Ha ho motho ea tsebang hantle hore na Jesu o ne a shebahala joang. O ne a se na lifoto ebile ho se motho ea kileng a mo toroea. Empa o lula a hlaha livideong le litšoantšong.

Ha se hore batho ba etsang litšoantšo tsena baa tseba hore na o ne a shebahala joang. Empa hangata batho ha ba etsa litšoantšo tsa hae, ba li etsa ba susumetsoa ke lintho tseo ba li lumelang, meetlo ea bona le hore na motho ea rekang setšoantšo o batla hore se shebahale joang. Boholo ba litšoantšo tsena li etsa hore batho ba nahane ka Jesu e le motho ea fapaneng le eo e neng e hlile e le eena.

Tse ling li hlahisa Jesu e le motho ea moriri le litelu tse telele ea lulang a hlomohile. Tse ling tsona li mo hlahisa eka ke lengeloi, a pota-potiloe ke khanya kapa a lutse thoko haholo le batho ba bang. Empa na Jesu o ne a hlile a shebahala joalokaha a hlaha litšoantšong tseo? Bibele ke eona feela e ka re thusang ho tseba hore na litšoantšo tseo li nepahetse kapa che. E ka boela ea re thusa ho mo tseba hantle.

Jesu o ile a bua mantsoe ana a ka holimo ha a kolobetsoa. (Baheberu 10:5; Matheu 3:13-17) Ke ’mele o joang oo a neng a bua ka ’ona? Ka nako ena ho ne ho se ho fetile lilemo tse 30 lengeloi Gabriele le itse ho Maria: “U tla emola ka pōpelong ea hao u tsoale mora, . . . Mor’a Molimo.” (Luka 1:31, 35) Taba ena e bontša hore Jesu o hlahile a se na sebe feela joalokaha Adama le eena a ne a se na sebe ha a boptjoa. (Luka 3:38; 1 Bakorinthe 15:45) E tlameha ebe o ne a le motle a bile a tšoana le ’mè oa hae Maria.

Kaha Bajuda ba ne ba tloaetse ho ba le litelu, Jesu le eena o ne e-na le tsona. Ha motho a e-na le litelu a bile a li hlokometse hantle, e ne e le bopaki ba hore o makhethe ebile oa itlhompha. Ke Banazari feela ba neng ba holisa litelu. E mong oa bona e ne e le Samsone.—Numere 6:5; Baahloli 13:5.

Jesu o qetile lilemo tse ngata e le ’metli oa mapolanka, le hoja a ne a se na lisebelisoa tse etsang hore mosebetsi oo o be bobebe. (Mareka 6:3) E tlameha ebe o ne a shahlile. Ha a sa tsoa qala mosebetsi oa ho bolela ka ’Muso oa Molimo, o ile “a lelekela bohle ba nang le linku le likhomo ka ntle ho tempele, ’me a tšolla lichelete tsa tšepe tsa ba ananyang chelete le ho phethola litafole tsa bona” a le mong. (Johanne 2:14-17) Mosebetsi ona o ne o hloka motho ea koenneng. O ile a sebelisa ’mele ona oo a neng a o filoe ho phetha thomo ea Jehova, a ba a re: “Ke tla bolela litaba tse molemo tsa ’muso oa Molimo le metseng e meng, hobane ke rometsoe sena.” (Luka 4:43) Ho ne ho hlokahala motho ea phetseng hantle e le hore a khone ho tsamaea libaka tseo Jesu a li tsamaileng.

E tlameha ebe batho “bohle ba sehlang le ba imetsoeng” ba ile ba khothala haholo ha Jesu a bua mantsoe ana. (Matheu 11:28-30) Tsela eo a neng a le mosa ka eona e ne e etsa hore batho ba kholisehe hore ba tla fela ba khatholohe hafeela ba ithuta ho eena. Le bana ba ne ba batla ho ba haufi le Jesu. Bibele e re: “Eaba o sika bana bao.”—Mareka 10:13-16.

