1, 2. (a) Ntho ea bohlokoa ka ho fetisisa eo batho ba lokelang ho e etsa ke efe? (b) Ke hobane’ng ha taba ee e le ea bohlokoa?

BATHO ba bangata ba nka chelete e le eona ntho ea bohlokoa bophelong. Ba phathahane ka ho sebeletsa ho ba le chelete e ngata kapa hore e teng e se ke ea fela. Batho ba bang bona ba nka ntho ea bohlokoa e le malapa a bona, bophelo bo botle kapa ho finyella lintho tse itseng.

² Ntho ea bohlokoa ka ho fetisisa eo re lokelang ho e etsa ke ho tšehetsa bobusi ba Jehova. Empa haeba re se hlokolosi, re ka phathahana ka mesebetsi ea rona kapa ra ameha ka mathata a rona hoo re ka lebalang bohlokoa ba ho tšehetsa bobusi ba Jehova. Haeba re bo tšehetsa, re tla khona ho sebetsana le mathata a rona ’me re be le kamano e ntle le Jehova.

3. Satane o re’ng ka puso ea Jehova?

³ Satane o ile a belaella tokelo ea Jehova ea ho busa batho. O batla hore re nahane hore Jehova ke ’Musi ea nang le bobolu ebile ha a batle ha re fumana lintho tse ntle. Hape, o batla  hore re nahane hore re tla thaba haeba re ipusa. (Gen. 3:1-5) O boetse o re ha ho motho ea sebeletsang Jehova ka ho rata le hore ha motho a ka hlaheloa ke mathata a ka khaotsa ho tšehetsa bobusi ba Jehova. (Jobo 2:4, 5) Kahoo, Jehova o fane ka nako e le hore ho bonahale hore na bophelo bo ba joang kantle ho puso ea hae.

4. Ke hobane’ng ha ho hlokahala hore Jehova a tlose qoso bobusing ba hae?

⁴ Jehova oa tseba hore lintho tseo Satane a mo qosang ka tsona ke leshano. Kahoo, ke hobane’ng ha a lumeletse hore ho fete nako hore ho bonahale hore na liqoso tsa Satane ke ’nete kapa che? Karabo ea potso eo e ama mangeloi le batho. (Bala Pesaleme ea 83:18) Adama le Eva ha baa ka ba lumela ho busoa ke Jehova ’me hamorao batho ba bang le bona ba ba etsisa. Ka lebaka leo, batho ba ka ’na ba nahana hore Satane o ne a bua ’nete. Leha ho le joalo, ho ke ke ha e-ba le khotso pakeng tsa lichaba, merabe le malapa hafeela qoso ena e ntse e e-s’o rarolloe. Ka mor’a hore Jehova a tlose qoso eo, batho bohle ba tla phela ka khotso tlas’a puso ea hae. Ho tla ba le khotso lefatšeng lohle.—Baef. 1:9, 10.

5. Re lokela ho etsa’ng ho bontša hore re tšehetsa bobusi ba Jehova?

⁵ Ha nako e ntse e e-ea, ho tla hlaka hore Jehova ke eena ea tšoanelang ho busa batho kaha puso ea Satane le ea batho e tla hloleha ka ho feletseng ’me e felisoe. Puso ea Molimo eo Morena oa eona e leng Kreste, e tla atleha. Batho ba tla pholoha ba tla be ba bontša hore batho ba ka khona ho tšepahalla Molimo le ho tšehetsa bobusi ba hae. (Esa. 45:23, 24) Na u batla ho ngoloa har’a ba tla ngoloa e le ba ileng ba tšepahala ’me ba tšehetsa bobusi ba Jehova? Ha ho pelaelo hore u batla joalo. Re lokela ho hlokomela kamoo taba ena e leng ea bohlokoa kateng e le hore re baloe har’a batho ba tšepahalang.

6. Ho bohlokoa hakae hore re tšehetse bobusi ba Jehova?

⁶ Joalokaha re boletse, ntho ea bohlokoa bophelong ke hore re tšehetse bobusi ba Jehova. Ke ntho ea bohlokoa le ho feta hore rona re thabe. Na joale hoo ho bolela hore Jehova ha a re tsotelle? Le hanyenyane. Hobane’ng?

