Asewucabange nganasi simo: Futhi unetinyanga letimbili kuphela abone Mancoba, kodvwa sewucabanga kutsi sewunesikhatsi lesidze amati. Bahlale babhalelana imilayeto, bacitsa ema-awa lamanyeti bakhuluma ngelucingo, futsi bakhululma kakhulu kangangekutsi sebaze bahlabane lulwimi! Kodvwa Mancoba sewufuna lokungetulu kwekumane nje bacoce.

Kulentinyanga letimbili letengcile, boMancoba naFuthi bebamane babambane ngetandla futsi bagcine ngekucabuzana nje kancane. Futhi akafuni kwenta lokungetulu kwaloko. Katsi futsi akafuni nekushiywa nguMancoba. Kute lomunye umuntfu lomenta ative amuhle kangaka futsi ayintsandvokati. Ngenhlitiyo utsi, ‘Ngaphandle nje kwaloko, mine naMancoba simane nje siyatsandzana . . .’

Nangabe vele sewukhulile kutsi nawe sewungagana futsi usesimeni saFuthi, yini wena lebewungayenta?

Nangabe ungawulaleli umtsetfo wemvelo wemandla ladvonsela tintfo phansi, utawubhekana nemiphumela lemibi. Kuyafana-ke nekungawulaleli umtsetfo wekutiphatsa, ‘kubalekela budlundlulu.’—1 Thesalonika 4:3.

Ngumiphi imiphumela yekungawulaleli lomyalo? LiBhayibheli litsi: “Loyo lowenta budlundlulu wona umtimba wakhe.” (1 Khorinte 6:18) Kuliciniso lelingakanani loku?

 Bacwaningi batfole kutsi linyenti lebantfu labasha liya ecansini lingakashadi bese kudzingeke kutsi libhekane nakunye kwaloku lokulandzelako.

• KUKHATSATEKA KAKHULU. Linyenti lebantfu labasebasha labaye ecansini basengakashadi batsi bayatisola ngekuhamba kwesikhatsi.

• KUNGASAMETSEMBI UMUNTFU LOLELE NAYE. Ngemuva kwekuya ecansini, nguloyo naloyo uyacabanga, ‘Ngiyatibuta kutsi ngubani lomunye lomuntfu lalala naye?’

• KUPHOCEKA. Emantfombatane lamanyenti atsandza umuntfu lotawavikela hhayi umuntfu lotawudlala ngawo. Kantsi bafana labanyenti abayitsandzi intfombatane lemane ivume kudlalwa bafana.

• Liphuzu lelimcoka: Nangabe utinikela ekuyeni ecansini ungakashadi, udzela intfo leligugu kakhulu futsi loko kuyakwehlisa. (Roma 1:24) Umtimba wakho uligugu kakhulu kutsi ungawenta intfo lenjena!

Khombisa kutsi unawo emandla ‘ekubalekela budlundlulu.’ (1 Thesalonika 4:3) Sekutawutsi ngelilanga loyawushada ngalo, nawe uye ecansini. Futsi utakujabulela kakhulu, ngaphandle kwekukhatsateka, kutisola, kanye nekutiva ungakaphephi lokuyimiphumela yekuya ecansini ungakashadi.—Taga 7:22, 23; 1 Khorinte 7:3

• Umuntfu lokutsandza sibili angakwentisa yini intfo letakulimata emtimbeni wakho naletakuphula emoyeni?

• Umuntfu lokucabangelako angakufaka yini esilingweni lesingamosha buhlobo lonabo naNkulunkulu?—Hebheru 13:4.