PHOOFOLO ena e tsomang bosiu e iketsetsa khanya—e etsang hore e se ke ea bonahala habonolo e le hore e tšoane le khanya ea khoeli le ea linaleli. E khona ho etsa joalo ka lebaka la ho sebelisana le baktheria e ntšang khanya. Ho sebelisana hona ho ka re tsoela molemo ka tsela e ka bonahalang eka ha e amane. Ho ka re thusa hore re be le bophelo bo botle.

Ak’u nahane: Bobtail squid sa Hawaii se lula metsing a hloekileng a lebōpo la Lihlekehleke Tsa Hawaii. Hangata khanya ea khoeli le ea linaleli e ne e ka etsa hore se bonahale ka ho hlaka ho liphoofolo tse ka se hlaselang tse ka tlas’a metsi. Empa se ntša khanya mpeng ea sona e bohale joaloka e bang teng bosiu. Sena se etsa hore se se ke sa bonahala ho hang esita le ka seriti feela. Mpa ea sona ea laeta hobane se na le baktheria e ntšang khanya e etsang hore se se ke sa bonahala.

Baktheria eo e ka boela ea laola linako tseo bobtail squid se robalang le ho tsoha ka tsona. Sena se khahla bafuputsi hobane kamano e teng pakeng tsa baktheria le se etsahalang ’meleng oa phoofolo ena letsatsi le leng le le leng, e ka ’na eaba e teng le linthong tse ling tse phelang. Ka mohlala, e ka ’na eaba baktheria e thusang liphoofolo ho sila lijo, e boetse e phetha karolo e itseng ho se etsahalang ’meleng oa tsona letsatsi le letsatsi. Litsebi li nahana hore khatello ea maikutlo, lefu la tsoekere, monono le ho se robale hantle, li sitisa se etsahalang ’meleng letsatsi le letsatsi. Kahoo, ho ithuta ka tsela eo baktheria e sebetsang ka eona ’meleng oa squid sena, ho ka etsa hore litsebi li bone hore ke joang ho ka etsang hore batho ba be le bophelo bo botle.

U nahana’ng ka see? Na karolo e khantšang ea bobtail squid sa Hawaii e bile teng ka ho iphetola ha lintho? Kapa na e entsoe?