Lengolo la Pele le Yang ho Timothea 1:1-20
1 Nna Pauluse, moapostola wa Kreste Jesu ya ronngweng ke Modimo Mopholosi wa rona le Kreste Jesu eo re nang le tshepo ka lebaka la hae,+
2 ke ngolla wena Timothea,*+ modumedimmoho le nna eo ke mo nkang jwalo ka ngwanaka.+
E se eka Modimo Ntate le Kreste Jesu Morena wa rona ba ka o bontsha mosa,* ba o hauhela le ho o fa kgotso.
3 Ha ke ne ke le mothating wa ho ya Macedonia, ke ile ka o kgothaletsa ho dula Efese. Le hona jwale ke o kgothaletsa ho etsa jwalo e le hore o ka kgalemela ba bang moo hore ba se ke ba ruta dithuto disele.
4 Hape o ba kgalemele hore ba se ke ba mamela dipale tsa bohata+ le ditaba tsa hore na maloko a latellana jwang. Dintho tseo ha di na thuso+ ebile di etsa hore batho ba bue dintho tseo ba ke keng ba di paka. Ha ho na moo di kopanang teng le dintho tseo Modimo a re fang tsona tse re matlafatsang tumelo.
5 Sepheo sa taelo ena ke hore batho bohle ba bontshe lerato+ hobane ba ena le dipelo tse hlwekileng, matswalo a kgutsitseng le tumelo+ e se nang boikaketsi.
6 Ba bang ba lahlile dintho tsena mme ba keneletse dipuong tsa bosawana.+
7 Ba batla ho ba mesuwe+ ya molao empa ha ba utlwisise dintho tseo ba di buang kapa tseo ba di rutang ka matla.
8 Re a tseba hore Molao o lokile ha feela motho a o sebedisa hantle
9 ebile a tseba hore molao ha o a etsetswa batho ba lokileng empa o etseditswe batho ba sa mameleng molao,+ ba sa laoleheng, ba sa hlompheng Modimo, baetsadibe, ba sa tshepahaleng,* ba silafetseng, ba bolayang batswadi le batho ba bang,
10 ba etsang boitshwaro bo bobe bo amanang le thobalano,* banna ba robalang le banna ba bang, ba kwetelang batho, ba leshano, ba sa phethahatseng ditshepiso* le ba etsang ntho efe kapa efe e hanyetsanang le thuto ya nnete.*+
11 Thuto ena e tswa ho Modimo ya thabileng mme e thehilwe hodima ditaba tse monate le tse ntle haholo tseo ke kgethilweng hore ke di phatlalatse.+
12 Ke leboha Kreste Jesu Morena wa rona ya ileng a mpha matla hobane o ile a bona ke tshepahala yaba o mpha mosebetsi o halalelang+
13 le hoja qalong ke ne ke nyefola Modimo, ke hlorisa batho ba hae ebile ke ikgohomosa.+ Ke ile ka etsa dintho tseo hobane ke se na tsebo ebile ke se na tumelo empa Kreste o ile a nkgauhela.
14 Morena wa rona o ile a ba mosa haholo ho nna mme ke ile ka fumana tumelo le lerato le tswang ho Kreste Jesu.
15 Mantswe a reng “Kreste Jesu o ile a tla lefatsheng ho pholosa baetsadibe”+ ke nnete hape re tshwanela ho a dumela. Hara baetsadibe bao bohle, ke nna ya ka pelepele.+
16 Kreste Jesu o ile a ba mosa ho nna moetsadibe ya ka pelepele e le hore a ka bontsha mamello ya hae ka nna mme ke tle ke be mohlala ho batho ba tla dumela ho yena e le hore ba fumane bophelo bo sa feleng.+
17 Modimo ya mong feela,+ Morena wa bosafeleng,+ ya ke keng a shwa+ le ya sa bonahaleng+ a ke a hlomphuwe a be a tlotliswe ka ho sa feleng. Amen.
18 Timothea ngwanaka, ke o fa taelo ena e dumellanang le mantswe ao baprofeta ba ileng ba a bua ka wena. Mantswe ao a tla o thusa hore o tswele pele o lwana ntwa e ntle+
19 le hore o dule o ena le tumelo le letswalo le kgutsitseng+ leo ba bang ba le qheletseng ka thoko yaba tumelo ya bona e senyeha jwalo ka sekepe se swahlamaneng.
20 Himenea+ le Alexandere ke ba bang ba bona mme ke fane ka bona ho Satane+ e le hore kgalemelo eo e ka ba ruta hore ba se ke ba tella Modimo.
Dintlha tse qetellong ya sehloho
^ E bolelang “Ya Hlomphang Modimo.”
^ Kapa: “ba se nang lerato.”
^ Kapa: “ba ikanang ka leshano.”
^ Kapa: “e molemo.”
