MEHLENG ea Bibele, lelapa la habo ngoanana le ne le fuoa mahali haeba malapa ka bobeli a ne a lumela hore ho ka ba le lenyalo. Mahali a ne a ka akarelletsa ntho leha e le efe ea bohlokoa, liphoofolo kapa chelete. Ka linako tse ling, motho o ne a ntša mahali ka hore a sebetse, joalokaha Jakobo a ile a lumela ho sebeletsa ntate oa Ragele lilemo tse supileng e le hore a khone ho mo nyala. (Gen. 29:17, 18, 20) Ke hobane’ng ha ho ne ho ntšoa mahali?

Setsebi se seng sa Bibele e leng Carol Meyers se ile sa re: “Lelapa la habo ngoanana le ne le ka fuoa mahali hobane le ne le tlo lahleheloa ke morali oa lona ea neng a le thusa, kaha mosebetsi o neng o etsoa ke ngoanana o ne o le bohlokoa malapeng a [lemang.]” Mahali ana a ne a ka thusa le hore malapa ana a mabeli a thehe setsoalle. Malapa ana a ne a ka thusana le ha ho hlaha mathata. Ho feta moo, mahali a ne a bontša hore ngoanana o tšepisitsoe ho nyaloa le hore o se a tla hlokomeloa ke monna oa hae eseng ntate oa hae.

Ho ntša mahali ho ne ho sa bolele hore mosali a ka rekisoa kapa a rekoa. Buka ea Ancient Israel​—Its Life and Institutions e re: “Taba ea hore motho o ne a lokela ho fa lelapa la habo ngoanana chelete kapa ntho e itseng, e fana ka maikutlo a hore manyalo a Baiseraele e ne e le khoebo. Empa ho bonahala eka [mahali] a ne a nkoa e le ho leboha lelapa la habo ngoanana eseng ho mo reka.”

Le kajeno linaheng tse ling, batho ba ntse ba ntša mahali joaloka mehleng ea pele. Ha batsoali ba Bakreste ba nahana ka mahali, ba lokela ho etsa hore kahlolo ea bona e molemo e tsejoe ke batho bohle ka hore ba se ke ba batla mahali a mangata. (Bafil. 4:5; 1 Bakor. 10:32, 33) Ha ba etsa joalo, ba tla be ba bontša hore ha se batho “ba ratang chelete” kapa ba meharo. (2 Tim. 3:2) Ho feta moo, haeba batsoali ba Bakreste ba sa batle mahali a mangata, seo se tla thusa mohlankana ea batlang ho nyala hore a se ke a chechisa lenyalo hobane a batla ho ba le chelete e lekaneng ea mahali. Hape morʼabo rona a ke ke a utloa a qobelleha hore a tlohele ho ba pula-maliboho e le hore a batle mosebetsi o tla mo thusa hore a fumane chelete ea ho patala mahali ao a mangata.

Libakeng tse ling, mahali a laoloa ke molao oa naha. Maemong ao, batsoali ba Bakreste ba mamela melao ena. Hobane’ng? Lentsoe la Molimo le re Bakreste ba “ipehe tlasa balaoli ba phahameng” le ho mamela melao e seng khahlanong le melao ea Molimo.​—Bar. 13:1; Lik. 5:29.