1, 2. (a) Usuke umati kahle yini umuntfu lodvumile nawati libito lakhe nje kuphela? Chaza. (b) Yini bantfu labayishoko ngaJesu?

EMHLABENI kunebantfu labanyenti labadvumile. Kungenteka kunemuntfu lodvumile lowati ligama lakhe. Kepha kumane nje wati ligama lakhe akusho kutsi sewumati kahle. Akusho futsi nekutsi sewati konkhe ngekuphila kwakhe nekutsi ungumuntfu lonjani.

² Mhlawumbe sewuke weva ngaJesu Khristu ngisho nome aphila emhlabeni eminyakeni lengetulu kwalengu-2 000 leyendlulile. Kodvwa bantfu labanyenti abati kutsi Jesu abengumuntfu lonjani. Labanye bamane batsi abengumuntfu lolungile, labanye batsi abengumphrofethi kantsi labanye bakholelwa kutsi unguNkulunkulu. Wena ucabangani?​—Fundza liphuzu 12 ngephasi kwesihloko lesitsi Imininingwane Lesekugcineni.

3. Kubaluleke ngani kutsi wati Nkulunkulu Jehova kanye naJesu Khristu?

³ Kubaluleke kakhulu kutsi simati kahle Jesu. Sisho ngani? LiBhayibheli litsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Nangabe ulati liciniso ngaJehova nangaJesu ungakutfola kuphila lokuphakadze emhlabeni lolipharadisi. (Johane 14:6) Ngetulu kwaloko, kumati kahle Jesu kutawuphindze kukusite uphilisane kahle nalabanye futsi ubaphatse kahle ngoba Jesu usibonelo lesihle kakhulu kuloku. (Johane 13:34, 35) Esehlukweni sekucala, sifundze  loko liBhayibheli lelikufundzisako ngaNkulunkulu. Nyalo-ke sesitawufundza ngaloko liBhayibheli lelikufundzisako ngaJesu.

4. Emagama latsi “Mesiya” ‘naKhristu’ asho kutsini?

⁴ Kusasele iminyaka leminyenti kutsi kutalwe Jesu, Jehova wetsembisa eBhayibhelini kutsi abetawutfumela Mesiya nobe Khristu. Ligama lelitsi “Mesiya” livela elulwimini lwesiHebheru kantsi lelitsi “Khristu” lona livela kulesiGriki. Omabili lamagama asho kutsi Nkulunkulu abetawukhetsa Mesiya lotsenjisiwe aphindze amnike sikhundla lesikhetsekile. Mesiya utawutifeza tonkhe tetsembiso taNkulunkulu. Jesu angakusita ngisho nanyalo. Ngalesikhatsi Jesu asengakatalwa, bantfu labanyenti bebatibuta kutsi: ‘Ngubani lotawuba nguMesiya?’

5. Bafundzi baJesu bebakukholelwa yini kutsi abenguMesiya?

⁵ Bafundzi baJesu bebangangabati kutsi Jesu nguMesiya. (Johane 1:41) Sibonelo saloko kutsi Simoni Phetro watsi kuJesu: “UnguKhristu.” (Matewu 16:16) Yini lesicinisekisa kutsi Jesu unguMesiya?

6. Jehova wabasita njani bantfu labacotfo babone Mesiya?

⁶ Kusesele iminyaka kutsi kutalwe Jesu, baphrofethi baNkulunkulu babhala imininingwane leminyenti lebeyitawusita bantfu babone Mesiya. Bekutabasita njani loko? Ake sitsi ucelwa kutsi uye esiteshini semabhasi lesiphitsitelako uyohlangabeta umuntfu longazange sewumbone. Bewungamtfola melula lomuntfu nangabe bekungaba khona lokuchazela kahle kutsi lomuntfu unjani. Ngendlela lefanako, Jehova wasebentisa baphrofethi bakhe kute asitjele loko lobekutawentiwa nguMesiya naloko lobekutakwenteka kuye. Kufezeka kwaleto tiphrofetho kusita bantfu labacotfo babone kutsi Jesu unguMesiya.

