NAHANA KA MOHLALA ONA: A re re u sebakeng seo ho sona ho bokeletsoeng litšepe tsa khale tse seng li sa sebelisoe hobane li tsofetse. Kaofela li senyehile, tse ling li rusitse ebile li phunyehile masoba. Ha u re heli! u bona e ’ngoe e ntseng e le ntle, e benya ebile eka e ncha. Ha u botsa ka eona, motho ea sebetsang moo o u bolella hore e tsofetse ho feta tsohle tse teng ka moo. Ebile o tsoela pele ho u hlalosetsa hore ke khale e otloa ke marole le lipula le hore ha se joale batho ba leka ho e senya, empa e ntse e le ntle. Na u ka se batle ho tseba hore na ke hobane’ng ha eona e e-s’o senyehe le hore na e fapana joang le tsee tse ling?

Bibele e tšoana le tšepe ena e ntle kaha e ngotsoe khale ho feta libuka tse ngata tse teng mehleng ena. Ha se hore Bibele ke eona feela buka ea khale e teng hona joale. Empa tsena tse ling li tšoana le litšepe tsane tse rusitseng kaha molaetsa oa tsona ha o sa na molemo, ebile tse ling tse ngotsoeng ka morao ho tsona li bua litaba tse pakang hore tseo tsa pele li ne li fosahetse. Hona joale ho ka ba kotsi ho mamela likeletso tse hlahang libukeng tseo tsa khale. Tse ling molaetsa oa tsona ha o sa felletse hobane maqephe a mang ha a sa le eo.

Le hona joale Bibele e ntse e le buka e ikhethang. E ntse e le teng ebile e felletse le hoja e ngotsoe lilemo tse fetang 3 500 tse fetileng. Likeletso tse ka ho eona li ntse li le molemo ebile li ntse li felletse le mehleng ena le hoja batho ba lekile ho e senya. Ha e tšoane le libuka tse ngata tse ngotsoeng hong le eona. Molaetsa oa eona o paka hore e molemo haholo.—Sheba lebokose le reng “Bibele e Bua Litaba le Pele Batho ba li Tseba”.

Kaha Bibele ke buka ea khale, batho ba bang baa ipotsa hore na e ka hla ea ba thusa. E le hore u tsebe hore na e ka thusa batho mehleng ena, u ka nahana ka lipotso tse kang: ‘Mathata a maholo ao batho ba nang le ’ona ke afe? Ke bothata bofe ho ’ona boo ke bo tšabang haholo?’ Mohlomong ke tlolo ea molao, bobolu, lefu kapa bokuli. Sehloohong sena re tl’o ithuta hore na Bibele e ka re thusa joang mathateng ana ao re nang le ’ona. Ha u ntse u se bala, leka ho nahana hore na lefatšeng ho ka be ho le joang hoja batho ba ne ba mamela keletso ea Bibele.

HO RATA KHOTSO

“Ho thaba ba nang le khotso, kaha ba tla bitsoa ‘bara ba Molimo.’” (Matheu 5:9) “Haeba ho khoneha, ho fihlela moo ho itšetlehileng ka lōna, le be le khotso le batho bohle.”—Baroma 12:18.

MOHAU LE HO TŠOARELA

“Ho thaba ba mohau, kaha ba tla bontšoa mohau.” (Matheu 5:7) “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova * a ile a le tšoarela ka bolokolohi, le etse joalo le lōna.”—Bakolose 3:13.

HO RATA BATHO BA MERABE E MENG

Molimo “o entse ho tsoa mothong a le mong sechaba se seng le se seng sa batho, ho lula holim’a lefatše lohle.” (Liketso 17:26) “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.”—Liketso 10:34, 35.

HO BOLOKA LEFATŠE LE HLOEKILE

“Jehova Molimo a nka motho a mo beha serapeng sa Edene ho se lema le ho se hlokomela.” (Genese 2:15) Molimo o tla “felisa ba senyang lefatše.”—Tšenolo 11:18.