7, 8. Ke hobane’ng ha Jehova a tla tlosa qoso bobusing ba hae a be a phethahatse litšepiso tsa hae?

⁷ Jehova o re rata haholo ebile o nka re le bohlokoa. O ile a tela bophelo ba Mora oa hae e le hore re pholohe. (Joh. 3:16; 1 Joh. 4:9) Hoja Jehova o ile a hloleha ho phethahatsa litšepiso tsa hae, Satane a ka be a ile a itšoarella ka taba eo ebe o re Jehova ke ’musi ea khopo ebile ke raleshano ea hanelang batho ka lintho tse molemo. E ne e tla boela e tšehetse taba ea bahanyetsi ba Molimo ba reng: “Ho kae ho ba teng hoo ho tšepisitsoeng ha hae? Ka sebele, ho tloha letsatsing la ha baholo-holo ba rōna ba robala lefung, lintho tsohle li tsoela pele hantle feela joaloka ho tloha tšimolohong ea pōpo.” (2 Pet. 3:3, 4) Kahoo, ha Jehova a tlosa qoso bobusing ba hae, o tla netefatsa hore o pholosa batho ba mo mamelang. (Bala Esaia 55:10, 11) Hape, o busa batho hobane a ba rata. Kahoo, re kholisehile hore o tla lula a rata bahlanka ba hae, a ba ananela a bile a nka ba le bohlokoa.—Ex. 34:6.

⁸ Taba ea hore bobusi ba Jehova ke ntho ea bohlokoa ha e bolele hore  Jehova ha a tsotelle hore na re tla pholoha kapa che. Ho mpa ho bolela hore re nka bobusi ba Jehova bo le bohlokoa ho feta ho pholoha ha rona. Kahoo, re lokela ho bo tšehetsa ka botšepehi.

9. Satane o ile a re’ng ka Jobo? (Sheba setšoantšo se qalong.)

⁹ Ke habohlokoa hore re nke bobusi ba Jehova kamoo eena a bo nkang kateng. Bohlokoa ba sena bo hlaha bukeng ea Jobo, e leng e ’ngoe ea libuka tsa pele. Satane o ile a re haeba Jobo a ka sotleha, o tla rohaka Molimo. A ba a re Jehova e be eena ea mo otlang. Jehova ha aa ka a etsa joalo, empa a re Satane e be eena ea lekang Jobo, eaba o re: “Ntho e ’ngoe le e ’ngoe eo a nang le eona e letsohong la hao.” (Bala Jobo 1:7-12) Liphoofolo tsa Jobo, bahlanka ba hae hammoho le bana ba ile ba shoa. Satane o ile a etsa hore ho bonahale eka Molimo ke eena ea baketseng Jobo mahlomola ao. (Jobo 1:13-19) Ka mor’a moo Satane a otla Jobo ka lefu le bohloko le bileng le nyonyehang. (Jobo 2:7) Jobo o ile a utloa bohloko le ho feta ha metsoalle ea hae e meraro e mo buela lintho tse bohloko ’me mosali oa hae a re a rohake Molimo.—Jobo 2:9; 3:11; 16:2.

10. (a) Jobo o ile a etsa’ng ho bontša hore o tšepahalla Molimo? (b) O ile a etsa phoso efe?

¹⁰ Ho ile ha etsahala’ng ka mor’a moo? Ho ile ha hlaka hore Satane o leshano. Jobo ha aa ka a furalla Molimo. (Jobo 27:5) Leha ho le joalo, ka nakoana Jobo o ile a hloleha ho bona hore na ntho ea bohlokoa ke efe. O ile a ipona a lokile ho feta tekano a ba a batla lebaka la hore ebe o hlahetsoe ke mahlomola ao. (Jobo 7:20; 13:24) Re ka ’na ra nahana hore mabaka a Jobo a ne a utloahala, empa Jehova o ile a mo khalemela. Jehova o ile a re’ng ho eena?

11, 12. Jehova o ile a thusa Jobo hore a hlokomele eng, hona Jobo o ile a etsa’ng?

