1-3. Yini Phetro layibona kulelilanga lebelimatasatasa, futsi yini leyenteka ebusuku?

PHETRO abesolo agwedla ngemandla futsi abukile njengobe kucala kukhanya. Lokukhanya lokuncane labekubona bekuvela ngasemphumalanga yini, futsi bekusho kutsi sekuyasa? Imisipha yemhlane wakhe kanye nemahlombe beseyibuhlungu ngenca yekugwedla sikhatsi lesidze. Umoya lobewuphephetelisa tinwele takhe wabangela kutsi Lwandle LwaseGalile lutfukutsele. Emagagasi labeshaya sikebhe sekudweba abesolo amtsela futsi ambandzisa. Kodvwa wachubeka agwedla.

² BoPhetro nalabo labehamba nabo bebashiye Jesu kulenye indzawo ngaselugwini. Ngalo lelo langa, bebabone Jesu asutsisa sicumbi sebantfu labatinkhulungwane ngetinkhwa nangetinhlanti letimbalwa. Ngesizatfu saloko, labantfu babese bafuna kubeka Jesu kutsi abe yinkhosi, kodvwa yena abengafuni kuba nencenye etindzabeni tepolitiki. Abefuna nekusita balandzeli bakhe kutsi nabo babe nesimo sengcondvo lesinjalo. Njengobe ahambisa lesicumbi sebantfu, watjela bafundzi bakhe kutsi bagibele esikebheni sabo bahambe baye ngesheya kwelwandle, yena wase uya entsabeni kute ayewuthantaza ayedvwa.​—Mak. 6:35-45; fundza Johane 6:14-17.

³ Ngesikhatsi bafundzi bacala luhambo lwabo, inyanga beseyicala kugcwala futsi seyisetulu; kodvwa nyalo beseyishobela ngasenshonalanga. Nobe kunjalo, bakhona kuhamba emakhilomitha lambalwa nje kuphela. Kushaya ngemandla kwemagagasi kanye nekuhhusha kwemoya kwenta kwaba matima kutsi bakhone kucoca. Ngako Phetro abesolo acabanga ngalokujulile.

4. Yini leyenteka kuPhetro lementa abe sibonelo lesihamba embili lokufanele sisilingise?

⁴ Kunyenti Phetro labengacabanga ngako. Wahlangana naJesu waseNazaretha  kwekucala eminyakeni lemibili ngaphambilini. Kunyenti labekufundzile kuye futsi abesatawufundza nalokunye. Kutimisela kwakhe kwenta njalo​—lokufaka ekhatsi kulwisana netintfo lebetimenta angabate aphindze esabe—​kumenta abe sibonelo lesihamba embili lokufanele sisilingise. Asesibone kutsi kungani kunjalo.

5, 6. Phetro abephila imphilo lenjani?

⁵ Phetro abengeke alikhohlwe lelilanga lacala kubona Jesu ngalo. Andreya umnakabo abecale wamtjela letindzaba letimangalisako, watsi: “Simtfolile Mesiya.” Ngalamavi, kuphila kwaPhetro kwacala kushintja, futsi bekungeke kuphindze kufane nangaphambili.​—Joh. 1:41.

⁶ Phetro abehlala eKhaphanawume, lokulidolobha leliselugwini lwasenyakatfo lelinelichibi lelinemanti lamnandzi lebelibitwa ngekutsi Lwandle LwaseGalile. Yena na-Andreya bebasebenta naJakobe kanye naJohane, lobekungemadvodzana aZebedi ebhizinisini lekudweba. Phetro abengahlali nemkakhe kuphela, kodvwa abephindze ahlale neninatala nemnakabo, Andreya. Kuze akwati kunakekela lomndeni wakhe bekudzingeka asebente kamatima, abe nemandla futsi asebentise likhono kulomsebenti wekudweba tinhlanti. Singase siwacabange emalanga lamanyenti lebebasebenta ngawo ebusuku​—bafaka emanethi abo emantini emkhatsini wetikebhe letimbili baphindze badvonse tinhlanti lebebatibambile kulolwandle. Singaphindze sicabange ngemalanga lebebasebenta ngawo emini kute bahlukanise tinhlanti futsi batitsengise, balungise emanethi abo baphindze bawageze.

