekucaleni.
Ngemuva kwesikhatsi, Isaka waba nemadvodzana lamabili, Esawu naJakobe. Ngalokungafanani na-Esawu, Jakobe abetitsandza tintfo letingcwele, futsi wabusiswa ngaloko. Nkulunkulu washintja libito laJakobe watsi ngu-Israyeli, futsi tive taka-Israyeli taphuma emadvodzaneni akhe langu-12. Lomndeni waba kanjani sive lesikhulu?
Kunetintfo letinyenti letenteka ngenca yekutsi emadvodzana aJakobe aba nemona ngemnakabo lomncane Josefa. Bamtsengisa kutsi abe sigcila eveni laseGibhithe, kepha Nkulunkulu wambusisa lomfana lobekatsembekile futsi anesibindzi. Nobe nje Josefa abebukene nebumatima, Faro umbusi waseGibhithe wamkhetsa futsi wamnika sikhundla lesisetulu. Ngenca yendlala lebeyikhona, Jakobe watfuma emadvodzana akhe kutsi ayotsenga kudla eGibhithe, futsi kwakunguJosefa lobekaphetse lokudla! Ngemuva kwenjabulo yekuhlangana nebanakabo, Josefa wabacolela futsi wahlela kutsi wonkhe umndeni wakubo utfutsele eGibhithe. Banikwa indzawo lenhle, lapho bebatawuchubeka bandza futsi baphumelela. Josefa wakucondza kutsi nguNkulunkulu lohlele kutsi konkhe kuhambe ngalendlela kute kugcwaliseke tetsembiso takhe.
Jakobe lobesakhulile wacitsa iminyaka yakhe yekugcina ahlala eGibhithe kanye nawo wonkhe umndeni wakhe. Ngembi kwekutsi Jakobe afe, wabiketela kutsi uMsindzisi webantfu abetawuba nguMbusi lonemandla, futsi abetawuphuma esitukulwaneni saJuda. Ngembi kwekufa kwakhe, Josefa waphrofetha kutsi ngalelinye lilanga, Nkulunkulu abetawukhipha umndeni waJakobe eGibhithe.
