Lehloeo ke ho nyonya batho ba bang, ho se ba rate le ho ba bontša bora. Ke boikutlo bo fetang ba ho halefela motho ka nakoana fela.

Batho ba hloea ba bang ka mabaka a sa tšoaneng. Hangata ba ba hloea hobane e le ba morabe o itseng, eseng hobane ho e-na le ntho e mpe eo ba e entseng. Ba ka ’na ba hloea batho bao hobane ba nahana hore ba etsa lintho tse mpe, ba khopo ebile ba ke ke ba fetoha. Ba ka boela ba ba khella fatše, ba ba nka e le batho ba kotsi kapa ba bakelang batho ba bang mathata. Batho ba hloileng ba bang, ho ka etsahala hore ebile mahlatsipa a tlolo ea molao, ho hloka toka kapa ba ile ba angoa ke liketsahalo tse ileng tsa etsa hore ba bontše bora ho batho ba bang.

Ka linako tse ling batho ba hloea batho ba bang le hoja ba e-s’o kopane le bona. Ka mohlala, motho e mong a ka ikutloa ka tsela e tšoanang le ea ba lelapa le metsoalle ka morabe o itseng oa batho. Kahoo ka tsela ena lehloeo le khona ho tšoaetsana.

Ha re utloisisa hore na lehloeo le ata joang, re tla hlokomela hore na ke Hobane’ng ha batho ba bangata ba hloeane hakana. Leha ho le joalo, e le hore re tlohelle ho ba le lehloeo, re lokela ho tseba hore na le qalile joang. Re ka fumana karabo ka Bibeleng.

LEHLOEO HA LEA QALOA KE BATHO. Le qalile ha lengeloi le neng le le leholimong le e-ba khahlanong le Molimo ’me e e-ba lerabele. Lengeloi leo ha morao le ile la tsejoa e le Satane Diabolose. Diabolose “e ne e le ’molai ha a qala” ho fetohela Molimo. Kaha “o leshano ’me ke ntate oa leshano,” o tsoela pele ho susumetsa batho hore ba hloeane. (Johanne 8:​44; 1 Johanne 3:​11, 12) Bibele e mo hlalosa a le kotsi ebile a halefile haholo.​—Jobo 2:7; Tšenolo 12:​9, 12, 17.

HO BONOLO HORE BATHO BA BAETSALIBE BA BE LE LEHLOEO. Motho oa pele Adama, o ile a latela borabele ba Satane. Seo se ile sa etsa hore sebe se fetele ho batho bohle. (Baroma 5:​12) Mora oa Adama oa pele, e leng Kaine, o ile a bontša lehloeo ka hore a bolaee ngoan’a bo Abele. (1 Johanne 3:​12) Ke ’nete hore batho ba bontšana lerato le kutloelo-bohloko. Leha ho le joalo, ka lebaka la sebe seo re se futsitseng, batho ba bangata ha ba nahanele batho ba bang, ba mohono ebile baa ikhohomosa ’me lintho tsena li baka lehloeo.​—2 Timothea 3:​1-5.

HANGATA MOTHO EA SA RATENG BATHO BA BANG O BA LE LEHLOEO. Lefatše leo re phelang ho lona le hlohlelletsa lehloeo ka ho susumetsa batho hore ba se ke ba e-ba le mohau ba be ba ntše batho ba bang kotsi. Lintho tse kang ho se mamellane, ho khetholla ba bang, ho bua lintho tse mpe ka batho ba bang, ho hlorisa batho ba bang le ho senya lintho tsa bona, li teng hobane “lefatše lohle le rapaletse matleng a ea khopo,” e leng Satane Diabolose.​—1 Johanne 5:19.

Leha ho le joalo, Bibele ha e rute feela hore na lehloeo le qalile joang, e boetse e re ruta hore na re ka le hlola joang.