7. Yini Phetro layiva ngaJesu, futsi kungani leti bekutindzaba letimnandzi?

⁷ LiBhayibheli lisitjela kutsi Andreya abengumfundzi waJohane uMbhabhatisi. Singaciniseka kutsi Phetro abewulalelisisa umlayeto waJohane labewutjelwa ngumnakabo. Ngalelinye lilanga, Andreya wabona Johane akhomba Jesu waseNazaretha atsi: “Nalo liWundlu laNkulunkulu!” Ngekushesha ngemuva kwaloko, Andreya waba ngumlandzeli waJesu futsi ngekujabula, watjela Phetro letindzaba letimnandzi letitsi: Mesiya sewufikile! (Joh. 1:35-40) Ngemuva kwekuhlubuka lokwenteka e-Edeni eminyakeni lengaba ngu-4 000 ngaphambili, Jehova Nkulunkulu abetsembise kutsi bekutawuvela umuntfu lokhetsekile labetawunika bantfu litsemba leliciniso. (Gen. 3:15) Andreya abesambonile loMsindzisi longuMesiya. Ngekushesha, Phetro wagijima kute naye ayewubona Jesu.

8. Belisho kutsini leligama Jesu laletsa Phetro, futsi kungani labanye balingabata?

⁸ Kudzimate kube ngulelo langa, Phetro bekatiwa ngekutsi nguSimoni nobe Simeyoni. Kodvwa Jesu wambuka watsi: “‘Wena unguSimoni indvodzana yaJohane; utawubitwa ngekutsi unguKhefase’ (lokusho kutsi Phetro).” (Joh. 1:42) Leligama lelitsi “Khefase” lilibito lelisho “lidvwala.” Kuyacaca kutsi lamavi aJesu abesiphrofetho.  Wabona kusengaphambili kutsi Phetro abetawufana nelidvwala​—anganyakatiseki, acine futsi etsenjwe balandzeli baKhristu. Phetro abetibona ngaleyo ndlela yini yena? Akubonakali kunjalo. Ngisho nalabanye labafundza tincwadzi temaVangeli lamuhla ababoni lokungako kuPhetro lebekumenta afane nelidvwala. Labanye batsi njengobe kuvetwa liBhayibheli kubonakala shengatsi abengakacini, ashintjashintja futsi angabata.

9. Yini Jehova neNdvodzana yakhe labayibukako kubantfu, futsi ucabanga kutsi kungani kufanele siwetsembe umbono wabo?

⁹ Phetro abewenta emaphutsa futsi naJesu abewabona. Kodvwa njengaBabe wakhe longuJehova, Jesu abehlale abuka lokuhle kubantfu. Wabona kutsi Phetro abenebuntfu lobuhle futsi wafuna tindlela tekumsita kute abuvete. Jehova neNdvodzana yakhe babuka lokuhle nakitsi lamuhla. Kungase kube matima kwetsemba kutsi kukhona lokuhle labangakutfola kitsi. Nobe kunjalo, kudzingeka siwetsembe umbono wabo futsi sikhombise kutsi siyafuna kuceceshwa nekubunjwa ngibo, njengobe Phetro abenjalo.​—Fundza 1 Johane 3:19, 20.

10. Yini lokungenteka kutsi Phetro wayibona, futsi waphindze wabuyela kuphi?

¹⁰ Mhlawumbe Phetro wahamba naJesu sikhashana eluhambeni lwakhe lwekushumayela. Kungenteka wambona Jesu enta simangaliso sakhe sekucala, lasenta edzilini lemshado eKhana ngesikhatsi agucula emanti aba liwayini. Lokubaluleke kakhulu kutsi weva umlayeto waJesu lomangalisako naloniketa litsemba lomayelana neMbuso waNkulunkulu. Nangetulu kwaloko, Phetro akazange achubeke ahamba naJesu, kodvwa wabuyela emuva ebhizinisini lakhe lekudweba. Ngemuva kwetinyanga letimbalwa, Phetro waphindze wahlangana naJesu futsi nyalo abemmema kutsi ahambe naye kuphila kwakhe konkhe.

11, 12. (a) Bekunjani ngesikhatsi Phetro asebenta kamatima ebusuku? (b) Ngumiphi imibuto lokungenteka Phetro watibuta yona njengobe abelalele Jesu?