7. Ngutiphi tiphrofetho letimbili letifakazela kutsi Jesu unguMesiya?

 ⁷ Ase sicoce ngaletimbili taletiphrofetho. Sekucala, kwatsi kusesele iminyaka lengu-700 kutsi Jesu atalwe, Mikha waphrofetha kutsi Jesu abetawutalelwa edolobheni lelincane, iBhetlehema. (Mikha 5:2) Futsi ngulapho kanye Jesu atalelwa khona! (Matewu 2:1, 3-9) Sesibili, Danyela waphrofetha kutsi Mesiya abetawuvela ngemnyaka wanga-29 C.E. (Danyela 9:25) Leti timane nje tinguletimbili tetiphrofetho letifakazela kutsi Jesu unguMesiya lowetsenjisiwe.​—Fundza liphuzu 13 ngephasi kwesihloko lesitsi Imininingwane Lesekugcineni.

8, 9. Yini leyenteka nakubhajatiswa Jesu lokwafakazela kutsi unguMesiya?

⁸ Jehova ukwente kwaba sebaleni kutsi Jesu unguMesiya. Nkulunkulu wetsembisa Johane uMbhabhatisi kutsi abetamnika luphawu lebelitamenta abone kutsi ngubani Mesiya. Johane walibona loluphawu ngalesikhatsi Jesu eta kuye kuze ambhabhatise eMfuleni iJordane nga-29 C.E. LiBhayibheli lisitjela nganaku lokwenteka: “Ngemuva kwekubhajatiswa, Jesu watsi nakaphuma emantini lizulu lavuleka, kwase kwehlela etikwakhe umoya waNkulunkulu unjengelituba. Kwaphindze kwevakala livi lelivela ezulwini litsi: ‘Lena yiNdvodzana yami letsandzekako, ngiyemukele.’” (Matewu 3:16, 17) Ngalesikhatsi Johane abona loluphawu aphindze eva lelivi, kwamkhanyela kutsi Jesu unguMesiya. (Johane 1:32-34) Ngalelolanga Jesu waba nguMesiya ngobe Jehova watfululela  umoya longcwele kuye. Nkulunkulu abekhetse yena kutsi abenguMholi neNkhosi.​—Isaya 55:4.

⁹ Tiphrofetho teliBhayibheli, emavi aJehova kanye neluphawu laluniketa ngesikhatsi Jesu abhajatiswa kufakazela kutsi Jesu unguMesiya. Kodvwa wavelaphi Jesu futsi bekangumuntfu lonjani? Ase sihlole loko lokushiwo liBhayibheli.

10. Lifundzisani liBhayibheli ngekuphila kwaJesu asengaketi emhlabeni?

¹⁰ LiBhayibheli lifundzisa kutsi Jesu waphila ezulwini sikhatsi lesidze asengaketi emhlabeni. Mikha watsi Mesiya ‘bekavele akhona kwasekucaleni.’ (Mikha 5:2) Jesu washo kanyenti kutsi bekaphile ezulwini asengakatalwa njengemuntfu emhlabeni. (Fundza Johane 3:13; 6:38, 62; 17:4, 5.) Jehova naJesu bebangematse nelulwimi ngisho nangesikhatsi Jesu asengaketi emhlabeni.

11. Yini leyenta Jesu abaluleke kakhulu kuJehova?

¹¹ Jesu ubaluleke kakhulu kuJehova. Yini lementa abaluleke? Kutsi Nkulunkulu wamdala kucala asengakadali lokunye. Ngaleso sizatfu, Jesu ubitwa ngekutsi ‘ulitibulo layo yonkhe indalo.’ * (Kholose 1:15) Lokunye lokwenta Jesu abaluleke kutsi nguye kuphela lowadalwa nguJehova matfupha. Kungako abitwa ngekutsi ‘uyiNdvodzana yakhe lekuphela kwayo.’ (Johane 3:16) Jesu nguye kuphela lowasetjentiswa nguJehova ekudaleni konkhe lokukhona. (Kholose 1:16) NguJesu kuphela lobitwa ngekutsi ‘nguLivi’ ngobe Jehova wamsebentisa kuze anikete bantfu netingilosi imilayeto kanye neticondziso.​—Johane 1:14.

12. Sati ngani kutsi Jesu naNkulunkulu abasuye umuntfu munye?

¹² Labanye bantfu bakholelwa kutsi Jesu naNkulunkulu ngumuntfu munye. Kodvwa loko akusiko lokufundziswa liBhayibheli. Lona litsi Jesu wadalwa, lokusho kutsi unesicalo, kodvwa Jehova lowadala tonkhe tintfo ute sicalo. (Tihlabelelo 90:2) Nanobe Jesu ayiNdvodzana yaNkulunkulu,  akazange akucabange kuba nguNkulunkulu. LiBhayibheli lifundzisa kutsi Babe mkhulu kuneNdvodzana. (Fundza Johane 14:28; 1 Khorinte 11:3) Jehova nguye kuphela ‘longuNkulunkulu Somandla.’ (Genesisi 17:1) Kuyo yonkhe indalo, nguye yedvwa lomkhulu kakhulu nalonemandla lamakhulu kakhulu.​—Fundza liphuzu 14 ngephasi kwesihloko lesitsi Imininingwane Lesekugcineni.

