Litsini LiBhayibheli Ngekuzila Kudla?

DLALA

Lokushiwo liBhayibheli

Ngesikhatsi kubhalwa liBhayibheli Nkulunkulu bekakwemukela kuzila kudla nangabe kwentiwa ngesisusa lesihle. Nangabe kwentiwa ngetisusa letikabi, bekangakwemukeli. Noma kunjalo, liBhayibheli alibashayeli bantfu umtsetfo wekutsi bazile kudla nobe bangakuzili.

Bantfu lokukhulunywa ngabo eBhayibhelini bebazila kudla nakwentenjani?

Nabafuna lusito nesicondziso lesivela kuNkulunkulu. Bantfu bebazila kudla nabaya eJerusalema kuze bakhombise kutsi bebacela lusito lwaNkulunkulu ngalokusuka enhlitiyweni. (Ezra 8:21-23) Ngaletinye tikhatsi boPawula naBhanabasi bebazila kudla nabakhetsa emadvodza lamadzala elibandla.—Imisebenti 14:23.
Nangabe bafuna kwenta intsandvo yaNkulunkulu. Ngemuva kwekubhajatiswa, Jesu wazila kudla emalanga langu-40 kuze atilungiselele kwenta umsebenti wekushumayela.—Lukha 4:1, 2.
Nangabe bakhombisa kutsi baphendvukile etonweni tabo. Nkulunkulu watfuma umphrofethi Joweli esiveni sema-Israyeli labekangakatsembeki watsi: ‘Buyani kimi ngenhlitiyo yenu yonkhe, ngekuzila, nangekukhala kanye nangekulila.’—Joweli 2:12-15.
Nangabe bagubha Lilanga Lekubuyisana. Emtsetfweni Nkulunkulu lawunika sive saka-Israyeli, bekunemyalo wekutsi bekufanele bazile kudla njalo ngemnyaka ngeLilanga Lekubuyisana. a (Levithikhusi 16:29-31) Kuzila kudla ngalelilanga lalomkhosi bekuyintfo lefanele ngobe beyikhumbuta ema-Israyeli kutsi anesono futsi adzinga kutsetselelwa nguNkulunkulu.

Ngutiphi letinye tetisusa letikabi tekuzila kudla?

Kuze ujabulise bantfu. Jesu wafundzisa kutsi kuzila kudla kufanele kube sincumo semuntfu ngamunye futsi kumelwe asente ngasense abonwa nguNkulunkulu kuphela.—Matewu 6:16-18.
Kuze utente umuntfu lolungile. Kuzila kudla akwenti umuntfu abonakale alungile nobe akholwa kakhulu kunalabanye.—Lukha 18:9-14.
Kuzama kuvimba umkhuba wekutitika ngesono. (Isaya 58:3, 4) Nkulunkulu bekamukela kuzila kudla kuphela nangabe bantfu bamlalela futsi baphendvuka etonweni tabo ngalokusuka enhlitiyweni.
Ngobe ulandzela umtsetfo welisontfo. (Isaya 58:5-7) Nkulunkulu ufanana nemtali lojabulako nangabe bantfwana bakhe bamtsandza ngalokusuka enhlitiyweni hhayi ngekuphocelelwa.

Kufanele yini emaKhristu azile kudla?

Cha, akukafanele. Nanobe Nkulunkulu abetjele ema-Israyeli kutsi azile kudla ngeLilanga Lekubuyisana, loko wakususa ngalokuphelele ngemuva kwekufa kwaJesu lokwasusa tono tebantfu labaphendvukayo. (Hebheru 9:24-26; 1 Phetro 3:18) EmaKhristu akekho ngephansi kweMtsetfo waMosi, lofaka ekhatsi Lilanga Lekubuyisana. (Roma 10:4; Kholose 2:13, 14) Ngako-ke umKhristu ngamunye angase atincumele kutsi uyakuzila yini kudla nobe cha.—Roma 14:1-4.