¹¹ Mantsoe ao Jehova a ileng a a bolella Jobo a ngotsoe likhaolong tsa 38 ho ea ho 41 tsa buka ea Jobo. Empa ha ho moo Jehova a bolellang Jobo hore na ke hobane’ng ha a hlahetsoe ke mahlomola. Morero oa Jehova e ne e se ho hlalosetsa Jobo lebaka leo a hlahetsoeng ke mathata ka lona, joalokaha eka Jehova o lokela ho itlhahisa a se na molato ho Jobo. Ho e-na le hoo, Jehova o ne a batla ho thusa Jobo hore a bone na o fokola hakae ha a bapisoa le Jehova. A ba a mo thusa hore a bone hore ho na le lintho tse bohlokoa ho feta mathata a hae. (Bala Jobo 38:18-21) Ka mor’a  moo Jobo o ile a bona lintho ka tsela e nepahetseng.

¹² Na Jehova o ne a sa utloele Jobo bohloko ha a mo khalemela joalo le hoja Jobo a ne a mameletse mathata a boima? Che, Jobo le eena o ne a bone ho le joalo. O ne a utloisisa khalemelo ea Jehova a bile a e ananela. O ile a ba a re: ‘Ke hula mantsoe, ke baka ke le lerōleng le moloreng.’ O buile mantsoe ao ka lebaka la khalemelo ea Jehova e lerato. (Jobo 42:1-6) Pejana ho moo, Elihu le eena o ile a khalemela Jobo. (Jobo 32:5-10) Ha Jehova a hlokomela hore Jobo o bakile, o ile a bolella batho hore o motlotlo ka Jobo.—Jobo 42:7, 8.

13. Khalemelo ea Jehova e ile ea ’na ea thusa Jobo joang leha mathata a hae a se a fetile?

¹³ Khalemelo ea Jehova e ile ea ’na ea thusa Jobo leha mathata a se a fetile. Joang? Le hoja Jehova a ile a “hlohonolofatsa qetello ea Jobo ho feta tšimoloho ea hae,” e ka ’na eaba o ile a tšeliseha ka mor’a nako hobane o ile “a boela a ba le bara ba supileng le barali ba bararo.” (Jobo 42:12-14) E ka ’na eaba Jobo o ne a hloloheloa bana ba hae ba ileng ba bolaoa ke Satane. Mohlomong ka nakoana o ne a hopola ha a sa le mahlomoleng. Esita le haeba a ne a utloisisa hore na ke hobane’ng ha a hlahetsoe ke mathata, e ka ’na eaba ka linako tse ling o ne a ipotsa hore na ke hobane’ng ha ho hlokahala hore a utloe bohloko hakaalo. Ho sa tsotellehe hore na o ne a nahana’ng, e tlameha ebe o ne a hopola seo Jehova a mo boleletseng sona. Ha a etsa joalo o ne a tla bona lintho ka tsela e nepahetseng a be a tšelisehe.—Pes. 94:19.

14. Re ka ithuta’ng linthong tse ileng tsa etsahalla Jobo?

¹⁴ Buka ea Jobo e ka re tšelisa ea ba ea re thusa ho bona lintho ka tsela e nepahetseng. Jehova o ile a ngola buka ea Jobo “ho re laea, e le hore ka mamello ea rōna le ka matšeliso a tsoang Mangolong re ka ba le tšepo.” (Bar. 15:4) Kahoo re ithuta’ng? Ntho e ka sehloohong eo re ithutang eona ke hore re se ke ra tšoenyeha haholo ka se etsahalang bophelong ba rona hoo re ka lebalang hore taba ea bohlokoa ke hore lebitso la Jehova le halaletsoe. Hape, re tla be re bontša hore re nka bobusi ba Jehova e le ba bohlokoa ha re lula re tšepahala leha re hlaheloa ke mathata, joalokaha Jobo a ile a etsa.

