Selemo sa 2020 se bile le likoluoa tse ngata tsa tlhaho, tse qalileng ka seoa sa COVID-19 se ileng sa ama lefatše lohle. Lipaki Tsa Jehova li ile tsa thusa ba amehileng joang?

 Selemong sa tšebeletso sa 2020, a Komiti ea Bohokahanyi ea Sehlopha se Busang e fane ka tumello ea hore ho sebelisoe chelete e fetang limilione tse 430 tsa Maluti bakeng sa ho thusa ba oetsoeng ke likoluoa. Ho ile ha thusoa batho ba annogoeng ke likoluoa tse fetang 200 ho akarelletsa seoa sa COVID-19, maholiotsoana, likhohola Afrika, tlala Venezuela, le komello Zimbabwe. Menehelo e ile ea sebelisetsoa ho lefella lijo, metsi, bolulo, liaparo, lithuso tsa bongaka, lintho tse hloekisang, le ho haha kapa ho lokisa matlo a senyehileng. Mehlala ea taba eo ke ena.

 COVID-19. Lefatšeng lohle, seoa sena se ile sa thefula bara le barali ba bo rona ’meleng, maikutlong esita le moruong. Ho ile ha thehoa Likomiti Tsa Liphallelo tse fetang 800 bakeng sa ho thusa bara le barali ba bo rona. Bara ba bo rona ba likomiting tseo, ba ne ba sheba hore na bara le barali ba bo rona ba hloka’ng ebe ba tlalehela Komiti ea Bohokahanyi e le hore e ka ba tataisa hore na ba thuse bara le barali ba bo rona joang.

 Selemo kaofela, likomiti tsena li ile tsa thusa bara le barali ba bo rona ba bangata hore ba fumane lijo, metsi, lintho tse hloekisang le meriana. Libakeng tse ling, likomiti tsena li ne li sebetsa le baholo ho thusa bara le barali ba bo rona ho fumana lithuso tseo mebuso e fanang ka tsona.

 Esita le batho bao eseng Lipaki, ba bone mosebetsi oo re o etsang oa liphallelo. Mohlala, Field Simwinga eo eleng mokomishinara oa setereke Nakode, Zambia, o ile a re ho bara ba bo rona: “Re leboha thuso e nakong eo le faneng ka eona ho thusa malapa a amehileng.”

 Tlala Angola. Ka lebaka la seoa sa COVID-19, batho ba bangata Angola ba ne ba se na lijo ebile theko ea tsona e ne e phahame hona hoo. Bara le barali ba bo rona ba bangata ba ne ba thatafalloa ho reka lijo.

 Lekala la Brazil le ile la kopuoa hore le romele lijo ho bara ba bo rona ba Angola. E le hore ho sebelisoe menehelo ea liphallelo hantle, bara ba bo rona ba ile ba batlisisa mekhoa e sa bitseng haholo ea ho reka le ho romela lijo, hape ba ne ba li reka ka bongata. Sephutheloaneng ka seng sa lijo, ho ne ho sebelisitsoe chelete e ka bang M400 bakeng sa ho se reka le ho se tsamaisa. Empa se ne se ka ba boima ba lik’hilograma tse 20 ’me ka har’a sona ho e-na le raese, linaoa le oli. Ho tla fihlela joale, ho se ho rometsoe liphutheloana tse 33 544, eleng lintho tse etsang boima ba lithane tse 721. Lijo tseo, ha li kopana le tse rekiloeng sebakeng ka seng se amehileng, li ile tsa fuoa bara le barali ba bo rona ba fetang 50 000!

 Bara le barali ba bo rona ba ikutloa joang ka liphallelo tsee? Alexandre ea lulang karolong e hole ea Angola o re: “Liphallelo tsena li mpontšitse hore Jehova oa nthata ebile ha ke mong. Mokhatlo o nka ke le motho oa bohlokoa!” Mariza, eleng ’mè ea holisang bana a le mong, o re: “Jehova o utloile thapelo eaka. Kea mo leboha ka mokhatlo oa hae.”

 Ho Thusa Nakong ea Komello Zimbabwe. Selemong tšebeletso sa 2020, Zimbabwe e ile ea otloa ke komello, ea siea maphako a batho ba limilione a uba ke tlala. Lipaki Tsa Jehova tse likete li ile tsa haelloa ke lijo.

 Ho ile ha thehoa likomiti tse hlano tsa liphallelo bakeng sa ho thusa. Bahoeletsi ba bangata ba ile ba thusana ka ho paka lijo le ho laolla kapa ba kalimana ka likoloi tsa bona. b Selemong sa tšebeletso sa 2020, ho ile ha sebelisoa chelete e ka holimo ho limilione tse leshome tsa Maluti ho fa bara le barali ba bo rona ba fetang 22 700 lijo.

 Ka linako tse ling, ha ho fihla liphallelo, bara ba bo rona ba ne ba se na letho leo ba le jang. Ha lijo tseo li fihla, ba leboha Jehova. Ba bang ba ile ba qalella ho bina lipina tsa ’Muso.

 Sebakeng se seng, Lipaki tse peli tse hlokahalletsoeng ke balekane li ile tsa ea pitsong moo ho neng ho il’o buuoa ka liphallelo tse fanoang ke mekhatlo eo eseng ea ’muso (NGO). Empa batho ba pitsong eo, ba ile ba qala ho bua ka lipolotiki kahoo barali ba bo rona bao ba etsa qeto ea hore ba ke ke ba amohela liphallelo tseo. Eitse ha ba tsamaea pitsong eo, batho ba ile ba ba soma ba re: “Re se ke be ra le bona le khutla le tl’o re batla lijo!” Libeke tse peli hamorao, bara ba bo rona ba ile ba tlisa liphallelo ho barali bao ba bo rona, le pele mekhatlo eane e fana ka tsona!

 Liphallelo tse ileng tsa fanoa Zimbabwe li entse hore batho ba bue hantle ka rona. Mohlala o mong ke oa Prisca ea lulang motseng o mong o monyane. Le har’a mathata a bakiloeng ke komello, Prisca o ne a sebelisa letsatsi la Laboraro le la Labohlano bakeng sa ho bua le batho ka Bibele. O ne a etsa joalo esita le nako eo ho neng ho lengoa. Batho ba motseng oa habo ba ne ba mo soma ba re: “Lelapa la hao le tl’o lapa ka lebaka la mosebetsi ona oa hao.” Prisca o ne a ba araba a re: “Jehova a ke ke a soetsa bahlanka ba hae.” Ka mor’a nako, o ile a fumana liphallelo tse tsoang mokhatlong oa rona. Baahisane ba ne ba maketse hoo ba ileng ba re: “Molimo haa u soetsa, le rona re batla ho ithuta ka eena.” Batho ba supileng motseng moo hona joale ba mamela liboka tse hasoang seea-le-moeeng.

 Ha bofelo bo ntse bo atamela, likoluoa tsa tlhaho li tla tsoela pele li ntse li etsahala. (Matheu 24:​3, 7) Re leboha haholo ka menehelo eo le e ntšang ka mekhoa e sa tšoaneng ho donate.mt1130.com. Menehelo eo e tla sebelisetsoa ho thusa ba hlokang thuso.