“EKUCALENI Nkulunkulu wadala lizulu nemhlaba.” (Genesisi 1:1) Lamavi etayeleke kakhulu kwendlula onkhe lamanye emavi lake abhalwa. Ngalawo mavi lamahle, liBhayibheli lisatisa ngaloMuntfu lobalulekile lovela kuyo yonkhe imiBhalo yalo leNgcwele—Nkulunkulu Somandla, Jehova. Livesi lekucala leliBhayibheli liveta kutsi Nkulunkulu unguMdali wemazulu kanye nalomhlaba lesihlala kuwo. Emavesi lalandzelako, achaza kutsi emalangeni latsite lalandzelanako, Nkulunkulu wadala likhaya letfu lelingumhlaba, nako konkhe lokuhle lokukulo.

Indalo yaNkulunkulu yasemhlabeni lelikhetselo kunayo yonkhe bekungumuntfu. Abentiwe ngemfanekiso waNkulunkulu—abonisa timfanelo taJehova, njengelutsandvo nenhlakanipho. Nkulunkulu wambumba umuntfu ngelutfuli lwemhlabatsi. Wametsa watsi ngu-Adamu, wase umbeka ePharadisi—lokwakuyinsimu yase-Edeni. Nkulunkulu wahlanyela lensimu, wayigcwalisa ngetihlahla letinhle naletitsela titselo.

Nkulunkulu wabona kutsi lendvodza idzinga umsiti. Asebentisa lubhambo lwa-Adamu, wamentela umfati, wametsa watsi ngu-Eva. Ajabulile, Adamu watsi: “Lona-ke sewulitsambo lematsambo ami, nenyama yenyama yami.” Nkulunkulu wase utsi: “Ngako-ke indvodza iyawushiya uyise nenina inamatsele kumfati wayo, bese baba nyamanye.”—Genesisi 2:22-24; 3:20.

Nkulunkulu waniketa Adamu na-Eva imitsetfo lemibili. Kwekucala, wabatjela kutsi balime futsi banakekele lelikhaya labo, futsi baligcwalise ngebantfwana. Kwesibili, wabatjela kutsi bangadli sitselo sesihlahla sinye-vo, kuto tonkhe lebetikulensimu, “sihlahla sekwati lokulungile nalokungakalungi.” (Genesisi 2:17) Uma bebangeke bawulalele lomtsetfo, bebatawukufa. Ngalemitsetfo Nkulunkulu waniketa Adamu na-Eva litfuba lekubonisa kutsi bayamemukela njengeMbusi wabo. Kulalela kwabo bekuyobonisa lutsandvo nekubonga kwabo. Bebete intfo lebebangayisola ngekubusa kwaNkulunkulu lokunelutsandvo. Adamu na-Eva bebete sici. LiBhayibheli lisitjela kutsi “Nkulunkulu wakubona konkhe labesakwentile, kutsi kuhle kakhulu.”—Genesisi 1:31.

—Lendzaba itsetfwe encwadzini ya-Genesisi sehluko 1 na-2.