15. Re tla fumana molemo ofe ha re mamella mathata?

¹⁵ Buka ea Jobo e ka re tšelisa hobane ea re bontša hore ha re hlaheloa ke mathata, ha se hore Jehova o re koatetse.  Ho e-na le hoo, mathata a re fa monyetla oa ho bontša hore re tšehetsa bobusi ba Jehova. (Liprov. 27:11) Ha re mamella mathata, re tla ba le “boemo bo amohelehang” ’me tšepo ea rona e tla tiea. (Bala Baroma 5:3-5) Buka ea Jobo e re Jehova “o na le lerato le mofuthu haholo ’me o mohau.” (Jak. 5:11) Kahoo re ka kholiseha hore bohle ba tšehetsang bobusi ba hae ba tla putsoa. Ho tseba taba ena ho tla re thusa hore re ‘mamelle ka botlalo ’me re tiisetse ka thabo.’—Bakol. 1:11.

16. Ke hobane’ng ha re lokela ho lula re ikhopotsa hore ho bohlokoa ho tšehetsa bobusi ba Jehova?

¹⁶ Ke ’nete hore ho ka ba thata ho lula re bontša hore re tšehetsa bobusi ba Jehova. Ka linako tse ling mathata a ka re hloa setha. Esita le mathata a sa reng letho a ka re imela hobane feela re lula re nahana ka ’ona. Kahoo re lokela ho lula re ikhopotsa hore ho bohlokoa ho lula re tšehetsa bobusi ba Jehova leha re hlaheloa ke mathata.

17. Ho lula re phathahane ka mosebetsi oo Jehova a re fileng ’ona ho ka re thusa joang ho lula re tšehetsa bobusi ba Jehova?

¹⁷ Re ka khona ho lula re tšehetsa bobusi ba Jehova haeba re lula re phathahane ka mosebetsi oo Jehova a re fileng ’ona. Ka mohlala, morali’abo rona Renee o ile a tšoaroa ke setorouku le kankere. Ha a le ngakeng, o ne a buisana le baoki, bakuli le batho ba bang ka Bibele. Ka nako e ’ngoe ha a le ngakeng, ka libeke tse peli le halofo feela o ile a qeta lihora tse 80 a buisana le batho ka Bibele. Morali’abo rona Renee o ile a lula a tšehetsa bobusi ba Jehova esita leha a ne a le haufi le ho hlokahala. Ho etsa joalo ho ile ha mo thusa hore a imolohe kelellong.

18. Re ka fumana molemo ofe ha re tšehetsa bobusi ba Jehova leha re thulana le maemo a sa re tšoareng hantle? Fana ka mohlala.

¹⁸ Re ka boela ra bontša hore re tšehetsa bobusi ba Jehova leha re thulana le maemo a sa re tšoareng hantle letsatsi le letsatsi. Morali’abo rona Jennifer o ile a qeta matsatsi a mararo boema-fofaneng a emetse sefofane se tla mo isa hae. Empa ha ho na sefofane se ileng sa fihla. Kaha o ne a setse moo a le mong a bile a khathetse, a ka be a ile a nyahama habonolo feela. Empa o ile a rapela Jehova hore a mo thuse ho bolella batho ba bang ba neng ba eme boema-fofaneng litaba tsa Bibele. Qetellong ho ile ha etsahala’ng? O ile a buisana le batho ba bangata ka Bibele a ba a fana ka lingoliloeng tse ngata. O re: “Le hoja ke ne ke thulane le bothata bo boima, ke ile ka hlokomela hore Jehova o ntlhohonolofalitse ’me o mphile matla hore ke rorise lebitso la hae.” Morali’abo rona Jennifer o ile a fela a tšehetsa bobusi ba Jehova.

19. Ke’ng e khethollang batho ba Jehova ho batho ba bang?

¹⁹ Batho ba Jehova ke bona feela ba tsebahalang ka ho tšehetsa bobusi ba Jehova, ’me haesale ba bo tšehetsa. Kahoo e mong le e mong oa rona o lokela ho tsoela pele a tšehetsa bobusi boo.

20. Jehova o ikutloa joang ka boiteko boo u bo etsang ho tšehetsa bobusi ba hae?

²⁰ Kholiseha hore Jehova o ananela boiteko boo u bo etsang ho tšehetsa bobusi ba hae le ho lula u tšepahala leha u thulana le mathata. (Pes. 18:25) Sehlooho se latelang se tla tsoela pele ho bontša hore na ke hobane’ng ha re lokela ho tšehetsa bobusi ba Jehova ka pelo eohle le hore na re ka etsa joalo joang.