Ka maswabi, ha ke ne ke le dilemo tse ka bang 13 kamano ya ka le Jehova e ne e se e se matla. Bana bao ke neng ke kena sekolo le bona ba ne ba bonahala eka ba na le bolokolohi ba ho etsa ntho e nngwe le e nngwe mme ke ne ke batla ho tshwana le bona. Ke ne ke utlwa eka melao eo batswadi ba ka ba mpehetseng yona le eo Bakreste ba phelang ka yona e thata mme ke bona ho sebeletsa Jehova e le mosebetsi o boima. Le hoja ke ne ke dumela hore Jehova o teng empa ke ne ke sa utlwe ke le haufi le yena.

Ho ntse ho le jwalo, ha ke a ka ka tlohela ho sebeletsa Jehova empa ke ne ke ya tshimong ka sewelo. Mohlang ke yang tshimong ke ne ke sa lokisetse mme seo se ne se etsa hore ho be thata hore ke qadise moqoqo le ho tswela pele ka wona. Ka lebaka leo ke ne ke sa kgone ho ba le maeto a ho boela kapa batho bao ke ithutang Bibele le bona mme ke ne ke sa thabele tshimo e leng se ileng sa etsa hore ke se ke ka e rata le ho feta. Ka hoo ke ne ke ipotsa, ‘Motho a ka kgona jwang ho dula a ya tshimong beke le beke kapa kgwedi le kgwedi?’

Ha ke ne ke le dilemo di 17 ke ne ke batla ho ikemela. Ka hoo ke ile ka paka thoto ya ka, ka tsamaya lapeng mme ka ya Australia. Batswadi ba ka ba ile ba utlwa bohloko haholo ha ke tsamaya. Ba ne  ba tshwenyehile empa ba ile ba nahana hore ke tla tswela pele ke ntse ke sebeletsa Jehova.

Ha ke le Australia, ke ne ke se ke sa sebeletse Jehova hantle le ho feta yaba ke qala ho se ye dibokeng hantle. Ke ile ka ba motswalle wa batjha ba bang ba neng ba tshwana le nna, re ne re thabela ho ya dibokeng kajeno mme letsatsi le latelang re nwa ebile re ithabisa di nightclub. Ha ke nahana ka nako eo, ke ile ka hlokomela hore ke ne ke sebeletsa Jehova ha ka lehlakoreng le leng ke etsa dintho tsa lefatshe lena empa bophelo boo ke ne ke sa bo thabele.

Dilemo tse ka bang tse pedi ha morao, ke ile ka kopana le moradiwabo rona e mong ka nakwana mme o ile a etsa hore ke nahane ka tsela eo ke phelang ka yona a sa hlokomele. Ke ne ke dula le baradibabo rona ba bahlano ba sa nyalwang mme re ile ra mema molebedi wa potoloho le mosadi wa hae Tamara hore ba tlo dula le rona beke kaofela. Ha monna wa hae a ntse a etsa dintho tsa phutheho, Tamara o ne a qeta nako le rona ebile re itshehela ha monate. Ke ne ke thabela seo haholo. E ne e le motho ya ikokobeditseng ebile ho le bonolo ho bua le yena. Ke ne ke makatswa ke ho bona hore re ka thabela ho qeta nako le motho ya phathahaneng hakaana ka ho sebeletsa Jehova.

Tamara e ne e le motho ya mafolofolo. Tsela eo a neng a rata ho sebeletsa Jehova ka yona le eo a neng a rata tshimo ka yona e ile ya etsa hore le nna ke batle ho tshwana le yena. O ne a thabile hobane o ne a sebeletsa Jehova ka hohle ka moo a neng a ka kgona ka teng, ha nna ke ne ke sa thaba hobane ke ne ke sa sebeletse Jehova ka hohle ka moo nka kgonang ka teng. Tsela eo a neng a rata Jehova ka yona le ka moo a neng a thabile ka teng e ile ya etsa hore ke batle ho fetola bophelo ba ka. Mohlala wa hae o ile wa etsa hore ke nahane ka taba e nngwe ya bohlokwa e ka Bibeleng ya hore Jehova o batla hore kaofela ha rona re mo sebeletse “ka thabo” le “ka mohoo wa nyakallo.”​—Pes. 100:2.

