Tshenolo e yang ho Johanne 6:1-17
-
Konyana e tlosa ditempe tse tsheletseng (1-17)
-
Mopalami wa pere e tshweu ya hlolang dira tsa hae (1, 2)
-
Mopalami wa pere e bofubedu ba mollo ya tlosang kgotso (3, 4)
-
Mopalami wa pere e ntsho ya tlisang tlala (5, 6)
-
Mopalami wa pere e botala bo bosehla o bitswa Lefu (7, 8)
-
Madi a ba bolailweng a tlasa aletare (9-11)
-
Tshisinyeho e kgolo ya lefatshe (12-17)
-
6 Ka bona Konyana+ e tlosa se seng sa ditempe* tse supileng+ yaba ke utlwa le leng la mangeloi a mane+ le re ka lentswe le kang la seaduma: “Tloo!”
2 Ka bona pere e tshweu,+ ya neng a e palame o ne a tshwere seqha. O ile a fuwa korone+ yaba o a tloha hore a yo hlola dira tsa hae.+
3 Ha Konyana e tlosa setempe sa bobedi, ka utlwa lengeloi la bobedi+ le re: “Tloo!”
4 Ka bona pere e nngwe e bofubedu ba mollo. Ya e palameng o ile a fuwa sabole e kgolo mme a fuwa matla a hore a tlose kgotso lefatsheng e le hore batho ba ka bolayana.+
5 Ha Konyana e tlosa setempe sa boraro,+ ka utlwa lengeloi la boraro+ le re: “Tloo!” Ka bona pere e ntsho, ya e palameng o ne a tshwere sekala.
6 Ka utlwa lentswe le hlaha hara mangeloi a mane le re: “Lithara* ya koro e rekwa ka denari*+ le dilithara tse tharo tsa harese di rekwa ka denari. O se ke wa senya oli ya mohlwaare le veine.”+
7 Ha Konyana e tlosa setempe sa bone, ka utlwa lengeloi la bone+ le re: “Tloo!”
8 Ka bona pere e botala bo bosehla, lebitso la ya e palameng e ne e le Lefu mme o ne a setswe morao ke Lebitla.* Ba ile ba fuwa matla hodima kotara ya batho ba lefatshe e le hore ba bolaye batho ka sabole e telele, kgaello ya dijo,+ lefu la sewa le ka dibata.+
9 Ha Konyana e tlosa setempe sa bohlano, ka bona ka tlasa aletare+ ho ena le madi*+ a ba bolailweng ka lebaka la ho mamela lentswe la Modimo le ho le bolella batho ba bang.+
10 Madi a bona a hweletsa a re: “Mmusi wa Dintho Tsohle, wa nnete+ le ya halalelang, o tla ema ho fihlela neng pele o ahlola le ho iphetetsa ho batho ba re bolaileng ba phelang lefatsheng?”+
11 E mong le e mong wa bona o ile a fuwa seaparo se selelele se sesweu+ mme ba bolellwa hore ba eme ka nakwana ho fihlela palo ya makgobammoho le bona le bana ba bo bona ba neng ba tlo bolawa jwalo ka bona e feletse.+
12 Ka bona Konyana e tlosa setempe sa botshelela. Ho ile ha eba le tshisinyeho e kgolo ya lefatshe, letsatsi la eba letsho jwalo ka lesela le letsho* le kgwedi ya eba kgubedu jwalo ka madi.+
13 Dinaledi tsa wela lefatsheng jwalo ka ha difeie* tse sa butswang di wa sefateng sa feie ha se tsukutlwa ke sefefo.
14 Lehodimo la menwa jwalo ka moqolo yaba le a nyamela+ mme dithaba le dihlekehleke tsohle tsa tloswa moo di neng di dutse.+
15 Marena a lefatshe, diofisiri tse kgolo, balaodi ba sesole, barui, batho ba matla, makgoba ohle le bohle bao e seng makgoba ba ipata mahaheng le mafikeng a dithaba.+
16 Ba nna ba re ho dithaba le mafika: “Re weleng hodimo+ le re pate e le hore re se ke ra bonwa ke ya dutseng teroneng.+ Le re sireletse kgalefong ya Konyana+
17 hobane letsatsi le leholo la kgalefo ya bona le fihlile+ mme ke mang ya ka le phonyohang?”+
Dintlha tse qetellong ya sehloho
^ Sheba Ntlha ya B14.
^ Ke tjhelete ya tshepe ya Roma e lekanang le mokgolo wa letsatsi. Sheba Ntlha ya B14.
^ Ka Segerike: “meya.” Ho bonahala e ka ho buuwa ka madi a bona a ileng a tshollelwa aletareng. Sheba Tlhaloso.
^ Hangata mofuta ona wa lesela o ne o etswa ka boya ba podi.
^ Kapa: “feiga.”
