Rorisang ea lilemo li 20 o re: “Ke lula ke nyahame hobane ke futsitse lefu le etsang hore ke lule ke opeloa haholo.” Ntho e neng e mo tšoenya haholo ke hore ka linako tse ling o ne sa khone ho bala Bibele le ho etsa lintho tse ling tsa borapeli ba hae tseo a neng a tloaetse ho li etsa. Empa lengolo la Matheu 19:26 le ile la mo thusa haholo. Le re: “Lintho tsohle lia khoneha ho Molimo.” Kaha ho opeloa ha Rorisang ho ne ho mo sitisa ho bala, o ile a ithuta Bibele a sebelisa likhatiso tse mameloang tsa Bibele le tsa lingoliloeng tse thehiloeng ho eona. * O re : “Ho etsa joalo ho nthusitse hore ke lule ke rata Jehova haholo.”

Ka linako tse ling Rorisang o utloa bohloko hobane kaha oa kula, ha aa sa khona ho etsa lintho tse ngata tseo a neng a khona ho li etsa. Empa o tšelisoa ke mantsoe a hlahang lengolong la 2 Bakorinthe 8:12 le reng: “Etsoe haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.” Lengolo lena le ile la mo hopotsa hore Jehova o ntse a mo rata haholo hobane o etsa sohle se matleng a hae ho mo sebeletsa le hoja a thefutsoe ke ho kula.

’Mè ’Mathabo, eo ho builoeng ka eena sehloohong se fetileng, o re: “Ka mor’a hore ngoana oa ka oa ngoanana a hlokahale a le lilemo li 18, ke ne ke utloile bohloko hoo ke neng ke utloa hantle hore ke tl’o shoa.” O ile a tšelisoa haholo ke lengolo la Pesaleme ea 94:19 le reng: “Ha menahano ea ka e hlokisang botsitso e ngatafala ka hare ho ’na, matšeliso a hao a ile a qala ho hlabolla moea oa ka.” O tsoela pele ho re: “Ke ile ka rapela Jehova hore a nthuse ho bona hore na nka etsa eng e le hore bohloko ba ka bo kokobele.”

’Mè ’Mathabo o ile a phathahana ka ho etsa mosebetsi oa ho ithuta Bibele le batho. Ha nako e ntse e ea, a hlokomela hore le hoja a ne a utloile bohloko haholo, o ntse a ka etsa ho hong ho molemo bakeng sa batho. O re: “Ke ile ka hlokomela hore Jehova o ne a nthusa hobane ha ke ne ke balla batho bao ke ithutang Bibele le bona mangolo a Bibele ho ba tšelisa, le ’na ke ne ke tšeliseha haholo.” Eaba o ngola lethathamo la mabitso a batho ba hlahang ka Bibeleng ba ileng ba feta har’a mathata a boima. A hlokomela hore kaofela ha bona ba ne ba rapela Jehova ha ba le mathateng le hore re ka khona ho mamella mathata hafeela re bala Bibele.

Ha ’Mè ’Mathabo a ntse a ithuta Bibele, o ile a bona hore o lokela ho nahana haholo ka litlhohonolofatso tseo a tla li fumana, eseng ka mathata a mo hlahetseng. Lengolo la Liketso 24:15 le ile la mo tšelisa haholo ha le re: “Ho tla ba le tsoho ea ba lokileng le ba sa lokang.” Oa tseba hore Jehova o tla fela a tsose morali oa hae. O re: “Ke nahana ka nako eo ka eona Jehova a tla tsosa bafu hobane ke mohlang ke tla bona ngoana oa ka. Ekare kea mo bona a qeta ho tsosoa bafung, ke se ke lutse le eena ka jareteng. Ka kelellong ea ka, ke mo bona hantle feela joaloka ha ke ne ke qala ho mo bona ha a qeta ho hlaha.”