HA KE sa le mohlankana, ke ile ka lahleheloa ke tšepo bolumeling ka lebaka la lehloeo la litho tsa bona. Hape ke ne ke sa utloisise hore na ke hobane’ng ha Molimo a sa felise bofutsana le leeme le hore na ke hobane’ng ha batho ba bangata ba kenang kereke ba sa phele tumellanong le Bibele. Kahoo, ke ne ke re Molimo ha a eo ’me ke lumela hore tharollo ea mathata a lefatše e ka tlisoa ke ha ho ka ba le phetoho lipolotiking.

Ka 1962 ke ile ka qala ho bala makasine ea Tsoha! Eaba ke qala ho ithuta Bibele le Lipaki Tsa Jehova ka 1963. Ke ile ka angoa ke seo ke ithutang sona. Ka ithuta hore hase Molimo ea susumetsang malumeli hore a etse bokhopo, ho e-na le hoo, o batla hore batho ba phele hamonate. Ka mor’a likhoeli tse peli feela ke ithuta, ke ile ka qala ho bolella ba  bang hore tsamaiso ena e senyehileng ea lintho e tla nkeloa sebaka ke ’Muso oa Molimo. Ke ile ka kolobetsoa ka 1964 ’me ka ba pula-maliboho ea khethehileng ka 1966. Ke lumela hore ’nete e mpholositse, kaha ba bang ba bo-mphato’a ka sesoleng ba ile ba shoa ka sehlōhō, ba bang ba koalloa literonkong athe ba bang bona ba ile ba phaphatheha. Ke leboha Jehova ha a nthusitse hore ke boele ke lumele hore o teng le hore o tla re tlisetsa bophelo bo monate nakong e tlang.