TLASA Molao oo Modimo a o fileng Moshe, Jehova o ne a dumella Baiseraele hore ba fane ka maebanakgorwana le maeba e le dinyehelo. Melao e neng e bua ka dinyehelo e ne e dula e bua ka dinonyana tsena tse pedi mme ho ne ho ka sebediswa e nngwe bakeng sa e nngwe. (Lev. 1:​14; 12:⁠8; 14:​30) Ke hobaneng ha tokisetso ena e ne e le molemo? Lebaka le leng ke hobane maebanakgorwana a ne a sa dule a fumaneha ha bonolo. Hobaneng?

Maebanakgorwana a fumaneha naheng ya Iseraele ka dikgwedi tseo ho futhumetseng ka tsona. Selemo se seng le se seng ka kgwedi ya October, a fallela dinaheng tse futhumetseng tse ka borwa mme a kgutlela Iseraele ka nako ya selemo. (Sefela 2:​11, 12; Jer. 8:⁠7) Sena se bontsha hore ho ne ho le thata hore Baiseraele ba mehleng ya kgale ba fane ka maebanakgorwana e le sehlabelo nakong ya mariha.

Ka lehlakoreng le leng, maeba ona ha a falle mme a dula a le teng Iseraele selemo kaofela. Hape maeba e ne e le dinonyana tse ruuwang. (Bapisa le Johanne 2:​14, 16.) Ho ya ka buka ya Bible Plants and Animals, “batho bohle ba dulang mahaeng le ditoropong naheng ya Palestine ba ne ba ruile maeba. Mongantlo e mong le e mong o ne a ena le sehlaha kapa lesoba leboteng moo dinonyana di neng di ka dula teng.”​—⁠Bapisa le Esaia 60:⁠8.

Sena se ne se bontsha hore Jehova o lerato ebile o a nahanela hobane o ile a dumella Baiseraele hore ba fane ka dinonyana tseo ba neng ba ka kgona ho ba le tsona selemo kaofela.