BARA le barali babo rōna ba Sri Lanka ba neng ba khabile ka liaparo tsa setso ba ile ba amohela baeti ba 130 ba tsoang linaheng tse 19 ba neng ba tlile moketeng oa ho nehela lekala sehlekehlekeng sena se setle. Sehlopha sa bana se ne se bina lipina tsa ’Muso, ’me bohle ba ile ba hlolloa ha ba bona pontšo ea lintho tsa setso tsa Sri Lanka, lijo tse lutlisang mathe, lehlaso hammoho le botsoalle bo mofuthu ba Bokreste.

Mehaho e mecha hammoho le e nchafalitsoeng e ile ea neheloa ho Jehova ka Moqebelo oa la 11 January, 2014, ’me ho ne ho e-na le bamameli ba 893 lenaneong leo la lipuo tse tharo. Batho ba ile ba opa nako e telele ha mor’abo rōna Mark Sanderson oa Sehlopha se Busang a re: “Na le rata ho nehela mohaho oo ho Jehova Molimo?”

 Ka Sontaha, batho ba 7 701 ba ile ba shebella lenaneo la Moqebelo hammoho le puo e khothatsang ea mor’abo rōna Sanderson. Le ile la hasoa libakeng tse hlano tse khōlō. E ne e le lekhetlo la pele ho sebelisoa Inthanete Sri Lanka ho hokela libaka tse sa tšoaneng ’me bara le barali babo rōna ba bonana le ho utloana ha ba bina lipina tsa ’Muso. Ka sebele ketsahalo ena e ikhethang e ile ea tlisetsa barab’abo rōna “thabo e khōlō.”—Neh. 12:43.