¹¹ Phetro abesandza kusebenta kamatima busuku bonkhe futsi advumatekile. Badwebi bebaloku bafaka emanethi abo elwandle, kodvwa bangabambi lutfo. Kungenteka kutsi Phetro wasebentisa lonkhe lwati labenalo kanye nelikhono lakhe kute asite, etama kuya etindzaweni letehlukahlukene kulelichibi kute atfole kutsi tinhlanti tingakuphi. Mhlawumbe ngaletinye tikhatsi njengabo bonkhe badwebi, naye abefisa shengatsi kulamanti ladvungekile angabona kutsi tinhlanti tingakuphi futsi atente tibanjwe ngulamanethi. Kufanele kutsi imicabango lenjalo yamenta wacindzeteleka kakhulu. Loku abengakwenti nje kute atijabulise, kodvwa bekufanele ondle umndeni wakhe. Ekugcineni wefika elugwini angakaphatsi lutfo, futsi besekufanele ageze nemanethi. Ngako ngesikhatsi kufika Jesu, Phetro abematasatasa.

¹² Sicumbi sebantfu besitungelete Jesu futsi silalelisisa onkhe  emavi labewasho. Njengobe bekunebantfu labanyenti, Jesu wagibela esikebheni saPhetro wase umcela kutsi asikhweshise kancane elugwini. Ngesizatfu sekutsi livi lakhe beselivakala kahle, Jesu wacala kufundzisa lesicumbi. Phetro walalelisisa njengobe nalaba labanye bantfu lebebaselugwini bebenta njalo. Akazange adzinwe kulalela Jesu ngesikhatsi akhuluma ngesihloko lesibalulekile sekushumayela kwakhe​—lokunguMbuso waNkulunkulu. Bekutawuba lilungelo lelikhulu kusita Khristu ekumemeteleni lomlayeto loniketa litsemba endzaweni yonkhe! Kodvwa bekutawuba kuhlakanipha yini kucabanga ngalendlela? Phetro abetawondla njani umndeni wakhe? Kungenteka Phetro waphindze wacabanga ngemsebenti wakhe wekudweba labewente busuku bonkhe kodvwa wangabambi lutfo.​—Luk. 5:1-3.

13, 14. Ngusiphi simangaliso Jesu lasentela Phetro, futsi Phetro wativa njani?

¹³ Nasacedzile Jesu kukhuluma, watsi kuPhetro: “Asewuchubekele lakushona khona, bese nijika emanethi enu lapho.” Phetro abengabata, ngako watsi: “Mfundzisi, sikhandleke busuku bonkhe lapha futsi sangabambi lutfo, kodvwa ngobe sekusho wena, ngitawajika lamanethi.” Phetro abesandza kugeza emanethi akhe. Ngako kufanele kutsi intfo yekugcina labefisa kuyenta kuphindze awehlisele elwandle, ikakhulukati njengobe tinhlanti besetisukile. Nobe kunjalo walalela, futsi kungenteka kutsi wakhweba labantfu labehamba nabo lebebakulesinye sikebhe watsi ababalandzele.​—Luk. 5:4, 5.

¹⁴ Njengobe Phetro ajika emanethi elwandle, waweva advonseka kalukhuni. Ngako wadvonsa ngemandla, futsi njengobe advonsa wabona incumbi yetinhlanti tigcwele emanethini. Amangele, wakhweba lamadvodza labekulesinye sikebhe kutsi ete atewumsita. Atsi nawefika, kwawakhanyela kutsi letinhlanti betingeke tenele esikebheni sinye. Ngesizatfu saloko, batigcwalisa kuto totimbili, kodvwa betitinyenti kakhulu kangangekutsi letikebhe tacala kucwila ngenca yekusindvwa. Phetro wamangala kakhulu. Abeke wawabona emandla aKhristu ngaphambilini, kodvwa kuloku lesimangaliso besitsintsa yena. Embikwakhe bekunemuntfu lonemandla ekwenta kutsi tinhlanti tibanjwe ngemanethi. Ngesizatfu saloko, Phetro wacala kwesaba. Waguca ngemadvolo watsi: “Angikafaneli kuba sedvute nawe Nkhosi, ngobe ngingumuntfu lonesono.” Bekungenteka yini kutsi Phetro akufanelekele kutihlanganisa neMuntfu loneligunya lekusebentisa emandla aNkulunkulu ngalendlela?​—Fundza Lukha 5:6-9.

