Bakreste ba mehleng ea khale ba ile ba sebetsa ka thata ho bolella batho ba bangata “litaba . . . tse molemo tsa ’muso.” (Mat. 24:14) Ba bang ba ile ba fallela linaheng tse ling. Ka mohlala, moapostola Pauluse o ile a ea naheng eo hona joale e seng e bitsoa Turkey, eaba o bolella batho ba bangata litaba tse molemo moo. * Ka 2014 Lipaki Tsa Jehova li ile tsa tsoa letšolo naheng ea Turkey ho bolella batho litaba tse molemo. Ke hobane’ng ha li ile tsa etsa letšolo leo? Hona ho ne ho e-na le bo-mang letšolong lee?

Ho na le bahoeletsi ba fetang 2 800 naheng ea Turkey, empa baahi ba naha eo ba limilione tse 79. Sena se bolela hore mohoeletsi ka mong o lokela ho bolella batho ba 28 000 litaba tse molemo. Ka lebaka leo, ke batho ba fokolang ka palo ba boleletsoeng litaba tse molemo naheng ena. Letšolo leo le ne le etsoa ka sepheo sa hore batho ba bangata ba bolelloe litaba tse molemo ka nako e khutšoanyane. Bara le barali babo rona ba ka bang 550 ba buang Seturkey ba tsoang linaheng tse ling ba ile ba ea Turkey ho ea sebetsa ’moho le bahoeletsi ba Turkey letšolong leo. Mosebetsi oo o ile oa tsamaea joang?

Batho ba bangata ba ile ba bolelloa litaba tse molemo. Bara le barali babo rona ba phutheho ea Istanbul ba ile ba re: “Ha batho ba re bona, ba ile ba re botsa hore na ho na le kopano e khethehileng moo Turkey hobane ba ne ba re bona re le bangata haholo.” Bara le barali babo rona ba phutheho e motseng oa Izmir bona ba ile ba re: “Ntate e mong ea sebetsang setopong sa litekesi o ile a ea ho mor’abo rona e mong a re, ‘Ho etsahala’ng? Le ekelitse mosebetsi oa lona?’ Batho ba bangata ba ile ba fela ba bona hore re letšolong.

Bahoeletsi ba tsoang linaheng tse ling ba ile ba natefeloa ke mosebetsi oo. Steffen ea tsoang Denmark o ile a re: “Letsatsi le letsatsi ke ne ke buisana le batho ba sa tsebeng letho ka Jehova. Ke ne ke hlile ke utloa hore ke tsebisa batho lebitso la Jehova.” Jean-David ea tsoang naheng ea Fora o ile a re: “Re ile ra qeta lihora re bua le batho seterateng se le seng. Ho ne ho le monate haholo. Batho ba bangata ba ne ba sa tsebe Lipaki Tsa Jehova. Hoo e ka bang  ntlong e ’ngoe le e ’ngoe, re ile ra bontša batho livideo le ho ba siela lingoliloeng.”

Bahoeletsi bao ba 550 ba ile ba fana ka lingoliloeng tse ka bang 60 000 ka libeke tse peli feela. Ba ile ba fela ba bolella batho ba bangata litaba tse molemo letšolong leo.

Bo-pula-maliboho ba kamehla ba ile ba eketseha. Bahoeletsi ba bangata ba ile ba batla ho ba bo-pula-maliboho ka lebaka la letšolo leo. Ha e le hantle, palo ea bo-pula-maliboho ba kamehla e ile ea phahama ka liphesente tse 24 selemo ka mor’a hore letšolo leo le fele.

Bahoeletsi ba tsoang linaheng tse ling ba neng ba kentse letsoho letšolong leo ba ile ba ithuta lintho tse ngata tse ileng tsa ba thusa tšebeletsong ea bona. Morali’abo rona Şirin ea tsoang Jeremane o ile a re: “Bara le barali babo rona ba Turkey ba khona ho paka hohle ha monyetla o hlaha. Ke tšaba ho buisana le batho ka Bibele ha monyetla o hlaha. Empa ke ile ka khona ho etsa joalo ka lebaka la letšolo lena. Ke boetse ke thusitsoe ke mohlala o motle oa bara le barali babo rona le hore ebe ke ile ka rapela Jehova hore a nthuse. Ke ile ka ba ka bua le batho ba litopong tsa literene le ho ba fa lingoliloeng. Hona joale ha ke sa tšaba ho bua le batho hohle ha monyetla o hlaha.”

Johannes ea tsoang Jeremane o ile a re: “Letšolong leo ke ile ka ithuta hore na nka ntlafatsa tšebeletso ea ka joang. Bara le barali babo rona ba Turkey ba ne ba hlile ba batla ho bolella batho ba bangata litaba tse molemo. Ba ne ba buisana le batho ka Bibele hohle ha monyetla o hlaha. Ke ile ka ba etsisa ha ke se ke khutletse hae. Hona joale ke se ke buisana le batho ba bangata ka Bibele.”

Zeynep ea tsoang naheng ea Fora o ile a re: “Letšolo leo le nthusitse hore ke be sebete le hore ke tšepe Jehova.”