EmaKhristu ayati kutsi kuzila kudla akusiyo intfo leyinhloko ekukhonteni kwawo Nkulunkulu. LiBhayibheli alisho kutsi bantfu kumelwe bazile kudla kuze bajabule. Ngalokwehlukile kuloku, emaKhristu eliciniso ayajabula ngobe alingisa Jehova, “Nkulunkulu lojabulako.”—1 Thimothi 1:11; Umshumayeli 3:12, 13; Galathiya 5:22.

Lokungasilo liciniso bantfu labacabanga kutsi liBhayibheli liyakusho ngekuzila kudla

Lokungasilo liciniso: Umphostoli Pawula wakhutsata emaKhristu lashadile kutsi azile kudla.—1 Khorinte 7:5, King James Version.

Lokuliciniso: Imibhalo yesandla yakandzeni yeliBhayibheli ayikhulumi ngekuzila kudla ku-1 Khorinte 7:5. b Kunebufakazi bekutsi bakopishi beliBhayibheli abangetanga nje lencenye yekuzila kudla kulelivesi kuphela kodwa baphindze bayifaka naku-Matewu 17:21; Makho 9:29; kanye ne-Imisebenti 10:30. Emahumusho eliBhayibheli lamanyenti alamuhla awanato letincenye tekuzila kudla.

Lokungasilo liciniso: EmaKhristu kufanele azile kudla kuze akhumbule kuzila kwaJesu kudla emalanga langu-40 ehlane ngemuva kwekubhajatiswa kwakhe.

Lokuliciniso: Jesu akazange sekatjele bantfu kutsi bazile kudla kute bakhumbule kuzila kwakhe kudla emalanga langu-40, futsi kute nemiBhalo lekhombisa kutsi emaKhristu ekucala ake akwenta loko. c

Lokungasilo liciniso: EmaKhristu kufanele azile kudla nakakhumbula kufa kwaJesu.

Lokuliciniso: Jesu akazange atjele bafundzi bakhe kutsi babozila kudla nabakhumbula kufa kwakhe. (Lukha 22:14-18) Ngesikhatsi Jesu atsi kubafundzi bakhe bebatozila kudla nakafa, bekangakhokhi umyalo wekutsi bakwente kodvwa bekamane abatjela ngaloko bekutokwenteka. (Matewu 9:15) LiBhayibheli laniketa emaKhristu labekalambile sicondziso sekutsi adle emakhaya ngaphambi kwekuya eSikhumbutweni sekufa kwaJesu.—1 Khorinte 11:33, 34.

a Nkulunkulu watjela ema-Israyeli watsi: “Kufanele nivete kutsi niva buhlungu” ngeLilanga Lekubuyisana. (Levithikhusi 16:29, 31; King James Version) Lamavi lawa abhekisele ekuzileni kudla. (Isaya 58:3) Ngako i-Contemporary English Version isebentisa lamavi nayitsi: “Kufanele ungadli kuze ukhombise kutsi udzabukile ngenxa yetono takho.”

b Fundza i-Textual Commentary yesiGriki, eTestamenteni Lelisha, lebhalwe nguBruce M. Metzger, Third Edition, likhasi 554.

c Ngekwemlandvo wekuzila kudla emalanga langu-40 ngemkhosi weLent, iNew Catholic Encyclopedia itsi: “Emakhulwini lamatsatfu ekucala, nakulungiselelwa umkhosi weliPhasika [ema-Easter] kuzila kudla bekungedluli evikini, kunaloko bekuvamise kutsatsa lilanga nobe emalanga lamabili. . . . Kwacala kukhulunywa ngalokuzila kudla kwemalanga langu-40 emkhandlwini wesihlanu we-Council of Nicaea (325), Nanobe labanye bafundzi baphika kutsi kwakukhulunywa ngeLent.”—Second Edition, Volume 8, likhasi 468.