15. Jesu wamfundzisa njani Phetro kutsi bekute sidzingo sekutsi angabate futsi esabe?

¹⁵ Jesu waphendvula ngemusa watsi: “Ungesabi. Kusukela  lamuhla sewutawuba ngumdwebi webantfu.” (Luk. 5:10, 11) Bekungakafaneli angabate nobe esabe. Kungabata kwaPhetro kulendzaba yekudweba tinhlanti bekungakasekelwa ndzawo, futsi bekute sizatfu sekutsi esabe ngenca yemaphutsa akhe kanye nekutiva angafaneleki. Bekunemsebenti lomkhulu Jesu lebekufanele awente, lokungumsebenti lobewutawushintja likusasa lebantfu. Abekhonta Nkulunkulu ‘lotsetselela ngenkhululeko.’ (Isa. 55:7) Jehova abetawutinakekela tidzingo taPhetro tenyama kanye naleto letitsintsa buhlobo bakhe naye.​—Mat. 6:33.

16. Ngusiphi sinyatselo lesatsatfwa nguPhetro, Jakobe kanye naJohane nababitwa nguJesu, futsi kungani lesi bekusincumo lesincono kakhulu lebebangasenta?

¹⁶ Phetro watsatsa sinyatselo ngekushesha njengobe kwenta boJakobe naJohane. “Batikhweshisela elugwini letikebhe, futsi bashiya konkhe bamlandzela.” (Luk. 5:11) Ngekwenta njalo, Phetro abebonisa  kuba nekukholwa kuJesu nakuLoyo lowamtfuma. Lesi bekusincumo lesincono kakhulu kwendlula tonkhe labengatenta. Lamuhla, emaKhristu lancoba kungabata kanye nekwesaba kute ente umsebenti waNkulunkulu nawo asuke abonisa kukholwa. Jehova uhlale abanakekela labo labametsembako.​—Hla. 22:4, 5.

17. Ngutiphi tintfo Phetro labetikhumbula lebetenteke eminyakeni lemibili leyengcile ahlangene naJesu?

¹⁷ Ngemuva kweminyaka lengaba mibili ahlangana naJesu, Phetro abegibele sikebhe ebusuku lobabunemoya eLwandle LwaseGalile njengobe kuvetiwe ekucaleni kwalesehluko. Ngeke siciniseke ngekutsi yini labeyicabanga ngaleso sikhatsi, ngobe bekukunyenti labengacabanga ngako. Jesu abelaphe maketala waPhetro, futsi abetfule neNshumayelo yaseNtsabeni. Kanyenti ekufundziseni kwakhe nasetimangalisweni labetenta, Jesu waveta kutsi abenguMesiya, Lokhetsiwe waJehova. Njengobe tinyanga tihamba, Phetro abesakwati kulawula umkhuba wakhe wekusheshe afikelwe kwesaba kanye nekungabata. Jesu abemkhetsile kutsi abe ngulomunye webaphostoli labangu-12. Nobe kunjalo, Phetro abengakakuncobi ngalokuphelele kwesaba nekungabata kwakhe, njengobe abetawubona madvutane.

18, 19. (a) Chaza loko Phetro lakubona ngesikhatsi aseLwandle LwaseGalile. (b) Yini Jesu layenta ngaloko lokwacelwa nguPhetro?

¹⁸ Emkhatsini wensimbi yesitsatfu ekuseni kanye nekuphuma kwelilanga, Phetro wayekela kugwedla sikebhe futsi wahlala wacondza. Ngale kwemagagasi bekubonakala intfo letsite lehambako. Bekungemagagasi yini lawo, akhanyiswa yinyeti? Cha, lentfo beyitse tfwi futsi ihamba icondzile. Bekungumuntfu ahamba etikwemanti! Njengobe abesondzela, bekubonakala shengatsi ucondze kubo. Ngenca yekwesaba, bafundzi bacabanga kutsi bekungumbono. Lomuntfu watsi: “Manini sibindzi, ningesabi, ngimi lo!” Lomuntfu bekunguJesu!​—Mat. 14:25-28.

