1, 2. Jesu o ile a etsa’ng mantsiboeeng a la 14 Nisane, 33 C.E.? (Sheba setšoantšo se qalong.)

KE SHOALANE, ’me khoeli e tolokile Jerusalema. Ke mantsiboea a la 14 Nisane, 33 C.E. Jesu le baapostola ba hae ba ketekile Paseka, e le ho ikhopotsa ho lopolloa ha Baiseraele bokhobeng Egepeta lilemong tse 1 500 tse fetileng. Jesu o ile a theha ketsahalo e ikhethang le baapostola ba hae ba 11 ba tšepahalang, eo e neng e tla ba sehopotso sa lefu la hae le neng le mo tobile hona letsatsing leo. *—Mat. 26:1, 2.

² Jesu o ile a rapela, a fa baapostola ba hae bohobe bo sa lomosoang ’me a re: “Nkang, le je.” A nka le senoelo sa veine, ’me ka mor’a ho rapela hape a re: “Noang ho sona, kaofela ha lōna.” (Mat. 26:26, 27) Ha ho lijo tse ling tseo Jesu a ileng a li fa balateli ba hae ba tšepahalang bosiung boo bo ikhethang, empa o ile a ba bolella lintlha tse ling tsa bohlokoa.

3. Re tlil’o tšohla lipotso life sehloohong see?

³ Kahoo Jesu o ile a theha Sehopotso sa lefu la hae, seo hape  se bitsoang “lijo tsa shoalane tsa Morena.” (1 Bakor. 11:20) Empa ba bang ba ka ’na ba botsa: Ke hobane’ng ha re lokela ho ikhopotsa lefu la Jesu? Bohobe le veine li tšoantšetsa’ng? Re ka itokiselletsa Sehopotso joang? Ke bo-mang ba lokelang ho ja litšoantšetso? Hona Bakreste ba ikutloa joang ka seo Mangolo a se buang ka tšepo ea bona?

4. Lefu la Jesu le re buletse monyetla ofe?

⁴ Kaha re litloholo tsa Adama, re futsitse sebe le lefu. (Bar. 5:12) Ha ho na moetsalibe ea ka rekollang bophelo ba hae kapa ba batho ba bang. (Pes. 49:6-9) Ka lefu la hae, Jesu o ile a lefa thekollo ka ’mele oa hae o phethahetseng le ka ho tšolla mali a hae, e leng eona feela tsela e amohelehang. Jesu o ile a re bulela monyetla oa ho lopolloa sebeng le lefung e le hore re fumane mpho ea bophelo bo sa feleng, ka hore a fane ka thekollo ho Molimo.—Bar. 6:23; 1 Bakor. 15:21, 22.

5. (a) Re tseba joang hore Molimo le Kreste ba rata batho? (b) Ke hobane’ng ha re lokela ho ikhopotsa lefu la Jesu?

⁵ Tokisetso ea thekollo e bontša hore Molimo o rata batho. (Joh. 3:16) Ho iketsa ha Jesu sehlabelo le hona ho bontša hore o oa re rata. Pele Jesu a tla lefatšeng e ne e le “mosebetsi ea hloahloa” oa Molimo, ’me a ‘rata batho’! (Liprov. 8:30, 31) Ho ananela seo Molimo le Mora oa hae ba re etselitseng sona, ho lokela ho re susumelletsa ho ikhopotsa lefu la Jesu, ’me re mamele taelo e reng: “Le ’ne le etse sena ho nkhopola.”—1 Bakor. 11:23-25.

6. Re lokela ho nka bohobe le veine tse sebelisoang ka Sehopotso e le eng?

⁶ Ha Jesu a theha Sehopotso, ha aa ka a fetola bohobe le veine ka mohlolo hore e be nama le mali a hae. Ho e-na le hoo, o ile a re ka bohobe: “Sena se bolela ’mele oa ka.” ’Me a re ka veine: “Sena se bolela ‘mali a selekane’ a ka, a tlang ho tšolloa molemong oa ba bangata.” (Mar. 14:22-24) Kahoo, ho hlakile hore bohobe le veine li lokela ho nkoa e le litšoantšetso.

