Asewucabange nganasi simo: Bheki uhamba ngemoto endzaweni langayati. Timphawu temgwaco tikhombisa kutsi lendzawo lahamba kuyo akusiyo lena lebekufanele ngabe uhamba kuyo. Bheki sewuyabona nyalo kutsi ulahlekile. Kungenteka kukhona lapho ayilahle khona indlela.

Kube bewunguBheki, yini lobewungayenta?

Kunyenti longakwenta:

1. Ungabuta labayatiko indlela.

2. Ungabuka libalave, nobe usebentise i-GPS.

3. Ungachubeka neluhambo, unelitsemba lekutsi kungenteka ugcine sewuyitfolile indlela.

Kusebaleni kutsi loku kwekugcina ngiko lokungeke kukusite kangako.

Loku kwesibili kona kuncono kunaloku kwekucala. Kantsi nje vele lelibalave noma le-GPS utawuhlale unayo kulo lonkhe loluhambo lwakho, ikucondzise kuyo yonkhe lendlela.

Ngendlela lefanako, liBhayibheli nalo lingakusita.

Lencwadzi letfolakala melula

• ingakunika sicondziso sekubhekana netinkinga ekuphileni

• ingakusita ukhone kutihlola wena kute ube ngumuntfu lokahle

• ingakusita ubone indlela longatfola ngayo kuphila lokuncono kakhulu

Nasisacala nje kufundza kukhuluma, sibuta imibuto.

• Kungani sibhakabhaka siluhlata?

• Takhiwe ngani tinkhanyeti?

Ngekuhamba kwesikhatsi siphindze sibute leminye imibuto mayelana nemhlaba.

• Kungani kwenteka tintfo letimbi?

• Kungani bantfu bafa?

Utawutsini nawungakhandza kutsi timphendvulo talemibuto betisolo tikhona eBhayibhelini?

Bantfu labanyenti batsi liBhayibheli ligcwele tinganekwane netindzaba letingasilo liciniso, baphindze batsi liphelelwe sikhatsi futsi alivakali kahle. Kodvwa ngilo yini liBhayibheli leliyinkinga nome nguloko bantfu labakuvile ngalo? Kungenteka yini kutsi batjelwe intfo lengasilo liciniso?

Cabanga nganasi sibonelo: Bantfu bacabanga kutsi liBhayibheli lifundzisa kutsi nguNkulunkulu lolawula lomhlaba. Kodvwa ingenteka njani intfo lenjalo? Phela lelive alisalawuleki! Ligcwele buhlungu nekuhlupheka, kugula nekufa, buphuya netinhlekelele. Kungenteka kanjani kutsi Nkulunkulu lonelutsandvo kube nguye lobangela konkhe loku?

Ungatsandza yini kuyitfola imphendvulo yalombuto? Kutakumangalisa kutfola loko liBhayibheli lelikushoko ngalona lolawula lomhlaba!

Kungenteka ubonile kutsi seluleko lositfole kulencwajana sivela eBhayibhelini. BoFakazi BaJehova bakholelwa kutsi liBhayibheli lingumtfombo wesicodziso lesingawetsemba. Sizatfu saloko sikutsi ‘liphefumulelwe nguNkulunkulu, lilungele kufundzisa, kusola nekucondzisa tintfo.’ (2 Thimothi 3:16, 17) Tinike sikhatsi sekuyifundza lencwadzi yakadzeni kodvwa lelusito lamuhla.