13. LiBhayibheli lisho ngani kutsi Jesu ‘ungumfanekiso waNkulunkulu longabonakali’?

¹³ Jehova naJesu bebasebenta ndzawonye tigidzigidzi teminyaka asengakadalwa emazulu nemhlaba. Asingabati kutsi bebatsandzana kakhulu! (Johane 3:35; 14:31) Jesu wamfuta babe wakhe ngebuntfu bakhe kangangekutsi liBhayibheli lize litsi ‘ungumfanekiso waNkulunkulu longabonakali.’​—Kholose 1:15.

14. Kwenteka kanjani kutsi iNdvodzana yaNkulunkulu italwe ingumuntfu?

¹⁴ INdvodzana yaNkulunkulu beyite inkinga yekusuka ezulwini italwe emhlabeni ingumuntfu. Kwenteka njani loko? Ngesimangaliso, Jehova wendlulisela kuphila kweNdvodzana yakhe esinyeni sentfombi-ntfo lenguMariya. Ngaleso sizatfu, bekute sidzingo sekutsi Jesu abe nababe longumuntfu. Mariya wabeleka indvodzana lebeyite sono, wayetsa ligama watsi nguJesu.​—Lukha 1:30-35.

15. Yini lengakusita umati kahle Jehova?

¹⁵ Nawufundza liBhayibheli encwadzini yaMatewu, yaMakho, yaLukha kanye neyaJohane utawutfola tintfo letinyenti ngekuphila kwaJesu, kanye nangebuntfu bakhe. Letincwadzi tibitwa ngekutsi ngemaVangeli. Lotakufundza, kutakusita umati kahle Nkulunkulu ngoba Jesu abenebuntfu lobufana nebababe wakhe. Ngiko Jesu  atsi: “Loyo longibonile mine umbonile naBabe.”​—Johane 14:9.

16. Yini Jesu labeyifundzisa bantfu? Lebekufundziswa nguJesu bekuvela kubani?

¹⁶ Bantfu labanyenti Jesu bebambita ngekutsi “Rabi” (lokusho kutsi Mfundzisi). (Johane 1:38; 13:13) Intfo lebaluleke kakhulu labafundzisa yona, “tindzaba letimnandzi teMbuso” waNkulunkulu. Uyini loMbuso? Unguhulumende waNkulunkulu losezulwini lotawubusa wonkhe umhlaba futsi utawuletsa tibusiso kubo bonkhe bantfu labalalela Nkulunkulu. (Matewu 4:23) Konkhe lokwafundziswa nguJesu bekuvela kuJehova. Jesu watsi: “Loko lengikufundzisako akusiko kwami, kodvwa kwaloyo longitfumile.” (Johane 7:16) Jesu bekasati sifiso saJehova sekutsi bantfu bative tindzaba letimnandzi letimayelana neMbuso waNkulunkulu lotawubusa wonkhe umhlaba.

17. Jesu bekafundzisela kuphi? Yini leyamenta watimisela wafundzisa labanye?

¹⁷ Jesu bekafundzisela kuphi? Noma ngukuphi lapho bekatfola bantfu khona. Bekafundzisela emaphandleni ngisho nasemadolobheni, emimangweni, etimakethe, etindzaweni labekukhontelwa kuto Nkulunkulu nasemakhaya. Bekangagadzi kutsi bantfu bete kuye, bekusuka yena aye kubo. (Makho 6:56; Lukha 19:5, 6) Jesu bekatimisela asebentisa sikhatsi sakhe lesinyenti kanye nemandla afundzisa bantfu. Bekakwentelani loko? Bekati kutsi nguloko Nkulunkulu labefuna akwente futsi bekahlale amlalela Babe wakhe. (Johane 8:28, 29) Lesinye sizatfu lesabangela Jesu washumayela kutsi bekavelana nebantfu. (Fundza Matewu 9:35, 36.) Bekabona kutsi bantfu bebangafundziswa liciniso ngaNkulunkulu nangeMbuso wakhe. Ngako bekafisa kusita bantfu labanyenti kutsi bative tindzaba letimnandzi.