7. Bohobe bo sebelisoang ka Sehopotso bo emela’ng?

⁷ Ketsahalong eo ea bohlokoa ea 33 C.E., Jesu o ile a sebelisa bohobe bo sa lomosoang bo ileng ba sala lijong tsa Paseka. (Ex. 12:8) Ka Mangolong, ka linako tse ling tomoso e emela tšenyeho kapa sebe. (Mat. 16:6, 11, 12; Luka 12:1) Kahoo, ho ne ho loketse hore Jesu a sebelise bohobe bo sa lomosoang, kaha bo ne bo emela ’mele oa hae o se nang sebe. (Baheb. 7:26) Ke bona bohobe bo sebelisoang ka Sehopotso.

8. Veine e sebelisoang ka Sehopotso e emela’ng?

⁸ Veine eo Jesu a ileng a e sebelisa ka la 14 Nisane, 33 C.E., e ne e emela mali a hae, ’me ho joalo le ka e sebelisoang Sehopotsong kajeno. Mali a hae a ile a tšolloa sebakeng se ka thōko ho Jerusalema se bitsoang Golgotha, e le hore re ‘tšoareloe libe.’ (Mat. 26:28; 27:33) Kaha bohobe le veine tsa Sehopotso li tšoantšetsa sehlabelo sa bohlokoa seo Jesu a se entseng molemong oa batho ba mamelang ’me re ananela tokisetso eo e lerato, re lokela ho itokiselletsa ho tšoara Lijo Tsa Shoalane Tsa Morena selemo le selemo.

9. (a) Ke hobane’ng ha re lokela ho tsamaisana le ’malo oa Bibele oa Sehopotso? (b) U ikutloa joang ka thekollo?

⁹ Haeba re tsamaisana le ’malo oa Bibele oa Sehopotso o hlahang bukaneng ea Ho Hlahlobisisa Mangolo Kamehla, re ka  thuisa ka seo Jesu a se entseng nakoana pele a bolaoa. Seo se tla re thusa hore re lokise lipelo tsa rōna bakeng sa Lijo Tsa Shoalane Tsa Morena. * Morali’abo rōna e mong o ile a re: “Re labalabela ho ea Sehopotsong. Selemo le selemo e e-ba ketsahalo e ikhethang haholoanyane. Ke hopola ke le ’moshareng . . . ke shebile ntate oa ka ea ratehang ’me ka ananela thekollo ka ho teba. . . . Ke ’nete hore ke ne ke tseba seo mangolo a se buang ka taba ena, ebile ke khona ho a hlalosa! Empa ha ke utloa bohloko bo hlabang ba lefu, ke ile ka ananela ho tsoa pelong seo thekollo eo e babatsehang e tlang ho re etsetsa sona.” Ha re ntse re itokiselletsa Sehopotso, re lokela ho nahana kamoo sehlabelo sa Jesu se re lokollang kateng bokhobeng ba sebe le lefu.

10. Ke’ng e ’ngoe hape eo re ka e etsang ha re itokiselletsa Sehopotso?

¹⁰ Ho lokisetsa Sehopotso ho ka ’na ha akarelletsa ho eketsa tšebeletso ea rōna ka tsela e itseng, mohlomong ka hore re nke bopula-maliboho bo thusang nakong ea Sehopotso. Ha re ntse re memela liithuti tsa Bibele le batho ba bang Lijong Tsa Shoalane Tsa Morena, re tla thabela ho ba bolella ka Molimo, Mora oa hae le ka litlhohonolofatso tse tla fumanoa ke ba khahlisang Jehova le ho mo rorisa.—Pes. 148:12, 13.

