Ha ho na motho ya nang le senepe sa Jesu. Hobane ha a ka ba a nka senepe kapa a re motho e mong a mo toroye. Ho ntse ho le jwalo, haesale a hlahella haholo ditshwantshong tsa batho ba bangata ba toroyang.

Nnete ke hore batho bao ba ne ba sa tsebe hore na ha e le hantle Jesu o ne a shebahala jwang. Ho bonahala ha ditso, madumedi le batho ba batlang ho etsetswa ditshwantsho tseo, e le bona ba jwetsang batoroyi hore na ba toroye Jesu a le jwang. Sena se etsa hore batho ba se ke ba hlola ba tseba hantle hore na ba tadime Jesu le seo a se rutileng jwang.

Batoroyi ba bang ba toroile Jesu a bonahala e le motho ya fokollwang ke bophelo tjena, ebile a na le moriri o mo telele le ditedu tse motsu kapa ba bontshe e le motho ya kwatileng. Ditshwantshong tse ding teng, Jesu o hlahella e le motho ya tshosang, ya kgabisitsweng ka sedikadikwe sa kganya ho potoloha hlooho kapa a le thoko le batho. Na ehlile ditshwantsho tseo di bonahatsa seo Jesu a neng a le sona? Ebe re ka tseba jwang? Tsela e nngwe ke ka ho hlahlobisisa lesedi la Bibele le ka re hlakisetsang hore na e ka nna yaba o ne a shebala jwang. Le tla re thusa le hore re be le pono e nepahetseng ka yena.

Ao ke mantswe a Jesu, ao ho bonahalang hore o a buile thapelong ya hae ha a ne a kolobetswa. (Baheberu 10:5; Matheu 3:13-17) Jwale mmele oo wa hae o ne o le jwang? E ne e se e le dilemo tse 30 pelenyana ho moo, ha lengeloi Gabriele le ne le re ho Maria: “O tla emola ka popelong ya hao o tswale mora . . . Mora Modimo.” (Luka 1:31, 35) Kahoo, Jesu o ne a phethahetse jwalo ka Adama. (Luka 3:38; 1 Bakorinthe 15:45) E tlameha ebe Jesu o ne a shebahala hantle mme mohlomong a bile a tshwana le mme wa hae wa Mojuda, Maria.

Ka ha e ne e le tlwaelo ya Bajuda ho ba le ditedu, Jesu le yena o ne a na le tsona. Empa tedu tsa hae di ne di etsa hore a hlomphehe di bile di mo fa seriti; hobane di se telele kapa di se bohlaswa. Ho a utlwahala ho nahana hore Jesu o ne a kuta ditedu le moriri hantle. Ke batho ba neng ba kgethetswe ho ba Banazari feela, jwalo ka Samsone, ba neng ba sa lokela ho kuta moriri.​—Numere 6:5; Baahloli 13:5

O qetile karolo e ngata ya bophelo ba hae e le mmetli wa mapolanka. A sebetsa jwalo a sena disebediswa tsa mehleng ena tse nolofatsang mosebetsi. (Mareka 6:3) E tlameha ebe o ne a hlile a ipabola ka mosebetsi wa hae. Qalong ya tshebeletso ya hae, o ile “a lelekela bohle ba nang le dinku le dikgomo ka ntle ho tempele, mme a tsholla ditjhelete tsa tshepe tsa ba ananyang tjhelete le ho phethola ditafole tsa bona.” (Johanne 2:14-17) Nahana feela hore na ho ne ho mo hloka matla a makae hore a etse ntho e jwalo a le mong. O sebedisitse mmele oo Modimo a mo fileng ona e le hore a phethe taelo ena e reng: “Ke tla bolela ditaba tse molemo tsa mmuso wa Modimo le metseng e meng, hobane ke rometswe sena.” (Luka 4:43) Ha se ntho e bonolo ho bolela molaetsa wa Bibele Palestina kaofela o tsamaya ka maoto. Empa Jesu yena o ile a kgona.

Tsela eo Jesu a neng a tshwara batho ka yona le ponahalo ya hae ha a bua mantswe ao, e tlameha ebe ke yona e ileng ya etsa hore a ratehe ho ba “sehlang le ba imetsweng.” (Matheu 11:28-30) O ne a le mofuthu a bile a le mosa mme seo, ke sona se ileng sa  netefatsa tshepiso ya hae ya ho tla kgatholla ba neng ba ikemiseditse ho ithuta ho yena. Esita le bana ba ne ba batla ho ba haufi le Jesu, ka ha Bibele e re o ne a: “Sika bana.”—Mareka 10:13-16.

