Ke’ng e entseng hore u rate saense?

Ha ke sa le ngoana, ke ne ke rata lintho tsa tlhaho. Ke hōletse motseng o motle oa Richterswil o pel’a Letša la Zurich, Switzerland. Ha batsoali ba ka le baholoane ba ka ba il’o otlolla maoto, ba ne ba tsamaea le ’na, ’me ba ntlhalosetsa ka liphoofolo le limela tseo re li bonang ha re ntse re tsamaea.

Ke hobane’ng ha u ile ua ithutela ho ba ngaka ea masapo?

Ntate o ile a qeta nakoana a sebetsa sepetlele, a thusa bakuli ba il’o buuoa. Seo a neng a se bona se ile sa mo susumelletsa hore a bue ka cheseho ka ho buoa. Cheseho ea hae e ile ea nkhahla hoo hamorao ke ileng ka khetha ho ithutela bongaka. Ke ile ka ithutela ho ba ngaka ea masapo hobane ke rata tsela eo masapo a sebetsang ka eona. Lingaka tsa masapo li lokela ho nahana joaloka baenjiniere e le hore li tsebe ho lokisa masapo le mesifa e re thusang ho tsamaea.

Ho feta moo, ke thabela ho bona bakuli ba ka ba hlaphoheloa. Ke rata ho sebetsa le batho.

Ke hobane’ng ha u ne u belaela hore Molimo o teng?

Ke qalile ho belaela hore Molimo o teng ha ke sa le mocha, ’me ho na le mabaka a mabeli a bakileng seo. La pele, ke ile ka hlokomela hore baruti ba bang kerekeng ba itšoere hampe, ’me seo se ile sa ntšoenya haholo. La bobeli ke hore ha ke le sekolong, matichere a baeloji a ne a lumela khopolo ea ho iphetola ha lintho—’me ka amohela khopolo eo, haholo-holo ha ke le univesithi.

Ke hobane’ng ha u ile ua amohela khopolo ea ho iphetola ha lintho?

Ke ne ke lumela seo baprofesa ba se buang. Ho phaella moo, ke ne ke nahana hore ho tšoana ho teng liphoofolong tsa mefuta e itseng ho bontša hore li na le moholo-holo a le mong, ’me ho tšehetsa taba ea hore liphetoho  tse bang teng liphatseng tsa lefutso li hlahisa mefuta e mecha.

Empa ha nako e ntse e ea, u ile ua fetola maikutlo. Hobane’ng?

Motsoalle e mong oa ka o ile a ’memela libokeng tsa Lipaki Tsa Jehova. Ke ile ka khahloa ke tsela eo phutheho e neng e le botsoalle ka eona le lipuo tse rutang. Hamorao, ’mè e mong ea mosa ea kopanelang phuthehong eo o ile a nketela, ’me ke ile ka mo botsa: “Nka kholiseha joang hore Bibele e bua ’nete?”

O ile a mpontša boprofeta ba Bibele bo buang ka liketsahalo tse ngata tse khethollang mehla ea rōna. Mohlala o mong ke oa boprofeta ba Jesu ba hore matsatsi a ho qetela a lefatše lena a ne a tla tšoauoa ka lintoa tse akaretsang, “litšisinyeho tse khōlō tsa lefatše,” ho ata ha “mafu a seoa le likhaello tsa lijo.” * O ile a boela a mpontša boprofeta bo boletseng esale pele ka ho hlepha ha boitšoaro, ho ata ha meharo le liketso tse ling tse mpe tseo re li bonang kajeno. * Ka mor’a nakoana, ke ile ka qala ho ithuta Bibele ka tieo, ’me ka hlokomela hore lintho tseo e li boletseng esale pele lia phethahala kamehla. Ke ile ka boela ka qala ho hlahloba seo ke se lumelang ka qaleho ea bophelo.

Na ho ithutela bongaka ho u thusitse ho utloisisa qaleho ea bophelo?

E, ho nthusitse. Ha ke qala ho ithuta Bibele, ke ne ke ntse ke batlisisa ka opereishene ea lengole. Ho elella lilemong tsa bo-1970, bo-rasaense ba ile ba qala ho utloisisa haholoanyane tsela e rarahaneng eo lengole le sebetsang ka eona. Ba ile ba hlokomela hore lengole ha le kobehe joaloka sehokelo sa monyako. Ho e-na le hoo, le sebetsa ka tsela e hlollang, e re nolofalletsang ho tsamaea, ho tantša le ho etsa lintho tse ling tse ngata.

Bafuputsi ba qetile lilemo tse ka bang 40, ba ntse ba leka ho etsa lengole la maiketsetso. Empa ba thatafalloa ho etsisa tsela e rarahaneng eo lengole la motho le sebetsang ka eona. Ho feta moo, lengole la maiketsetso ha le tšoarelle nako e telele joaloka mangole a rōna. Kaha hona joale baetsi ba lengole ba sebelisa thepa e tsoetseng pele, baa thaba haeba le ka la tšoarella lilemo tse 20. Empa rōna mangole a rōna a entsoe ka lisele tse phelang tse lulang li nchafala. Ke nka hore tsela eo lengole le sebetsang ka eona, e bontša hore ha le ea ba teng ka ho iphetola ha lintho, empa le bile teng ka bohlale ba Molimo.

U nahana’ng ka liphetoho tse bang teng liphatseng tsa lefutso le ka mefuta e tšoanang ea liphoofolo le limela?

Seo se bontša hore li na le Moqapi a le mong. Ho feta moo, liphetoho tse bang teng liphatseng tsa lefutso ha li ntlafatse tsela eo lintho tse phelang li entsoeng ka eona ka ho li etsa hore e be tsa mofuta o phahameng. Ho e-na le hoo, li atisa ho senya liphatsa tsa lefutso. Ke ’nete hore boemo bo sa reroang bo ka ’na ba tlisa molemo o itseng—joalokaha terene e ka thula borokho ’me ea bo senya, eaba seo se sireletsa motse hore o se ke oa hlaseloa ke masole. Empa seo se ke ke sa ntlafatsa motse. Ka ho tšoanang, liphetoho tse bang teng liphatseng tsa lefutso ha li ntlafatse sebōpeho sa lintho tse phelang. ’Me li ke ke tsa hlahisa ntho e entsoeng ka boqhetseke joaloka lengole la motho—re se re sa re letho ka likarolo tse ling tsa ’mele.

Ke hobane’ng ha u ile ua ba Paki ea Jehova?

Ha ke qala ho sebelisa melao-motheo ea Bibele, bophelo ba ka bo ile ba ntlafala haholo. Ho phaella moo, ka 2003, ke ile ka ea kopanong ea machaba ea Lipaki Tsa Jehova, ’me ha ke le moo ka bona batho ba momahaneng joalokaha eka ke lelapa, le hoja ba ne ba qala ho kopana. Ba ile ba bontšana lerato la sebele, ’me ke ne ke batla ho ba karolo ea bona.