Ke ne ke batla ho thaba jwalo ka Tamara empa e le hore ke thabe jwalo, ke ne ke hloka ho etsa diphetoho tse kgolo bophelong ba ka. Ke ile ka etsa diphetoho hanyane hanyane empa ho ile ha nka nako. Ke ne ke nka bopulamadiboho bo thusang nako le nako ebile ke lokisetsa ha ke ya tshimong. Sena se ile sa nthusa hore ke se ke ka tshoha haholo le hore ke itshepe haholwanyane. Ka ha  ke ne ke sebedisa Bibele haholo tshimong seo se ile sa etsa hore ke thabele tshimo le ho feta. Ka mora moo, ke ile ka nka bopulamadiboho bo thusang kgwedi le kgwedi.

Ke ile ka qala ho kgetha metswalle ya batho ba dilemo tse sa tshwaneng ba neng ba na le kamano e ntle le Jehova ebile ba thabela ho etsa sohle seo ba ka se kgonang ho mo sebeletsa. Mohlala wa bona o motle o ile wa nthusa hore ke nahane hore na ke eng e tlang pele bophelong ba ka le hore ke qale ho bala Bibele ka mehla. Ke ile ka qala ho thabela tshimo le ho feta mme ha nako e ntse e ya ka ba pulamadiboho ya ka mehla. Ka lekgetlo la pele ka mora dilemo tse ngata ke ile ka ikutlwa ke thabile ebile ke phutholohile ha ke le dibokeng.

Selemo ha morao, ke ile ka kopana le Alex e leng motho ya mosa, ya nang le pelo e ntle, ya ratang Jehova ebile a rata tshebeletso ya tshimo. E ne e le mohlanka ya sebeletsang mme ho ne ho se ho fetile dilemo tse tsheletseng e le pulamadiboho ya ka mehla. Hape o ile a ya moo ho neng ho na le tlhokahalo teng Malawi ka nakwana. Ha a ntse a le moo, o ne a qeta nako a na le baromuwa ba neng ba mo behela mohlala o motle mme ba mo kgothalletsa hore a tswele pele a nka ho sebeletsa Jehova e le ntho e tlang pele bophelong ba hae.

Nna le Alex re ile ra nyalana ka 2003 mme ra tswela pele re le tshebeletsong ya nako e tletseng ho fihlela hona jwale. Re ile ra ithuta dintho tse ngata haholo mme Jehova o ile a re hlohonolofatsa ka ditsela tse ngata.

Ka 2009, re ile ra ilo sebeletsa re le baromuwa Timor-Leste e leng naha e nyane ho tse ding tsa dihlekehleke tse Indonesia. Re ile ra ikutlwa re tshohile, re thabile ebile re maketse ka nako e le nngwe. Dikgwedi tse hlano ka mora moo re ile ra ya Dili e leng motsemoholo wa naha eo.

Tsela eo re neng re phela ka yona mona e ne e fapane hole le eo re neng re e tlwaetse. Re ile ra lokela ho tlwaela setso se setjha, puo, dijo le tsela eo batho ba moo ba neng ba phela ka yona. Hangata ha re ne re le tshimong re ne re kopana le batho ba sotlehileng haholo, ba sa rutehang le ba hatelletsweng.  Hape re ile ra bona batho ba bangata ba neng ba kula, ba nyahame ebile ba tshwenyehile ka lebaka la ntwa. *

