Cha, liBhayibheli alifundzisi kutsi umhlaba usicebedvu. a LiBhayibheli alisiyo incwadzi yesayensi. Ngesikhatsi lesifanako, kute lapho liBhayibheli liphikisana khona nebufakazi lobutfolwe yisayensi. Loko lokushiwo liBhayibheli ‘akunawugucuka phakadze naphakadze.’—Tihlabelelo 111:8.

•  Lisho kutsini liBhayibheli nalitsi “emagumbini omane emhlaba”?

•  Kutsiwani ngekulingwa kwaJesu nguDeveli?

 Lamavi latsi “emagumbini omane emhlaba” nalatsi “emikhawulweni yonkhe yemhlaba” lasetjentiswe eBhayibhelini akufanele atsatfwe njengoba anjalo, kube shengatsi umhlaba usikwele nome unemkhawulo. (Isaya 11:12; Jobe 37:3) Kunaloko, leti tinongo tenkhulumo letichaza umhlaba uwonkhe. LiBhayibheli liphindze likhulume ngeningizimu, inyakatfo, imphumalanga kanye nenshonalanga.—Lukha 13:29.

 Ligama lesiHebheru lelihunyushwe ngekutsi lisisho lesisuselwa egameni lelitsi “timphiko.” I-The International Standard Bible Encyclopedia itsi “inyoni isebentisa luphiko lwayo kuze imbonye emazini ayo ngalokuphelele.” Le-Encyclopedia iphindze itsi emavi lakuJobe 37:3 naku-Isaya 11:12 asho kutsi lugu, imincele, nome imikhawulo yemhlaba.” b

 Kuze alinge Jesu, “Develi waphindze wamyisa entsabeni lendze kakhulu, wamkhombisa yonkhe imibuso yemhlaba kanye nebuhle bayo.” (Matewu 4:8) Labanye batsi lamavi eliBhayibheli afundzisa kutsi umhlaba wonkhe uyabonakala ngasikhatsi sinye nawume endzaweni letsite ngobe usicebedvu. Nome kunjalo, lamavi latsi “entsabeni lendze kakhulu” akasho intsaba mbamba, kodvwa angumfanekiso. Cabanga nganati tizatfu letinengcondvo kutsi kuphetfwe kanjalo.

•   Kute intsaba lephakeme kangako emhlabeni umuntfu langema kuyo kute abone yonkhe imibuso yemhlaba.

•   Develi akagcinanga ngekutjengisa Jesu yonkhe imibuso kuphela, kodvwa waphindze wamtjengisa “nebuhle bayo.” Konkhe loku bekungeke sekubonakale ngekutsi eme endzaweni letsite, ngako kubonakala shengatsi Develi wasebentisa likhono lelitsite kute amtjengise tonkhe letintfo. Loku singakufanisa nendlela umuntfu losebentisa i-projector kanye ne-screen kuze akhombise lotsite titfombe tetindzawo letehlukahlukene letisemhlabeni.

•   Kulandzisa lokufanako lokukuLukha 4:5 kusitjela kutsi Develi watjengisa Jesu “yonkhe imibuso yemhlaba ngesikhashana nje,” lokuyintfo lengeke yenteke ngendlela levamile yekubuka kwemuntfu. Loku kusikhombisa kutsi Develi wasebentisa buciko lobutsite kuze alinge Jesu hhayi indlela lengokocobo.