Ho Bagalata 5:1-26
5 Kreste o re lokolotse e le hore re se ke ra hlola re eba tlasa Molao. Ka lebaka leo, emang le tiile+ mme le se ke la itlohela hore le be makgoba hape.+
2 Nna Pauluse ke a le bolella hore haeba le bolla, seo Kreste a le etseditseng sona se ke ke sa le tswela molemo.+
3 Ke boetse ke a le bolella hore motho e mong le e mong ya bollang o tlameha ho mamela Molao wohle.+
4 Lona ba batlang hore ho thwe le lokile hobane le mamela molao,+ le lahlile Kreste. Ha le batle mosa* wa hae.
5 Rona moya o halalelang o etsa hore re dule re letile ka mamello ho fihlela ho thwe re lokile hobane re ena le tumelo.
6 Ha re le balatedi ba Kreste Jesu, ho bolla kapa ho se bolle ha ho na thuso+ empa tumelo eo motho a e bontshang ka diketso hobane a susumetswa ke lerato, ke yona ya bohlokwa.
7 Le ne le etsa dintho hantle.*+ Ke mang ya le sitisitseng ho tswela pele le latela thuto ya nnete?
8 Ho hang ha se ya le bitsang e leng Modimo.
9 Tomoso e nyenyane e bedisa hlama kaofela.+
10 Ke kgodisehile hore lona balatedi ba Jesu+ le tla dumellana le nna. Motho ya le tshwenyang+ ho sa tsotellehe hore na ke mang, o tla fumana kahlolo e mo loketseng.
11 Bana beso, haeba ke ne ke ntse ke ruta batho ka lebollo, ba ne ba ke ke ba ntlhorisa mme dintho tseo ke di rutang tsa hore Jesu o shwetse palong*+ di ne di ke ke tsa kgopisa batho.
12 E se eka banna ba le kgothaletsang hore le bolle ba ka kgaola ditho tsa bona tsa botona.*
13 Bana beso, Modimo o le kgethile e le hore le ka lokoloha. Le se ke la sebedisa tokoloho eo e le monyetla wa ho etsa dintho tse mpe+ empa e se eka lerato le ka le susumelletsa ho thusana.+
14 Molao wohle o akaretswa* ke taelo ena e le nngwe e reng: “O rate moahisani wa hao jwalo ka ha o ithata.”+
15 Haeba le tswela pele ho lwantshana le ho utlwisana bohloko,+ le hlokomele hore le se ke la bolayana.+
16 Empa ke re le tswele pele le tataiswa ke moya o halalelang+ mme ho hang le ke ke la batla ho etsa dintho tse mpe.+
17 Diketso tse mpe ha di dumellane le moya o halalelang le moya o halalelang ha o dumellane le diketso tse mpe. Dintho tsena ka bobedi di hanyetsana hoo le sa kgoneng ho etsa dintho tseo le batlang ho di etsa.+
18 Haeba le tataiswa ke moya o halalelang, ha le tlasa molao.
19 Diketso tse mpe di bonahala ka ho hlaka. Tsona ke: Boitshwaro bo bobe bo amanang le thobalano,*+ ho se hlweke, boitshwaro bo bobe boo batho ba bo etsang ba sa swabe,*+
20 ho rapela ditshwantsho, ho buisana le badimo,*+ lehloyo, diqabang, mona, bohale, ho se utlwane, dikarohano, dihlotshwana,
21 mohono,* botahwa,+ diphathi tse sa laoleheng le dintho tse kang tsena.+ Jwalo ka ha ke ile ka le lemosa pele, ke boela ke le lemosa hape hore batho ba etsang dintho tsena ba ke ke ba kena Mmusong wa Modimo.+
22 Le ha ho le jwalo, ditholwana tse behwang ke moya o halalelang ke lerato, thabo, kgotso, mamello,* mosa, molemo,+ tumelo,
23 bonolo le boitshwaro.+ Ha ho na molao o hanyetsanang le makgabane ana.
24 Balatedi ba Kreste Jesu ba bolaile maikutlo le ditakatso tsa ho etsa dintho tse mpe.+
25 Haeba re tataiswa ke moya o halalelang, a re tsweleng pele ho etsa dintho tse bontshang hore re tataiswa ke wona.+
26 A re se keng ra ikgohomosa,+ ra batla ho hlodisana le ba bang+ kapa ra honohela ba bang.
Dintlha tse qetellong ya sehloho
^ Ka Segerike: “le ne le matha hantle.”
^ Kapa: “e ka ba maqhalaha” e le hore ba se ke ba hlola ba tshwaneleha ho latela molao oo ba neng ba o buella.
^ Kapa: “o phethahaditswe.”
^ Kapa: “boloi; ho sebedisa ditlhare.”
^ Ho monela batho ba bang ka dintho tseo ba nang le tsona le ho lakatsa eka e ka be e le tsa hao hobane o nka hore ha di ba tshwanele.
^ Kapa: “tiisetso.”
