SEHLOOHO SE KA NTLE | HO TLILE JOANG HORE EBE BIBELE E NTSE E LE TENG?
Molaetsa oa Bibele ha oa ka oa Bola
BOTHATA: Bangoli ba Bibele le bakopitsi ba mehleng ea khale ba ne ba ngolla holim’a loli le matlalo a ho ngolla. * (2 Timothea 4:13) Ke hobane’ng ha ho ka thoe Bibele e ne e le kotsing ha e ngolloa linthong tseo?
Maqephe a loli a taboha habonolo, aa thunya a bile aa khathala. Bo-rahistori ba bang ba re: “Ha leqephe le bola le siea likhoele le phofo. Haeba maqephe ao a bolokiloe, a ka mela hlobo kapa a bole haeba a tšeloa ke metsi. Haeba a tseteloa a ka jeoa ke litali kapa likokoanyana, haholo-holo masetlaoko.” Maqephe a mang a loli a ileng a fumanoa eaba a behoa letsatsing le moo ho leng mongobo, a ile a senyeha kapele le ho feta.
Matlalo a ho ngolla a tšoarella ho feta maqephe a loli, empa le ’ona a ka senyeha haeba a sa tšoaroa hantle kapa a le moo ho chesang kapa ho batang haholo, ho le mongobo kapa ho le letsatsi. * Matlalo a ho ngolla le ’ona a ratoa ke likokoanyana. Kahoo, buka e ’ngoe e buang ka liketsahalo tsa mehleng ea khale e re: “Ha hoa tloaeleha hore lingoliloeng tsa mehleng ea khale li lule li le teng.” Hoja maqephe a Bibele a ile a bola, molaetsa oa eona o ka be o ile oa fela le ’ona.
HO TLILE JOANG HORE EBE BIBELE E NTSE E LE TENG?: Molao oa Bajuda o ne o tlama morena e mong le e mong hore “a ingolle bukeng kopi ea molao ona,” e leng libuka tsa pele tse hlano tsa Bibele. (Deuteronoma 17:18) Hape, bakopitsi ba Bibele ba ile ba ngola meqolo e mengata hoo lilemong tsa 1 ho ea ho 100, Mangolo a neng a se a fumaneha ka lisynagogeng tsa Iseraele esita le ho ea fihla Macedonia! (Luka 4:16, 17; Liketso 17:11) Ho tlile joang hore ebe meqolo e meng ea khale e ntse e le teng le mehleng ee?
Meqolo e tsejoang e le ea Leoatleng le Shoeleng e ile ea bolokeha ka lilemo tse makholo e lutse ka har’a linkho tsa letsopa tse behiloeng ka mahaheng moo ho ommeng
Seithuti se seng sa Testamente e Ncha se re: “Bajuda ba ne ba tsebahala ka ho beha meqolo ea Mangolo ka har’a linkho e le ho e sireletsa.” Bakreste le bona ba ile ba tsoela pele ho etsa se tšoanang. Kahoo, ho ’nile ha fumanoa meqolo ea mehleng ea khale ka linkhong tsa letsopa, mahaheng le libakeng tse ommeng.
MELEMO E BILE EFE?: Hona joale ho ntse ho e-na le meqolo e likete ea mehleng ea khale. Ha ho buka e ’ngoe ea mehleng ea khale e nang le meqolo e mengata ho feta Bibele.
^ ser. 3 Maqephe a loli a ne a etsoa ka semela se phelang metsing se bitsoang loli. Matlalo a ho ngolla a ne a etsoa ka matlalo a liphoofolo.
^ ser. 5 Ho etsa mohlala, tokomane e saennoeng ea United States ea tokoloho e ne e ngoletsoe matlalong. Ka mor’a lilemo tse ka tlaase ho 250, mongolo oa eona o ne o se o sa bonahale.
Mohlomong u ka Rata le
MOLULA-QHOOA
Ho Fumanoe Letlotlo la Mehleng ea Boholo-Holo Thotobolong
Sekhechana sa Rylands sa Kosepele ea Johanne ke sona sa khale ka ho fetisisa sa Mangolo a Segerike a Bakreste se kileng sa fumanoa.
MOLULA-QHOOA
Letlotlo le Patehileng ka Makholo a Lilemo
Ithute kamoo ho ileng ha sibolloa Bibele ea Segeorgia ea khale ka ho fetisisa e tsejoang.