Bahoeletsi ba ile ba momahana. Tsela eo bahoeletsi ba Turkey ba ileng ba amohela barab’abo bona ka eona e ile ea ama baeti bana haholo. Jean-David eo re buileng ka eena pejana, o re: “Ba ile ba re amohela ka mofuthu malapeng a bona, ba re nka re le metsoalle  ea bona. E ne eka re beng ka bona. Ke ne ke tseba hore Lipaki Tsa Jehova lefatšeng lohle lia ratana. Empa lekhetlong lena ke ile ka bona ka mahlo. Ke ile ka utloa ke le motlotlo ho ba Paki ea Jehova ’me ke leboha Jehova hore ebe ke eona.”

Claire ea tsoang naheng ea Fora o ile a re: “Le hoja re ne re tsoa linaheng tse fapaneng, e ne eka re tsoa naheng e le ’ngoe. Re ne re momahane joaloka lelapa.”

Stéphanie ea tsoang naheng ea Fora o ile a re: “Letšolong leo re ithutile hore lebaka le etsang hore re momahane ha se setso kapa puo, empa ke hore kaofela ha rona re rata Jehova.”

Bahoeletsi ba bangata ba tsoang linaheng tse ling ba ile ba batla ho fallela Turkey e le ho ea etsa tsoho la monna. Ba bang ba se ba falleletse moo. Re ananela haholo hore ebe ba entse joalo.

Ka mohlala, sebakeng se seng se moo Turkey, ho na le sehlopha se senyenyane sa bahoeletsi ba 25. Ka lilemo tse ngata sehlopha seo se ne se e-na le moholo a le mong. Ka 2015, bahoeletsi ba tšeletseng ba tsoang Jeremane le Netherlands ba ile ba fallela Turkey ho tla thusa bahoeletsi bao.

Bahoeletsi ba falleletseng Turkey ba re ka linako tse ling ba thulana le mathata. Empa ba re ho thusetsa moo ho hlokehang bahoeletsi ho tlisa litlhohonolofatso tse ngata. Hlokomela hore na ba bang ba itse’ng.

Mor’abo rona Federico ea nang le lelapa, o lilemo li ka bang 40 ’me o ile a falla Spain. O re:

“Kaha joale ha ke sa na lintho tse ngata, ke na le nako e ngata ea ho etsa lintho tsa bohlokoa.” Na o re khothalletsa ho mo etsisa? O re: “Hantle haholo. Ha u fallela moo ho hlokehang bahoeletsi ka sepheo sa ho bolella batho litaba tse molemo, Jehova o tla u hlokomela. U tla hle u utloe hore oa u hlokomela.”

Mor’abo rona Rudy ea nang le lelapa, o lilemo li ka bang 50 ’me o tsoa Netherlands. Eena o re: “Ke ntho e thabisang haholo ho sebeletsa moo ho  hlokehang bahoeletsi, ho bolella batho ba sa tsebeng letho ka Bibele litaba tse molemo le ho bona ha batho ba amohela molaetsa oa Bibele.”

Mor’abo rona Sascha ea nang le lelapa, o lilemo li 40 ’me o ile a falla Jeremane. O li beha tjena: “Hangata ha ke le tšimong ke kopana le batho ba qalang ho utloa molaetsa oa Bibele. Ke thaba haholo ha ke ithuta le bona.”

Morali’abo rona Atsuko ea nang le lelapa, o lilemo li 30 ’me o tsoa Japane. O re: “Khale koana ke ne ke lakatsa hore Armagedone e fihle kapele. Empa ke ile ka bona hore Jehova o na le mamello ka mor’a hore ke fallele Turkey ’me ke mo leboha haholo. Ke rata Jehova le ho feta ha ke bona tsela eo a etsang lintho ka eona.”

Morali’abo rona Alisa ea ka bang lilemo li 30 o tsoa Russia. O re: “Ho sebeletsa moo ho hlokehang bahoeletsi ho nthusitse ho bona hore Jehova o molemo.” (Pes. 34:8) O boetse o re: “Jehova ke Ntate oa ka le motsoalle oa ka ea nthusang maemong ’ohle. Bophelong ba ka ho etsahetse lintho tse ngata tse nthabisitseng ’me Jehova o ntlhohonolofalitse haholo.”

Letšolo la ho bolela litaba tse molemo le ileng la etsoa Turkey le ile la thusa batho ba bangata ho fumana litaba tse molemo. Empa ho ntse ho e-na le batho ba bangata ba e-s’o li fumane. Letsatsi le letsatsi bahoeletsi ba fallelang Turkey ba kopana le batho ba sa tsebeng Jehova ho hang. Na u ka rata ho fallela moo ho hlokehang bahoeletsi? Haeba ho joalo, re u khothalletsa hore u ‘phahamise mahlo ’me u talime masimo, hore a soeufetse bakeng sa kotulo.’ (Joh. 4:35) Haeba u batla ho ea etsa tsoho la monna moo masimo ‘a soeufetseng bakeng sa kotulo,’ qala hona joale ho etsa lintho tse tla u thusa ho etsa joalo. Kholiseha hore u tla hlohonolofatsoa haholo ha u kenya letsoho ho etsa hore litaba tse molemo li boleloe “ho isa karolong e hōle-hōle ea lefatše.”—Lik 1:8.