Ka masoabi, ha ke ne ke le lilemo tse ka bang 13 kamano ea ka le Jehova e ne e se e se matla. Bana bao ke neng ke kena sekolo le bona ba ne ba bonahala eka ba na le bolokolohi ba ho etsa ntho e ’ngoe le e ’ngoe ’me ke ne ke batla ho tšoana le bona. Ke ne ke utloa eka melao eo batsoali ba ka ba mpehetseng eona le eo Bakreste ba phelang ka eona e thata ’me ke bona ho sebeletsa Jehova e le mosebetsi o boima. Le hoja ke ne ke lumela hore Jehova o teng empa ke ne ke sa utloe ke le haufi le eena.

Ho ntse ho le joalo, ha kea ka ka tlohela ho sebeletsa Jehova empa ke ne ke ea tšimong ka seoelo. Mohlang ke eang tšimong, ke ne ke sa lokisetse ’me seo se ne se etsa hore ho be thata hore ke qalise moqoqo le ho tsoela pele ka oona. Ka lebaka leo, ke ne ke sa khone ho ba le maeto a ho boela kapa batho bao ke ithutang Bibele le bona ’me ke ne ke sa thabele tšimo e leng se ileng sa etsa hore ke se ke ka e rata le ho feta. Kahoo ke ne ke ipotsa, ‘Motho a ka khona joang ho lula a ea tšimong beke le beke kapa khoeli le khoeli?’

Ha ke ne ke le lilemo li 17 ke ne ke batla ho ikemela. Kahoo, ke ile ka paka thoto ea ka ka tsamaea lapeng ’me ka ea Australia. Batsoali ba ka ba ile ba utloa bohloko haholo ha ke tsamaea. Ba ne ba  tšoenyehile empa ba ile ba nahana hore ke tla tsoela pele ke ntse ke sebeletsa Jehova.

Ha ke le Australia, ke ne ke se ke sa sebeletse Jehova hantle le ho feta eaba ke qala ho se ee libokeng hantle. Ke ile ka ba motsoalle oa bacha ba bang ba neng ba tšoana le ’na, re ne re thabela ho ea libokeng kajeno ’me letsatsi le latelang re noa ebile re ithabisa li-nightclub. Ha ke nahana ka nako eo ke ile ka hlokomela hore ke ne ke sebeletsa Jehova ha ka lehlakoreng le leng ke etsa lintho tsa lefatše lena empa bophelo boo ke ne ke sa bo thabele.

Lilemo tse ka bang tse peli hamorao, ke ile ka kopana le morali’abo rona e mong ka nakoana ’me o ile a etsa hore ke nahane ka tsela eo ke phelang ka eona a sa hlokomele. Ke ne ke lula le baralib’abo rona ba bahlano ba sa nyaloang ’me re ile ra mema molebeli oa potoloho le mosali oa hae Tamara hore ba tl’o lula le rona beke kaofela. Ha monna oa hae a ntse a etsa lintho tsa phutheho, Tamara o ne a qeta nako le rona ebile re itšehela hamonate. Ke ne ke thabela seo haholo. E ne e le motho ea ikokobelitseng ebile ho le bonolo ho bua le eena. Ke ne ke makatsoa ke ho bona hore re ka thabela ho qeta nako le motho ea phathahaneng hakana ka ho sebeletsa Jehova.

Tamara e ne e le motho ea mafolo-folo. Tsela eo a neng a rata ho sebeletsa Jehova ka eona le eo a neng a rata tšimo ka eona e ile ea etsa hore le nna ke batle ho tšoana le eena. O ne a thabile hobane o ne a sebeletsa Jehova kahohle kamoo a neng a ka khona kateng, ha ’na ke ne ke sa thaba hobane ke ne ke sa sebeletse Jehova kahohle kamoo nka khonang kateng. Tsela eo a neng a rata Jehova ka eona le kamoo a neng a thabile kateng e ile ea etsa hore ke batle ho fetola bophelo ba ka. Mohlala oa hae o ile oa etsa hore ke nahane ka taba e ’ngoe ea bohlokoa e ka Bibeleng ea hore Jehova o batla hore kaofela ha rona re mo sebeletse “ka thabo” le “ka mohoo oa nyakallo.”​—Pes. 100:2.