¹⁹ Phetro waphendvula watsi: “Nkhosi, nangabe kunguwe ngitjele nami ngite lapho kuwe ngihamba etikwemanti.” Ekucaleni Phetro waba nesibindzi, futsi njengobe abejabulile ngenca yekubona lesimangaliso wafisa kucinisa kukholwa kwakhe, naye abefuna kubona emandla aJesu. Ngemusa, Jesu watsi akete. Phetro wesuka kulesikebhe wehlela etikwalamanti labenyakata. Asewumcabange kutsi wativa njani ngesikhatsi tinyawo takhe titsintsa lamanti futsi ema etikwawo. Kufanele kutsi abemangele kakhulu ngesikhatsi ahamba aya ngakuJesu. Nobe kunjalo, kwabese sekwenteka lenye intfo.​—Fundza Matewu 14:29.

20. (a) Yini leyaphatamisa Phetro, futsi loku kwaba namuphi umphumela? (b) Ngusiphi sifundvo Jesu lasifundzisa Phetro?

²⁰ Bekudzingeka kutsi Phetro ahlale anake Jesu. Njengobe Jesu abesebentisa emandla aJehova, nguye lebekenta kutsi Phetro akwati  kuhamba etikwemagagasi labepheshulwa ngumoya. Jesu wenta loko ngenca yekukholwa Phetro labenako kuye. Kepha Phetro waphatamiseka. LiBhayibheli litsi: “Watsi nakabona lesiphepho wefikelwa kwesaba.” Wabuka onkhe emagagasi labeshaya lesikebhe, labemtsela, futsi labepheshulwa ngumoya wabese ucala kushaywa luvalo. Kungenteka kutsi watibona asacwila kulolwandle futsi amita. Njengobe abesatfuke kakhulu, kukholwa kwakhe kwancipha. Lomuntfu labebitwe ngekutsi Lidvwala ngenca yekutsi abebonakala angakhona kunganyakatiswa, wacala kucwila ngenca yekuba bete kukholwa lokucinile. Phetro abekwati kuhlamba, kodvwa loko bekungeke kumsite nyalo. Wamemeta watsi: “Nkhosi, ngisindzise!” Jesu wambamba wamphakamisa. Ngesikhatsi Jesu solo eme ngetinyawo kulamanti, wamtjela sifundvo lesibalulekile watsi: “Wena lonekukholwa lokuncane, yini lekwenta ungabate?”​—Mat. 14:30, 31.

21. Kungani kungabata kuyingoti, futsi singalwisana njani nako?

²¹ Ligama lelitsi ‘kungabata’ libaluleke kakhulu. Kungabata kungaba nemandla futsi kumlimate umuntfu. Nangabe sikuvumela, kungacedza kukholwa kwetfu, kwente buhlobo betfu naNkulunkulu bube butsakatsaka. Kufanele silwisane kamatima nekungabata. Singakwenta njani loko? Ngekutsi sinake tintfo letifanele. Nangabe sihlala sicabanga ngetintfo letisetfusako, letisidvumatako kanye naletiphatamisa buhlobo betfu naJehova neNdvodzana yakhe, kungabata kwetfu kutawukhula. Nasihlale sinake Jehova neNdvodzana yakhe, sinake loko labakwentele bantfu lababatsandzako, loko lababentela kona nyalo kanye naloko labasatawubentela kona, singakuncoba kungabata lokungasilimata.

22. Kungani kufanele sikulingise kukholwa kwaPhetro?

²² Njengobe Phetro abelandzela Jesu baya esikebheni, wabona lesivunguvungu siphela. Kwaba nekuthula eLwandle LwaseGalile. Phetro kanye nalalabanye bafundzi batsi: “Wena ungiyo mbamba iNdvodzana yaNkulunkulu.” (Mat. 14:33) Njengobe sekusa, kufanele kutsi inhlitiyo yaPhetro yagcwala injabulo. Abefundzile kutsi akukafaneli avumele kwesaba kumente angabate Jehova naJesu. Kona bewusemkhulu umsebenti lebekusafanele awente ngembikwekutsi abe ngumKhristu lofana nelidvwala lowashiwo nguJesu. Kodvwa abetimisele kuchubeka etama, futsi achubeke akhula. Nawe utimisele ngendlela lefanako yini? Utawutfola kutsi kufanele ukulingise kukholwa kwaPhetro.