HO IKETSETSA lebitso kapa botumo bo botle ke habohlokwa haholo ebile le dinaheng tse ding, le sireleletswa ke molao. Sena se bolela hore, motho a ka qoswa haeba a sentse e mong lebitso. Taba ena e re hopotsa mantswe ana a reng: “Lebitso le lokela ho kgethwa ho ena le maruo a mangata; kamohelo e molemo le ho feta silevera le kgauta.” (Liproverbia 22:1) Ebe ke jwang re ka hlomphehang ra ba ra iketsetsa lebitso le letle? A re hlokomeleng hore na Bibele e ka re thusa ho etsa sena jwang.

Ka mohlala, hlokomela hore na Bibele e reng ho Pesaleme ya 15. Mongodi wa Pesaleme eo, o ile a araba potso e reng: “Ke mang eo e tla ba moeti tenteng ya [Modimo]?” ka hore a re: ‘Ke ya . . . etsang ho loka ebile a bua nnete ka pelong ya hae. Ya sa etselletsang . . . , ya sa etsang letho le lebe ho motswalle wa hae, ho se [nyatso] eo a e boletseng kgahlanong le motho eo a mo tlwaetseng haholo. Ka sebele mahlong a hae mang kapa mang ya eisehang o a lahlwa . . . O itlhapanyeditse se sebe, le ha ho le jwalo ha a fetohe. . . . Ha a a nka tjotjo.’ (Pesaleme ya 15:1-5) Na ebe o ne o ke ke wa hlompha motho ya phelang ka melaomotheo ee?

Boikokobetso ke e nngwe ya dintho tse ka re thusang hore re be batho ba hlomphehang. Liproverbia 15:33 e re: “Boikokobetso bo etella thoriso pele.” Hlokomela hore motho ya ikokobeditseng, o sebetsa ka thata ho ntlafatsa moo a bonang ho hlokahala. Ebile o ikemiseditse ho kopa tshwarelo haeba a utlwisitse motho e mong bohloko. (Jakobo 3:2) Empa ha e le motho ya ikgohomosang yena, ho ena le ho kopa tshwarelo o a kgopeha. Liproverbia 16:18 e re: “Boikakaso bo etella ho wa pele, mme moya o ikgohomosang o etella ho kgoptjwa pele.”

Empa o ka etsang haeba motho e mong a o senya lebitso? Na o tla tuka ke bohale? Ako ipotse, ‘Haeba ke leka ho sireletsa lebitso la ka, na ke tla be ke sa beselletse mollo le ho feta?’ Le ha molao o kgona ho re sireletsa ka nako tse ding, Bibele e re fa keletso e reng: “O se ke wa tloha ho ya tsamaisa nyewe ka lepotlapotla.” Ho ena le hoo, “buella nyewe ya hao ho wa heno.” (Liproverbia 25:8, 9) * Haeba o sebedisa keletso ena, o tla boela o ipolokele tjhelete eo o ka beng o e sentse ho isa motho lekgotleng.

Bibele ha se buka feela tjee ya bodumedi. Empa ke buka eo re ka e tshepang bophelong. Mme haeba re e sebedisa, ha ho potang hore re tla hlompheha re be re iketsetse lebitso le letle.