Kolobetso ke ha motho a qwediswa ka metsing mme ka mora moo a ntshwa. * Sena se hlalosa lebaka leo ka lona Jesu a ileng a kolobetswa nokeng. (Matheu 3:​13, 16) Ka tsela e tshwanang le qhalaha la Moithiopia le ile la kopa ho kolobetswa ha ba fihla “moo ho nang le metsi.”​—Liketso 8:​36-​40.

Kolobetso e bolelang?

 Bibele e bapisa kolobetso le lepato. (Baroma 6:4; Bakolose 2:​12) Kolobetso ya metsing e tshwantshetsa hore motho o shwele bophelong ba hae ba nakong e fetileng mme o qala bophelo bo botjha e le Mokreste ya inehetseng ho Modimo. Kolobetso le mehato eo motho a e nkang hore a qetelle a kolobeditswe, ke tokisetso eo Modimo a e entseng hore a be le letswalo le hlwekileng le tumelo sehlabelong sa Jesu Kreste. (1 Petrose 3:​21) Ka hoo Jesu o ile a ruta barutuwa ba hae hore ba lokela ho kolobetswa.​—Matheu 28:19, 20.

Na metsi a kolobetso a hlatswa dibe?

 Tjhe. Bibele e re ke madi a Jesu feela a ka hlatswang dibe. (Baroma 5:​8, 9; 1 Johanne 1:7) E le hore motho a fumane molemo sehlabelong sa Jesu, o lokela ho bontsha tumelo ho yena, a fetole tsela eo a phelang ka yona mme a phele ho latela dithuto tsa Jesu, a be a kolobetswe.​—Liketso 2:​38; 3:​19.

Tlhatsuwo ke eng?

 Lentswe “tlhatsuwo” ha le yo ka Bibeleng. Tlhatsuwo ke tshebeletso eo dikereke di e etsang ya ho kolobetsa masea (ka ho ba fafatsa kapa ho ba tshela ka metsi hloohong) le ho ba rea mabitso.

Na Bibele e ruta hore masea a kolobetswe?

 Tjhe ha ho jwalo. Ho kolobetswa batho ba hodileng ka ho lekaneng ho utlwisisa le ho dumela “ditaba tse molemo tsa mmuso wa Modimo.” (Liketso 8:​12) E amana le ho utlwa lentswe la Modimo, ho le amohela le ho bakela diphoso, e leng ntho eo lesea le ke keng la e etsa.​—Liketso 2:​22, 38, 41.

 Ho ekelletsa moo, Bibele e bontsha hore Modimo o nka bana banyenyane ba Bakreste, ba hlwekile ka pela mahlo a hae ka lebaka la botshepehi ba batswadi ba bona. (1 Bakorinthe 7:​14) Haeba kolobetso ya masea e ne e nepahetse, bana bao ba ne ba ke ke ba hloka motho ya neng a ka ba emela. *

Maikutlo a fosahetseng ka kolobetso ya Bakreste

 Seo e seng nnete: Ho fafatsa kapa ho tshela motho ka metsi ho nkela ho qwedisa motho ka metsing sebaka.

 Nnete: Hohle moo ho buuwang ka kolobetso ka Bibeleng e be e le ha motho a qwediswa ka metsing. Ka mohlala, ha morutuwa Filipi a kolobetsa monna wa Moithiopia, ka bobedi ba ile ba “theohela ka metsing.” Ka mora moo ba “nyolohetse ka ntle ho metsi.”​—Liketso 8:​36-​39. *

 Seo e seng nnete: Bibele e fana ka maikutlo a hore masea a ile a kolobetswa ha malapa a fapaneng a ne a kolobetswa. Ka mohlala, e re ka molebedi wa teronko: “Kaofela, yena le ba ntlo ya hae ba kolobetswa.”​—Liketso 16:​31-​34.

 Nnete: Tlaleho e buwang ka molebedi wa teronko e bontsha hore bohle ba ileng ba kolobetswa ba ne ba utlwisisa “lentswe la Jehova” le hore ba ile ba “thaba haholo.” (Liketso 16:​32, 34) Sena se etsa hore re fihlele qeto ya hore masea a neng a le ka tlung ya molebedi wa teronko a ne a ke ke a kolobetswa hobane a ne a ke ke a utlwisisa Lentswe la Modimo.

 Seo e seng nnete: Jesu o ile a ruta ka kolobetso ya masea ha a ne a re Mmuso wa Modimo ke wa bana.​—Matheu 19:​13-​15; Mareka 10:​13-​16.

 Nnete: Jesu o ne a sa bue ka kolobetso ha a ne a bua mantswe ao. Ho e na le hoo, o ne a bontsha hore bohle ba tla tshwaneleha ho kena Mmusong wa Modimo ba lokela ho ba jwalo ka bana, ba ikokobetse le ho mamela.​—Matheu 18:4; Luka 18:​16, 17.