HO HLOEA MEHARO LE BOITŠOARO BO BOBE

“Le itebele khahlanong le ho chacheha ka mohono ha mofuta o mong le o mong, hobane esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.” (Luka 12:15) “Bohlola le ho se hloeke ha mofuta o mong le o mong kapa meharo le ho boleloa li se ke tsa boleloa har’a lōna, feela joalokaha ho tšoanela batho ba halalelang.”—Baefese 5:3.

HO TŠEPAHALA LE HO SEBETSA KA THATA

“Re lakatsa ho itšoara ka botšepehi linthong tsohle.” (Baheberu 13:18) “Ea utsoang a se ke a hlola a utsoa, empa ho e-na le hoo, a sebetse ka thata.”—Baefese 4:28.

HO THUSA BATHO BA HLOKANG

“Le bue ka mokhoa o tšelisang le meea e tepeletseng maikutlo, le tšehetse ba fokolang, le be le tiisetso ho bohle.” (1 Bathesalonika 5:14) Le ‘hlokomele likhutsana le bahlolohali matšoenyehong a bona.’—Jakobo 1:27.

Bibele ha e re fe likeletso tsena ebe ke phetho. E boetse e re thusa ho bona hore na re ka li sebelisa joang. Hoja ebe batho bohle ba ne ba mamela likeletso tsena tsa Bibele, re ka be re se na mathata a  mangata hakana. Ka lebaka la mathata ana a teng hona joale, batho ba hloka keletso ea Bibele haholo. E ka re thusa joang?

Motho ea bohlale ka ho fetisisa ea kileng a phela lefatšeng mona o kile a re: “Bohlale bo pakoa ke mesebetsi ea bona hore bo lokile.” (Matheu 11:19) Motho e mong le e mong oa tseba hore motho ea bohlale o bonoa ka liketso. Ka lebaka lena, ha u bala Bibele u ka lebella ho bona ha e u thusa kaha e re e na le likeletso tse molemo. U ka boela oa lebella ho bona e u thusa ho rarolla mathata ao u nang le ’ona. Re tl’o bona kamoo e ileng ea thusa batho ba bang.

’Mè ’Mathabo * o ne a phela hamonate le lelapa la hae. Ka ho panya ha leihlo, o ile a lahleheloa ke lintho tsohle tseo a neng a e-na le tsona. O ile a felloa ke chelete, ba arohana le monna a ba a hlokahalloa ke morali oa hae ea neng a ntse a le mocha. O re o ne a ikutloa eka o lahlehile ha a se a se na morali, monna le ntlo, a se na matla a ho etsa letho a bile a sa bone le hore na o tla tsoa le hokae.

O ne a bona hore mantsoe ana ke ’nete: “Matsatsi a lilemo tsa rōna ke lilemo tse mashome a supileng; haeba e le ka lebaka la matla a khethehileng e ba lilemo tse mashome a robeli, empa leha ho le joalo a  tsitlella khathatsong le linthong tse kotsi; etsoe a lokela ho feta kapele.”—Pesaleme ea 90:10.

Nakong ena, o ile a tšelisoa ke ho bala Bibele. E ile ea mo thusa haholo. Ha se ’Mè ’Mathabo feela eo Bibele e mo thusitseng. Lihloohong tse latelang re tl’o bona mehlala e meng e mengata. Batho bana kaofela ba nka Bibele e tšoana le tšepe e ntle eo ho builoeng ka eona qalong. Ha e felloe ke nako kapa hona ho tsofala. Ebe hobane’ng? Na ke hobane e ngotsoe ka tsela e fapaneng le eo libuka tse ling li ngotsoeng ka eona? Mohlomong ke hobane molaetsa oa eona o tsoa ho Molimo.—1 Bathesalonika 2:13.

Ho ka etsahala hore ebe le uena u bona re e-na le mathata a mangata haholo le hoja re phela nako e khutšoanyane. U thusoa ke eng nakong eo u nang le mathata?

Makasineng ena re tl’o ithuta hore na Bibele e ka re thusa joang. E ka re ruta ho:

1. qoba mathata ha ho khoneha.

2. rarolla mathata a ka re hlahelang.

3. mamella mathata ao re ke keng ra a qoba.

Lihlooho tse latelang li tla hlalosa lintlha tsena tse tharo.