Ke ne ke batla ho thaba joaloka Tamara empa e le hore ke thabe joalo, ke ne ke hloka ho etsa liphetoho tse kholo bophelong ba ka. Ke ile ka etsa liphetoho hanyane-hanyane empa ho ile ha nka nako. Ke ne ke nka bopula-maliboho bo thusang nako le nako ebile ke lokisetsa ha ke ea tšimong. Sena se ile sa nthusa hore ke se ke ka tšoha haholo  le hore ke itšepe haholoanyane. Kaha ke ne ke sebelisa Bibele hangata tšimong, seo se ile sa etsa hore ke thabele tšimo le ho feta. Ka mor’a moo, ke ile ka nka bopula-maliboho bo thusang khoeli le khoeli.

Ke ile ka qala ho khetha metsoalle ea lilemo tse sa tšoaneng e neng e na le kamano e ntle le Jehova ebile ba thabela ho etsa sohle seo ba ka se khonang ho mo sebeletsa. Mohlala oa bona o motle o ile oa nthusa hore ke nahane hore na ke eng e tlang pele bophelong ba ka le hore ke qale ho bala Bibele kamehla. Ke ile ka qala ho thabela tšimo le ho feta ’me ha nako e ntse e ea ka ba pula-maliboho ea kamehla. Ka lekhetlo la pele ka mor’a lilemo tse ngata ke ile ka ikutloa ke thabile ebile ke phutholohile ha ke le libokeng.

Selemo hamorao, ke ile ka kopana le Alex e leng motho ea mosa, ea nang le pelo e ntle, ea ratang Jehova ebile a rata tšebeletso ea tšimo. E ne e le mohlanka ea sebeletsang ’me e bile pula-maliboho ea kamehla ka lilemo tse tšeletseng. Hape o ile a ea moo ho neng ho na le tlhokahalo teng Malawi ka nakoana. Ha a ntse a le moo, o ne a qeta nako a na le baromuoa ba neng ba mo behela mohlala o motle ’me ba mo khothalletsa hore a tsoele pele a nka ho sebeletsa Jehova e le ntho e tlang pele bophelong ba hae.

’Na le Alex re ile ra nyalana ka 2003 ’me ra tsoela pele re le tšebeletsong ea nako e tletseng ho fihlela joale. Re ile ra ithuta lintho tse ngata haholo ’me Jehova o ile a re hlohonolofatsa ka litsela tse ngata.

Ka 2009, re ile ra il’o sebeletsa re le baromuoa Timor-Leste e leng naha e nyane ho tse ling tsa lihlekehleke tse Indonesia. Re ile ra ikutloa re tšohile, re thabile ebile re maketse ka nako e le ’ngoe. Likhoeli tse hlano ka mor’a moo re ile ra ea Dili e leng motse-moholo oa naha eo.

Tsela eo re neng re phela ka eona mona e ne e fapane hole le eo re neng re e tloaetse. Re ile ra lokela ho tloaela setso se secha, puo, lijo le tsela eo batho ba moo ba neng ba phela ka eona. Hangata ha re ne re le tšimong re ne re kopana le batho ba sotlehileng  haholo, ba sa rutehang le ba hatelletsoeng. Hape re ile ra bona batho ba bangata ba neng ba kula ’meleng ba nyahame ba tšoenyehile ka lebaka la ntoa. *

