“Ha le tlohela taelo ea Molimo, le khomarela neano ea batho.”—Mareka 7:8.

SEO BIBELE E SE BUANG

Batho ba na le ‘tlhoko ea tlhaho ea moea’ eo ba ka e khotsofatsang ka ho rapela Molimo. (Matheu 5:3) E le ho leka ho khotsofatsa tlhoko eo, batho ba iketselitse malumeli a mangata a thehiloeng maikutlong a bona ho e-na le a Molimo.

Ka mohlala, ha Bibele e bua ka sehlopha se seng sa bolumeli sa lekholong la pele la lilemo e re: “Ba chesehela Molimo; empa eseng ho ea ka tsebo e nepahetseng. Etsoe, ka lebaka la ho se tsebe ho loka ha Molimo empa ba batla ho tiisa ha bona, ha baa ka ba ipeha tlas’a ho loka ha Molimo.” (Baroma 10:2, 3) Ka ho tšoanang, kajeno malumeli a mangata a “ruta litaelo tsa batho e le lithuto.”—Mareka 7:7.

“A re nahanelaneng hore re susumeletsane leratong le mesebetsing e metle, re sa tlohele ho bokana ha rōna.”—Baheberu 10:24, 25.

SEO BIBELE E SE BUANG

Baheberu 10:25 e sebelisa mantsoe a reng “re sa tlohele ho bokana ha rōna.” Mantsoe ao a bontša hore Molimo o batla hore batho ba bokane hammoho e le sehlopha se hlophisitsoeng sa barapeli. Empa na morapeli e mong le e mong o ne a tla ba le tlhaloso ea hae ea hore na Molimo ke mang le hore o batla eng? Che. Bibele e re bohle ba rapelang ka tsela eo Molimo a e amohelang ba lokela hore ‘kaofela ba bue ka tumellano’ ’me ba “kopane ka ho loketseng kelellong e tšoanang le mokhoeng o tšoanang oa ho nahana.” (1 Bakorinthe 1:10) Ba ne ba tla hlophisoa ka liphutheho ’me ba be “le lerato bakeng sa mokhatlo oohle oa barab’abo rōna” lefatšeng lohle. (1 Petrose 2:17; 1 Bakorinthe 11:16) Ho hlokahala borapeli bo momahaneng le bo hlophisehileng joalo bakeng sa ho khahlisa Molimo.

“Bohle ba tla tseba ka sena hore le barutuoa ba ka, haeba le e-na le lerato har’a lōna.”—Johanne 13:35.

SEO BIBELE E SE BUANG

Ha Bibele e hlalosa hore na re ka khetholla bolumeli ba ’nete joang e re: “Le tla ba tseba ka litholoana tsa bona. Le ka mohla batho ha ba bokelle morara meutloeng kapa lifeiga hlabahlabaneng, na ha ho joalo?” (Matheu 7:16) Ha ho hlokahale hore motho e be setsebi sa lifate e le hore a khone ho bona phapang pakeng tsa sefate sa feiga le hlaba-hlabane; ka ho tšoanang, ha ho hlokahale hore u be setsebi sa bolumeli e le hore u khone ho khetholla ba ’nete ho ba bohata. Tse ling tsa litholoana tse khethollang bolumeli ba ’nete kapa likarolo tse bo khethollang ke life?

• Bolumeli ba ’nete bo ruta ’nete e tsoang Lentsoeng la Molimo, e leng Bibele. (Johanne 4:24; 17:17) Ha ea thehoa lifilosofing tsa batho.

• Bolumeli ba ’nete bo thusa batho ho tseba Molimo, ho akarelletsa le lebitso la hae, e leng Jehova.—Johanne 17:3, 6.

• Bolumeli ba ’nete bo buella ’Muso oa Molimo e le oona feela tšepo ea batho, eseng puso ea motho.—Matheu 10:7; 24:14.

• Bolumeli ba ’nete bo khothalletsa lerato la sebele. (Johanne 13:35) Bo ruta batho ho hlompha batho ba merabe eohle, ho sebelisa nako le maruo a bona molemong oa ho thusa ba bang le ho se kenele lintoa.—Mikea 4:1-4.

• Bolumeli ba ’nete ke mokhoa oa bophelo, eseng feela tloaelo kapa mosebetsi. Litho tsa bona li latela seo li se rutang.—Baroma 2:21; 1 Johanne 3:18.

Lipaki Tsa Jehova, e leng bahatisi ba makasine ena, li loanela ho hlompha Molimo ka lipuo tsa tsona le ka boitšoaro ba tsona. Re u khothalletsa hore u li etele libokeng tsa tsona Holong ea ’Muso ’me u iponele ka bouena.