Le hoja Jesu a ile a utlwa bohloko bo sisimosang nakwana pele a shwa, e ne e se motho ya dulang a hloname kapa a ikutlwetse bohloko. Ka mohlala, ha a ne a menngwe moketeng wa lenyalo le neng le le Kana, o ile a fetola metsi veine. (Johanne 2:1-11) Diketsahalong tse ding teng, o ne a ruta dithuto tse sa lebaleheng.​—Matheu 9:9-13; Johanne 12:1-8.

Ka hodimo ho tsohle, Jesu o ne a ruta ka tsela eo bamamedi ba hae ba neng ba ka utlwisisa habonolo feela mme ba ba le tshepo e hlakileng ya bophelo bo sa feleng. (Johanne 11:25, 26; 17:3) Ka tsatsi le leng eitse ha barutuwa ba Jesu ba 70 ba mo ripotela ka dintho tse ba etsahelletseng, o ile a “nyakalla” yaba o re: “Le thabe kahobane mabitso a lona a ngotswe mahodimong.”​—Luka 10:20, 21.

Baetapele ba bodumedi ba mehleng ya Jesu, ba ne ba ipatlela thoriso feela. (Numere 15:38-40; Matheu 23:5-7) Ho fapana le seo, Jesu yena o ile a laela barutuwa ba hae hore ba se ke ba “rena ka thata hodima” ba bang. (Luka 22:25, 26) Ebile o ile a ba a ba hlokomedisa a re: “Hlokomelang bangodi ba batlang ho tsamaya ba apere diaparo tse telele tsa ka hodimo mme ba batla ditumediso dimmarakeng.”​—Mareka 12:38.

Jesu o ne a fapane hakaakang, ka ha o ile a itswakanya le letshwele, a etsa hore a se ke a hlahella. (Johanne 7:10, 11) Esita le ha a ne a na le baapostola ba hae ba 11, o ne a ntse a sa batle ho hlahella. Ke ka hona Judase a ileng a tlameha hore a sune Jesu, e le “pontsho eo ho dumellanweng ka yona,” ho bontsha mokgopi hore na Jesu ke ofe.​—Mareka 14:44, 45.

Kahoo, le hoja ho sa tsejwe dintlha tse ngata mabapi le Jesu, ho a hlaka hore o ne a se jwalo ka ha ditshwantsho tse ngata di bontsha. Ntho ya bohlokwa ha se hore na hantlentle o ne a shebahala jwang, empa ke hore na re mo tadima jwang hona jwale.

Jesu o shwele hantle ka letsatsi lona leo a ileng a bua mantswe ana ka lona. (Johanne 14:19) O ile a fana ka bophelo ba hae hore e be “thekollo e le phapanyetsano bakeng sa ba bangata.” (Matheu 20:28) Modimo o ile a mo tsosa ka letsatsi la boraro, e le ‘moya’ mme “a mo neha hore a bonahale” ho barutuwa ba bang ba hae. (1 Petrose 3:18; Liketso 10:40) Jwale ebe Jesu o ne a le jwang ka nako eo ha a ne a hlahella ho barutwa ba hae? Ho bonahala ha a ne a sa tshwane le pele, hobane esita le metswalle ya hae ya mmakgonthe e ile ya dieha ho bona hore ke yena. Ebile Maria Magdalena o ne a nahana hore ke mohlokomedi wa serapa; athe barutuwa ba bang ba babedi ba Jesu bona, ba ne ba re ke mojaki ha ba teana le yena tseleng e yang Emmause.​—Luka 24:13-18; Johanne 20:1, 14, 15.

Jwale re lokela ho tadima Jesu jwang hona jwale? Dilemo tse fetang 60 Jesu a shwele, moapostola ya ratwang Johanne o ile a bona dipono tsa Jesu. Johanne ha a ka a bona setshwantsho sa Jesu a shwela sefapanong. Ho ena le hoo, o ile a bona “Morena wa marena le Kgosi ya dikgosi,” Morena wa Mmuso wa Modimo, eo haufinyane a tlang ho hlola dira tsa Modimo, e leng mademona le batho mme ebe o tlisa ditlhohonolofatso tsa ka ho sa feleng ho batho.​—Tšenolo 19:16; 21:3, 4.