Re ne re thabela tshimo haholo. Ka mohlala ke ile ka kopana le ngwanana e mong ya bitswang Maria ya neng a na le dilemo tse 13 ya neng a utlwile bohloko haholo. * Mme wa hae o ile a hlokahala dilemo tse mmalwa tse fetileng mme o ne a kopana le ntate wa hae ka sewelo. Jwalo ka bana ba bangata ba lekanang le yena, Maria o ne a sa tsebe hore na o batla eng bophelong ba hae. Ke hopola letsatsi le leng a lla haholo ha a ntse a mpolella ka moo a ikutlwang ka teng. Le ha ho le jwalo, ke ne ke sa utlwisise hore na o ntse a reng hobane ke ne ke sa tsebe puo ya bona hantle. Ke ile ka rapela Jehova hore a nthuse hore ke kgone ho mo kgothatsa mme ka mora moo ka mo balla mangolo a mo tshedisang. Ka mora dilemo tse mmalwa ke ile ka bona ka moo nnete ya Bibele e ileng ya fetola tsela eo Maria a neng a ikutlwa ka yona, a itlhopha le eo a neng a phela bophelo ba hae ka yona. O ile a kolobetswa mme hona jwale ho na le batho bao a ithutang Bibele le bona. Hona jwale, Maria ke karolo ya lelapa le leholo la bahlanka ba Jehova mme o ikutlwa a ratwa haholo.

Ka nnete Jehova o hlohonolofatsa mosebetsi wa boboledi o etswang Timor-Leste. Le hoja bahweletsi ba bangata ba ile ba kolobetswa dilemo tse leshome tse fetileng, ba bangata ba bona ke bopulamadiboho ba ka mehla, bahlanka ba sebeletsang kapa baholo. Hape ba bang ba sebeletsa ofising ya phetolelo mme ba thusa ka ho fetolela dingolwa tse thehilweng Bibeleng ka dipuo tse buuwang naheng eo. Ke ile ka thaba haholo ha ke utlwa ba bina dibokeng, ke bona ka moo ba thabileng ka teng le ho ba bona e ba metswalle ya Jehova.

Bophelo ba Timor-Leste bo fapane haholo le ba Australia, empa ke ne ke thabile haholo. Ka dinako tse ding re ne re tsamaya ka tekesi e tletseng batho ba bangata ebile ho na le ditlhapi tse omisitsweng le meroho e tswang mmarakeng. Ka matsatsi a mang re ne re ithuta Bibele le batho ho tjhesa haholo, ka matlong a manyane a sa poleiseterwang fatshe ebile le dikgoho di ntse di matha hohle mona. Ho sa tsotellehe hore na re ne re na le diphephetso dife ke ne ke thabile.

Ha ke nahana ka bophelo ba ka ke leboha batswadi ba ka hore ebe ba ile ba etsa sohle seo ba ka se kgonang ho nthuta melao ya Jehova le ho ntshehetsa esita le ha ho ne ho le thata hore ke sebeletse Jehova ka hohle ka moo nka kgonang. Ka nnete mantswe a ho Liproverbia 22:6 a phethahetse bophelong ba ka. Batswadi ba ka ba motlotlo ka nna le Alex mme ba thabela ho re bona re sebeletsa Jehova. Ho tloha ka 2016 esale re potoloha tshimong e tlasa lekala la Australasia.

Ho thata ho dumela hore ho kile ha ba le nako eo ke neng ke sa rate tshebeletso ya tshimo ka yona. Hona jwale ke se ke rata tshimo. Ke hlokometse hore ho sa tsotellehe hore ho etsahalang bophelong, motho o thabiswa feela ke ho sebeletsa Modimo ka pelo yohle. Ka nnete dilemo tse 18 tseo re sebeleditseng Jehova ka tsona le Alex e bile tse monate haholo bophelong ba ka. Hona jwale ke utlwisisa hantle seo mopesaleme Davida a ileng a se bua ho Jehova ha a ne a re: “Bohle ba tshabelang ho wena ba tla thaba; Ba tla hweletsa ka thabo ho isa nakong e sa lekanyetswang. . . . Ba ratang lebitso la hao ba tla thaba ka lebaka la hao.”​—⁠Pes. 5:⁠11.