Mapolesa a mang a sebelisa theknoloji ho etsa hore ho lelekisa likoloi ho se ke ha e-ba kotsi haholo. Mokhoa o mong oo ba etsang sena ka oona, ke ho kenya likoloi tsa bona ntho e khonang ho betsa koloi e lelekisoang ka sesebelisoa sa GPS se khomarelang koloing eo ’me seo se thusa mapolesa hore a tsebe moo koloi eo e leng teng. E leng se etsang hore a se ke a lelekisa babelaelloa ka lebelo le phahameng.

Ho hakanngoa hore hora e ’ngoe le e ’ngoe ho bolaoa mosali a le mong ka lebaka la litsekisano tse mabapi le chelete ea bohali. Le hoja moetlo oo o sa lumelloe ke molao, ka 2012 ho ile ha bolaoa basali ba fetang 8 200, ka lebaka la hore monna kapa ba habo ba ne ba lumela hore chelete eo ba habo mosali ba e lefileng e ne e le nyane.

Mahaqasi a mehatla e melelele a mararo a ile a kenngoa lisensara tse nyenyane moo a ileng a tsoalla teng ’me lisensara tseo li ile tsa bontša hore linonyana tsena li ile tsa fofa ka matsatsi a fetang a 200 li sa khaotse, ha li ne li fallela Afrika. Nakong e fetileng ho ile ha tlalehoa hore sena se ne se etsoa ke liphoofolo tse phelang metsing feela.

Ho tloha ka April 2005 ho ea ho December 2012, masholu a maoatleng a ile a koetela likepe tse 179, lebōpong le Lenakeng la Afrika. Tlaleho ea World Bank e bolela hore ka lebaka la liketso tseo tsa tlōlo ea molao, masholu ao a ile a fumana chelete e etsang liranta tse libilione tse 4 ha a lokolla likepe tseo.