Bafuputsi ba Milan, Italy, ba fihletse qeto ea hore masea a hlahileng pele ho nako a rua molemo ha a utloa lentsoe la ’mè ka sesebelisoa se fasoang letsohong la lesea. Sesebelisoa sena se etsisa tsela eo lesea le neng le mamela lentsoe la ’mè ka eona ha le ntse le le ka popelong. Phuputso eo e phethela ka ho re: “Lesea le rua molemo haholo haeba mokhoa ona o sebelisoa esale nako.”

SEO BIBELE E SE BUANG: “Ke tšelisitse ’me ke khutsisitse moea oa ka joaloka ngoana ea sa tsoa khoesoa ha a le ho ’m’ae.”—Pesaleme ea 131:2.

Ho latela phuputso e entsoeng ho bana ba 565 ba Netherlands, bana bao batsoali ba bona ba reng ba “bohlokoa ho feta ba bang” le bao batsoali ba nkang hore ba “hloka tlhokomelo e khethehileng,” ba bonahetse ba na le boithati ho feta bana ba bang. Mookameli oa phuputso eo o re: “Bana baa lumela ha batsoali ba re ke ba bohlokoa ho feta bana ba bang. Sena se ke ke sa ba tsoela molemo kapa hona hore se tsoele batho ba bang molemo.”

SEO BIBELE E SE BUANG: “Ke bolella e mong le e mong moo har’a lōna hore a se ke a inahana haholo ho feta kamoo ho hlokahalang ho nahana; empa a nahane e le hore a be le kelello e hlaphohileng.”—Baroma 12:3.

Tlaleho e fanoeng ke Univesithi ea Heidelberg e Jeremane e re le hoja maqheku a lilemo li lekholo a kula a bile a sa khone ho etsa lintho tse itseng, a ntse a batla ho phela. Ho maqheku a mane, a mararo ho ’ona a leka ka hohle hore a ’ne a phele. A ne a boetse a phetha lintho tseo a neng a itse a tla li etsa, a khothetse, a na le tšepo, a na le morero bophelong ’me a ntse a phetha meetlo le lintho tsa bolumeli.

SEO U KA NAHANANG KA SONA: Ho latela lengolo la Moeklesia 3:11, taba ea hore Molimo o kentse ka ho rōna takatso ea ho phela, e bontša’ng?