Re ne re thabela tšimo haholo. Ka mohlala, ke ile ka kopana le ngoanana e mong ea bitsoang Maria ea neng a e-na le lilemo tse 13 ea neng a utloele bohloko haholo. * ’Mè oa hae o ile a hlokahala lilemo tse ’maloa tse fetileng ’me o ne a kopana le ntate oa hae ka seoelo. Joaloka bana ba bangata ba lekanang le eena Maria o ne a sa tsebe hore na o batla eng bophelong ba hae. Ke hopola letsatsi le leng a lla haholo ha a ntse a mpolella kamoo a ikutloang kateng. Leha ho le joalo, ke ne ke sa utloisise hore na o ntse a reng hobane ke ne ke sa tsebe puo ea bona hantle. Ke ile ka rapela Jehova hore a nthuse hore ke khone ho mo khothatsa ’me ka mor’a moo ka mo balla mangolo a mo tšelisang. Ka mor’a lilemo tse ’maloa ke ile ka bona kamoo ’nete ea Bibele e ileng ea fetola tsela eo Maria a neng a ikutloa ka eona, a itlhopha le eo a neng a phela bophelo ba hae ka eona. O ile a kolobetsoa ’me hona joale ho na le batho bao a ithutang Bibele le bona. Hona joale, Maria ke karolo ea lelapa le leholo la bahlanka ba Jehova ’me o ikutloa a ratoa haholo.

Kannete Jehova o hlohonolofatsa mosebetsi oa boboleli o etsoang Timor-Leste. Le hoja bahoeletsi ba bangata ba ile ba kolobetsoa lilemo tse leshome tse fetileng, ba bangata ba bona ke bo-pula-maliboho ba kamehla, bahlanka ba sebeletsang kapa baholo. Hape ba bang ba sebeletsa ofising ea phetolelo ’me ba thusa ka ho fetolela lingoliloeng tse thehiloeng Bibeleng ka lipuo tse buuoang naheng eo. Ke ile ka thaba haholo ha ke utloa ba bina libokeng, ke bona kamoo ba thabileng kateng le ho ba bona e ba metsoalle ea Jehova.

Bophelo ba Timor-Leste bo fapane haholo le ba Australia empa ke ne ke thabile haholo. Ka linako tse ling re ne re tsamaea ka tekesi e tletseng batho ba bangata ebile ho na le litlhapi tse omisitsoeng le meroho e tsoang ’marakeng. Ka matsatsi a mang re ne re ithuta Bibele le batho ho chesa haholo ka matlong a manyane a sa poleisteroang fatše ebile le likhoho li ntse li matha hohle mona. Ho sa tsotellehe hore na re ne re na le liphephetso life ke ne ke thabile.

Ha ke nahana ka bophelo ba ka ke leboha batsoali ba ka hore e be ba ile ba etsa sohle seo ba ka se khonang ho nthuta melao ea Jehova le ho ntšehetsa esita le ha ho ne ho le thata hore ke sebeletse Jehova kahohle kamoo nka khonang. Kannete mantsoe a ho Liproverbia 22:6 a phethahetse bophelong ba ka. Batsoali ba ka ba motlotlo ka ’na le Alex ’me ba thabela ho re bona re sebeletsa Jehova. Ho tloha ka 2016 e sa le re potoloha tšimong ea lekala la Australasia.

Ho thata ho lumela hore ho kile ha ba le nako eo ke neng ke sa rate tšebeletso ea tšimo ka eona. Hona joale ke se ke rata tšimo. Ke hlokometse hore ho sa tsotellehe hore ho etsahala’ng bophelong motho o thabisoa feela ke ho sebeletsa Molimo ka pelo eohle. Kannete lilemo tse 18 tseo re sebelelitseng Jehova ka tsona le Alex ebile tse monate haholo bophelong ba ka. Hona joale ke utloisisa hantle seo mopesaleme Davida a ileng a se bua ho Jehova ha a ne a re: “Bohle ba tšabelang ho uena ba tla thaba, ba tla hoeletsa ka thabo ho isa nakong e sa lekanyetsoang. . . . Ba ratang lebitso la hao ba tla thaba ka lebaka la hao.”​—Pes. 5:11.