18. Yini loyitsandza kakhulu ngaJesu?

 ¹⁸ Jesu bekabatsandza bantfu aphindze abanakekela. Bekanemusa futsi kumelula kukhuluma naye. Ngisho nebantfwana bebatsandza kuba naye. (Makho 10:13-16) Jesu abengakhetsi. Bekakwenyanya kukhohlakala kanye nekungalandzelwa kwemtsetfo. (Matewu 21:12, 13) Waphila ngesikhatsi lapho emalungelo ebantfu besifazane bekamancane khona futsi bangahlonishwa. Noma kunjalo Jesu abebatsatsa njengalababalulekile futsi abahlonipha. (Johane 4:9, 27) Jesu abengumuntfu lotfobekile. Sibonelo saloko kutsi ngalelinye lilanga kusihlwa wageza tinyawo tebaphostoli bakhe, lokuyintfo lebeyivame kwentiwa sisebenti.​—Johane 13:2-5, 12-17.

19. Ngusiphi sibonelo lesikhombisa kutsi Jesu bekakwati lebekudzingwa bantfu futsi anesifiso sekubasita?

¹⁹ Jesu bekakwati kahle lebekudzingwa bantfu futsi bekafuna kubasita. Loko kwabonakala kahle ngesikhatsi asebentisa emandla lavela kuNkulunkulu kute elaphe bantfu ngendlela lemangalisako. (Matewu 14:14) Sibonelo saloko kutsi, indvodza lebeyiphetfwe bulephelo yaya kuJesu yatsi: “Nawutsandza ungangenta ngihlanteke.” Buhlungu kanye nekuhlupheka kwalendvodza kwamtsintsa kakhulu Jesu kangangekutsi wayivela buhlungu futsi wafisa kuyisita. Jesu welula sandla sakhe, watsintsa lendvodza wase utsi: “Ngiyatsandza, hlanteka.” Lendvodza lebeyigula yelapheka! (Makho 1:40-42) Ase ucabange kutsi lendvodza yativa njani?

20, 21. Sisho ngani kutsi Jesu usibonelo lesihamba embili sekulalela Nkulunkulu?

²⁰ Jesu usibonelo lesihamba embili sekulalela Nkulunkulu. Wetsembeka kuBabe wakhe ngato tonkhe tikhatsi ngisho nangesikhatsi titsa takhe timhlupha. Nasi  sibonelo, Jesu akazange one ngesikhatsi Sathane amlinga. (Matewu 4:1-11) Wachubeka enta umsebenti waNkulunkulu ngisho nome labanye emndenini wakubo bebangakholwa kutsi unguMesiya futsi bebatsi “usangene ingcondvo.” (Makho 3:21) Jesu wahlala etsembekile kuNkulunkulu futsi akazange etame kutilimata titsa takhe ngesikhatsi timphatsa kabi.​—1 Phetro 2:21-23.

²¹ Jesu wachubeka etsembekile kuJehova ngisho nobe ahlukunyetwa kabuhlungu waze wafa ngendlela lenelunya. (Fundza Filiphi 2:8.) Cabanga nje ngebuhlungu labubeketelela ngelilanga lafa ngalo. Waboshwa, bofakazi ecaleni lakhe bakhuluma emanga batsi uyahlambalata, emajaji lakhohlakele wona amlahla ngelicala, ticumbi tebantfu tamhleka futsi emasotja amhlupha aphindze  ambetsela elugodvweni. Nakafa wakhala ngelivi lelikhulu watsi: “Sekufezekile!” (Johane 19:30) Nasekuphele emalanga lamatsatfu Jesu afile, Jehova wamvusa wamnika umtimba wemoya. (1 Phetro 3:18) Ngemuva kwemaviki lambalwa Jesu wabuyela ezulwini, “wabese uhlala ngesekudla saNkulunkulu,” wamela sikhatsi sekutsi Nkulunkulu ambeke abe yiNkhosi.​—Hebheru 10:12, 13.

22. Sivulekelwe nguliphi litfuba lamuhla ngenca yekutsi Jesu wetsembeka kuNkulunkulu?

²² Ngenca yekutsi Jesu wetsembeka kuNkulunkulu, sonkhe lamuhla sivulekelwe litfuba lekuphila phakadze emhlabeni lolipharadisi, njengobe Jehova bekahlosile. Esehlukweni lesilandzelako sitawucoca ngekutsi kufa kwaJesu kutasisita njani kutsi sitfole kuphila lokuphakadze.