SIFUNDVO 10
Ungayibona Njani Inkholo Yeliciniso?
1. Yinye kuphela yini inkholo yeliciniso?
“Caphelani baphrofethi bemanga.”—MATEWU 7:15.
Jesu wabafundzisa balandzeli bakhe ngenkholo leyodvwa, lokuyinkholo yeliciniso. Ifanana nendlela leholela ekuphileni lokuphakadze. Jesu watsi: “Bantfu labayitfolako bambalwa.” (Matewu 7:14) Nkulunkulu wemukela kuphela kukhonta lokusekelwe eVini lakhe leliciniso. Tonkhe tikhonti teliciniso tisenkholweni yinye.—Fundza Johane 4:23, 24; 14:6; Efesu 4:4, 5.
2. Jesu watsini ngemaKhristu emanga?
“Bavuma ngemlomo kutsi bayamati Nkulunkulu, kepha ngetento tabo bayamphika.”—THIT. 1:16.
Jesu wecwayisa ngekutsi baphrofethi bemanga bebayawukonakalisa buKhristu. Ngaphandle, babonakala shengatsi batikhonti teliciniso. Emasontfo abo atsi angemaKhristu. Kodvwa ungakwati kukubona loko labangiko mbamba. Ungakubona njani? Yinkholo yeliciniso kuphela lenemaKhristu languwonawona futsi lanebuntfu lobuhle kanye nalaphila ngendlela lengiyo.—Fundza Matewu 7:13-23.
3. Ungatibona njani tikhonti teliciniso?
Asewucabange nganati timphawu letisihlanu labonakala ngato:
-
Tikhonti teliciniso tiyalihlonipha liBhayibheli njengeliVi laNkulunkulu. Tetama kuphila ngetimiso talo. Inkholo yeliciniso yehlukile etinkholweni letisekelwe emibonweni yebantfu. (Matewu 15:7-9) Tikhonti teliciniso tiyakwenta loko letikushumayelako.—Fundza Johane 17:17; 2 Thimothi 3:16, 17.
-
Balandzeli baJesu beliciniso bayalihlonipha libito laNkulunkulu lelitsi Jehova. Jesu wakhombisa kutsi uyalihlonipha libito laNkulunkulu ngekutsi alente latiwe. Wasita bantfu kutsi balati futsi wabafundzisa nekutsi bathandazele kutsi libito laNkulunkulu lingcweliswe. (Matewu 6:9) Lapho uhlala khona, ikhona yini inkholo leyenta libito laNkulunkulu latiwe?—Fundza Johane 17:26; Roma 10:13, 14.
-
EmaKhristu eliciniso ashumayela ngeMbuso waNkulunkulu. Nkulunkulu watfuma Jesu kutsi atewushumayela tindzaba letimnandzi ngeMbuso. UMbuso waNkulunkulu ukuphela kwelitsemba lebantfu. Jesu wachubeka akhuluma ngawo kwadzimate kwefika lilanga lakhe lekufa. (Lukha 4:43; 8:1; 23:42, 43) Washo kutsi balandzeli bakhe bebayawushumayela ngawo loMbuso. Nangabe umuntfu lotsite eta kuwe futsi akhulume ngeMbuso waNkulunkulu, ucabanga kutsi usuke akuyiphi inkholo?—Fundza Matewu 24:14.
-
Balandzeli baJesu abasiyo incenye yalelive lelibi. Balandzeli baJesu ungababona ngekutsi abatingeni tindzaba tepolitiki nobe tembangave. (Johane 17:16; 18:36) Futsi abayilingisi imikhuba lemibi yalelive kanye nendlela yalo yekucabanga.—Fundza Jakobe 4:4.
-
EmaKhristu eliciniso atsandzana ngelizinga lelisetulu kakhulu. Afundza eVini laNkulunkulu kutsi kufanele ahloniphe tonkhe tinhlanga tebantfu. Nanobe inkholo yemanga itisekela kakhulu timphi temave, tikhonti teliciniso atifuni kwenta njalo. (Mikha 4:1-3) Esikhundleni saloko, emaKhristu eliciniso asebentisa sikhatsi sawo ngekutidzela kanye netintfo tawo tekutiphilisa kute akhutsate labanye futsi abasite.—Fundza Johane 13:34, 35; 1 Johane 4:20.
4. Sewungakhona yini kubona inkholo yeliciniso?
Nguyiphi inkholo lefundzisa tintfo letiseVini laNkulunkulu; lehlonipha libito laNkulunkulu; futsi leshumayela ngeMbuso waNkulunkulu kutsi ngiwo kuphela lolitsemba lebantfu? Nguliphi licembu lebantfu lelitsandzanako futsi lelingatingeneli timphi? Likhona yini lolicabangako?—Fundza 1 Johane 3:10-12.