Jesu e ne e se motho ea hlonameng le hoja a ile a hlorisoa haholo pele a bolaoa. Bopaki ba taba ena re  bo bona ha a ne a etsa veine e le hore batho ba neng ba ile lechatong Kana ba thabe. (Johanne 2:1-11) Ka linako tse ling o ile a ruta batho lintho tseo ba neng ba ke ke ba li lebala.—Matheu 9:9-13; Johanne 12:1-8.

Batho ba neng ba mamela Jesu ha a ruta ba ne ba labalabela ho phela ba sa shoe. (Johanne 11:25, 26; 17:3) O ile a thaba haholo ha barutuoa ba hae ba 70 ba mo bolella hore na ba tsamaile joang mosebetsing oo a neng a ba laetse hore ba o etse. O ile a ba a re ho bona: “Le thabe kahobane mabitso a lōna a ngotsoe maholimong.”—Luka 10:20, 21.

Baruti ba mehleng ea Jesu ba ne ba rata ho hlahella le ho hlomphuoa. (Numere 15:38-40; Matheu 23:5-7) Jesu eena o ile a re barutuoa ba hae ha baa lokela ho “rena ka thata holim’a” batho. (Luka 22:25, 26) O ile a ba a re ho barutuoa ba hae: “Hlokomelang bangoli ba batlang ho tsamaea ba apere liaparo tse telele tsa ka holimo ’me ba batla litumeliso limmarakeng.”—Mareka 12:38.

Jesu o ne a sa tšoane le bona. Batho ba bangata ba ne ba sa tsebe hore na o shebahala joang. Ho ne ho ee ho etsahale hore batho ba se ke ba mo hlokomela hobane o ne a tšoana le motho e mong le e mong. (Johanne 7:10, 11) Leha a ne a se a e-na le baapostola ba hae ba 11, batho ba bang ba ne ba ntse ba sa mo tsebe kaha o ne a sa fapana le bona. Ha Judase a ne a mo eka, o ile a ba a tlameha ho mo khetholla har’a batho ba bang ka hore a mo ake.—Mareka 14:44, 45.

Ho na le lintho tse ngata tseo re sa li tsebeng ka hore na Jesu o ne a shebahala joang. Empa re kholisehile hore o ne a sa tšoane le motho ea hlahang litšoantšong tseo batho ba li etsang. Taba ea bohlokoa eo re lokelang ho ameha ka eona ke hore na re ithuta’ng ho eena.

Jesu o ile a hlokahala a ba a patoa letsatsing leo ka lona a buileng mantsoe ana a ka holimo. (Johanne 14:19) O ‘fane ka moea oa hae hore e be thekollo.’ (Matheu 20:28) Ka mor’a matsatsi a mararo o ile a tsosoa e le motho oa moea a ba a hlaha ho barutuoa ba hae ba bang. (1 Petrose 3:18; Liketso 10:40) Lekhetlong lena o ne a se a sa tšoane le pele a hlokahala, kaha le batho ba neng ba mo tseba hantle ba ne ba sa khone ho bona hore ke eena. Ha Maria Magdalena a ile lebitleng la Jesu ka mor’a hore a tsosoe, o ne a nahana hore Jesu ke mohlokomeli oa serapa. Ha barutuoa ba bang ba babeli ba kopana le eena Emmause, ba ne ba nahana hore ke mojaki sebakeng seo.—Luka 24:13-18; Johanne 20:1, 14, 15.

Ebe Jesu o shebahala joang hona joale? Lilemo tse 60 ka mor’a lefu la Jesu, moapostola Johanne o ile a mo bona liponong. Ha aa mo bona a khokhothetsoe sefapanong empa o mo bone e le “Morena oa marena le Khosi ea likhosi.” O mo bone e le morena eo haufinyane a tla felisa lira tsohle tsa Molimo ho sa tsotellehe hore na ke batho kapa ke bademona. Morena enoa o tla boela a etsa hore lefatše le tlale ka batho ba khotsofetseng ba ke keng ba hlola ba e-shoa.—Tšenolo 19:16; 21:3, 4.