Ezekiele 4:1-17
4 Mor’a motho, nka setene u se behe ka pel’a hao. U etse setšoantšo sa motse oa Jerusalema holim’a sona.
2 U etse eka oa u hlasela,+ u hahe lerako ho o potoloha,+ u hahe qubu e o thibellang,+ u hlome litente bakeng sa masole ’me u o pota-pote ka libetsa tse lihang marako.+
3 Nka terei* ea tšepe, u etse eka ke lerako la tšepe pakeng tsa hao le motse. U shebe motse ’me u o thibelle. Lena e tla ba letšoao bakeng sa Baiseraele.+
4 U paqame ka lehlakore le letšehali ’me u jare molato oa Baiseraele.+ U tla jara molato oa bona ka matsatsi ao u tla beng u paqame ka ’ona.
5 U paqame joalo ka matsatsi a 390 a lekanang le lilemo tseo ba ntšitetsoeng ka tsona.+ Ka ho etsa joalo, u tla jara molato oa Baiseraele.
6 U paqame joalo ho fihlela matsatsi ao a fela.
Ka mor’a moo, u paqame ka lehlakore le letona ’me u jare molato oa Juda+ ka matsatsi a 40. Ke khethile hore letsatsi le emele selemo.
7 U shebe tlhaselo ea Jerusalema+ seaparo sa hao se mennoe letsohong ’me u profete hore e tla hlaseloa.
8 Ke tla u tlama ka liropo e le hore u se ke oa fetoha ho fihlela matsatsi a tlhaselo a felile.
9 U nke koro,* harese, linaoa, lensisi, nyalothe le koro e ’ngoe ebe u li tšela ka har’a sekotlolo u iketsetsa bohobe. U tla ja bohobe boo ka matsatsi a 390 ha u ntse u paqame.+
10 U lekanye lijo tseo u tla li ja ka letsatsi hore li etse likramo tse ka bang 230.* U li je ka nako e tšoanang letsatsi le leng le le leng.
11 U noe likopi tse peli* feela tsa metsi. U a noe ka nako e tšoanang letsatsi le leng le le leng.
12 U je bohobe boo joaloka bohobe bo selika-likoe ba harese. U bo phehe ba ntse ba shebile u sebelisa mantle a batho a ommeng e le libeso.”
13 Jehova a boela a re: “Ka tsela e tšoanang, Baiseraele ba tla ja bohobe bo sa hloekang lichabeng tseo ke tla ba lelekela ho tsona.”+
14 Eaba ke re: “Kea u kopa hle Jehova ’Musi oa Lintho Tsohle! Ho tloha ke sa le moshanyana ho fihlela hona joale, ha ke e-s’o ka ke itšilafatsa ka ho ja nama ea phoofolo e shoeleng+ kapa e bolailoeng ke liphoofolo tse hlaha ebile ho hang ha ke e-s’o je nama e sa hloekang.”*+
15 A re ho ’na: “Ho lokile, u ka sebelisa bolokoe bo ommeng eseng mantle a batho bakeng sa ho etsa mollo oa ho pheha bohobe ba hao.”
16 A boela a re ho ’na: “Mor’a motho, ke etsa hore ho se ke ha e-ba le lijo* Jerusalema.+ Baahi ba moo ba tla ja bohobe bo lekantsoeng ba tšoenyehile+ le metsi ba tla noa a lekantsoeng ba tšohile haholo.+
17 Bohobe le metsi li tla fela e le hore ba ka shebana ba tšohile ’me ba ote ka lebaka la liphoso tsa bona.
Linaletsana
^ E leng terei e bakang.
^ Ka Seheberu: “ho buuoa ka mofuta o mong oa koro ea boemo bo tlase e neng e lengoa Egepeta ea boholo-holo.”
^ Ka Seheberu: “lishekele tse 20.” Shekele e lekana le likramo tse 11,4. Sheba Ntlha ea B14.
^ Ka Seheberu: “karolo ea botšelela ea hine,” e leng hoo e ka bang halofo ea lithara. Sheba Ntlha ea B14.
^ Kapa: “e bolileng.”
^ Ka Seheberu: “ke roba melamu ea bohobe.” Mohlomong ho buuoa ka melamu eo ho neng ho hakoa bohobe ho eona.
