Bafarisi ha ba lumele hore Jesu o khonne ho folisa monna ea neng a foufetse, kahoo ba bitsa batsoali ba hae. Batsoali bao baa tseba hore ho ka ’na ha etsahala hore ba ‘lelekoe synagogeng.’ (Johanne 9:​22) Ha seo se ka etsahala, likamano tsa bona le Bajuda ba bang li ka senyeha ’me ba ka ba le mathata a lichelete.

Bafarisi ba ba botsa lipotso tse peli, ba re: “Na enoa ke mora oa lona eo le reng o tsoetsoe a foufetse? Joale, ho tla joang hore ebe oa bona hona joale?” Batsoali bao ba araba ka ho re: “Rea tseba hore enoa ke mora oa rona le hore o ile a tsoaloa a foufetse. Empa hore na ho tla joang hore ebe oa bona hona joale ha re tsebe, kapa hore na ke mang ea butseng mahlo a hae ha re tsebe.” Le haeba mora oa bona a ne a ba boleletse hore na ho etsahetse’ng, batsoali bao ba seli ha ba araba. Ba re: “Mo botseng. O lilemong. O tla ipuella.”​—Johanne 9:​19-21.

Ka lebaka leo, Bafarisi ba bitsa monna eo hape ’me ba mo tšosa ka hore ba na le bopaki bo ka behang Jesu ka mosing. Ba re ho eena: “Tlotlisa Molimo. Rea tseba hore monna enoa ke moetsalibe.” Monna eo o qhela qoso ea bona ka ho re: “Hore na ke moetsalibe ha ke tsebe.” O phaella ka ho re: “Ntho e le ’ngoe eo ke hlileng ke e tsebang, ke hore, le hoja ke ne ke foufetse, hona joale kea bona.”​—Johanne 9:​24, 25.

Bafarisi ba sitoa ho tela, kahoo ba mo botsa hape ba re: “O entse’ng ho uena? O butse mahlo a hao joang?” Ka sebete monna eo o ba araba ka ho re: “Ke se ke le boleletse, ’me leha ho le joalo ha lea ka la mamela. Ke hobane’ng ha le batla ho utloa seo hape? Le lona ha le batle ho ba barutuoa ba hae, na ha ho joalo?” Ka bohale bohle, Bafarisi bao ba re: “U morutuoa oa monna eo, empa rona re barutuoa ba Moshe. Rea tseba hore Molimo o buile le Moshe, empa ha e le monna enoa, ha re tsebe hore na o tsoa hokae.”​—Johanne 9:​26-29.

Monna enoa ha a kholoe seo a se utloang. O re: “Ka sebele ona ke mohlolo, hore ha le tsebe hore na o tsoa hokae, ’me leha ho le joalo o butse mahlo a ka.” Monna eo o tsoela pele ho kalla nyeoe ea hae ka ho hlalosa hore na Molimo o mamela batho ba joang, o re: “Rea tseba hore Molimo ha a mamele baetsalibe, empa haeba leha e le mang a tšaba Molimo ’me a etsa thato ea hae, oa mo mamela. Ho tloha khale ha ho e-s’o ka ho utloahala hore leha e le mang o kile a bula mahlo a ea tsoetsoeng a foufetse.” Ha a fera taba ea hae o re: “Haeba monna enoa a ne a sa tsoe ho Molimo, ho hang o ne a ke ke a etsa letho.”​—Johanne 9:​30-33.

Bafarisi ba tsielehile kaha ha ba tsebe hore na ba ka araba ka ho reng. Kahoo baa mo hlapaola ba re: “U tsoaletsoe libeng ka ho feletseng, ’me leha ho le joalo na oa re ruta?” Joale baa mo leleka.​—Johanne 9:34.

Ha Jesu a utloa taba ena, o batla monna eo ’me oa mo botsa o re: “Na u [behile] tumelo ho Mor’a motho?” Monna eo o re: “Eo ke mang, mohlomphehi, e le hore nka beha tumelo ho eena?” A sa hlathe koana le koana, Jesu oa mo araba o re: “U mo bone ’me, ntle ho moo, ea buang le uena ke eena eo.”​—Johanne 9:​35-37.

Monna eo o re: “Ke hlile ke beha tumelo ho eena, Morena.” Ka tlhompho eohle, monna eo o inama ka pel’a Jesu ’me Jesu o re: “Ke tlile lefatšeng lena bakeng sa kahlolo ena: e le hore ba sa boneng ba ka bona ’me ba bonang e ka ba ba foufetseng.”​—Johanne 9:​38, 39.

Ha Jesu a ntse a bua, Bafarisi ba mametse, ’me baa tseba hore ha se lifofu. Leha ho le joalo, ba belaela hore Jesu o bua ka hore ba tataisetsa batho tseleng e fosahetseng. E le ho itšireletsa, baa mo botsa ba re: “Le rona ha rea foufala, na ha ho joalo?” Jesu o re: “Haeba le ne le foufetse, le ka be le se na sebe. Empa joale le re, ‘Rea bona.’ Sebe sa lona sea sala.” (Johanne 9:​40, 41) Haeba Bafarisi e ne e se mesuoe, e ne e ka ’na ea e-ba ntho e utloahalang hore ba hane hore Jesu ke Mesia. Leha ho le joalo, kaha ba tseba Molao, ba etsa sebe se tebileng ha ba hana hore ke Mesia.