11. Bakorinthe ba bang ba ile ba ja litšoantšetso tsa Sehopotso ba sa tšoanela joang?

¹¹ Ha u ntse u itokisetsa ho ba teng Lijong Tsa Shoalane Tsa Morena, nahana ka seo moapostola Pauluse a ileng a se ngolla Bakreste ba Korinthe. (Bala 1 Bakorinthe 11:27-34.) Pauluse o ile a re motho leha e le ofe ea jang bohobe le ho noa veine a sa tšoanela, o “molato mabapi le ’mele le mali a Morena” Jesu Kreste. Kahoo, motlotsuoa o lokela ho ‘inka a amoheleha ka mor’a ho itlhahlobisisa,’ ebe ke hona a ka jang litšoantšetso. Ho seng joalo, o tla be a “ja le ho noa kahlolo khahlanong le eena.” Ka lebaka la boitšoaro ba bona bo fosahetseng, Bakorinthe ba bang ba ne ba ‘fokola ebile e le likulane, ’me ba bangata ba robetse lefung la moea.’ Ho ka etsahala hore ba bang ba ne ba ja le ho noa haholo pele ba ea Sehopotsong kapa ha se ntse se tsoela pele, ’me seo se etsa hore ba se ke ba falimeha kelellong le  moeeng. Ho ja litšoantšetso ba le boemong bo sa amoheleheng joalo ho ile ha etsa hore Molimo a se ke a ba amohela.

12. (a) Pauluse o ile a bapisa Sehopotso le eng hona o ile a fana ka temoso efe? (b) Haeba motho ea jang a entse sebe se tebileng, o lokela ho etsa’ng?

¹² Pauluse o ile a bapisa Sehopotso le ho ja lijo le batho ba bang, ’me a lemosa: “Le ke ke la noa senoelo sa Jehova le senoelo sa bademona; le ke ke la ja ‘tafoleng ea Jehova’ le tafoleng ea bademona.” (1 Bakor. 10:16-21) Ha motho ea jang litšoantšetso Lijong Tsa Shoalane Tsa Morena a entse sebe se tebileng, o lokela ho batla thuso ea moea. (Bala Jakobo 5:14-16.) Haeba motlotsuoa eo a bontša “litholoana tse tšoanelang pako,” joale ha a bontše ho nyatsa sehlabelo sa Jesu haeba a ja litšoantšetso tsa Sehopotso.—Luka 3:8.

13. Ke hobane’ng ha re lokela ho rapela ka tšepo eo Molimo a re fileng eona?

¹³ Ha re ntse re itokisetsa Sehopotso, re tla rua molemo haeba re nahanisisa ka tšepo eo Molimo a re fileng eona, ebile re rapela ka taba eo. Ha ho mohlanka ea inehetseng oa Jehova le molateli ea tšepahalang oa Mor’a hae ea batlang ho hlompholla sehlabelo sa Jesu ka hore a je litšoantšetso tsa Sehopotso, haeba a se na bopaki bo hlakileng ba hore ke Mokreste ea tlotsitsoeng. Kahoo, motho a ka tseba joang haeba a tšoaneleha ho ja litšoantšetso?

14. Selekane se secha se amana joang le ho ja litšoantšetso ka Sehopotso?

¹⁴ Litšoantšetso tsa Sehopotso li lokela ho jeoa ke batho ba kholisehileng ka ho feletseng hore ke litho tsa selekane se secha. Ha Jesu a bua ka veine o ile a re: “Senoelo sena se bolela selekane se secha motheong oa mali a ka.” (1 Bakor. 11:25) Molimo o ile a bolela esale pele ka moprofeta Jeremia hore o tla hlaba selekane se secha se fapaneng le selekane sa Molao seo a neng a se entse le Baiseraele. (Bala Jeremia 31:31-34.) Molimo o hlabile selekane se secha le Baiseraele ba moea. (Bagal. 6:15, 16) Selekane sena se tiisitsoe ka sehlabelo sa Kreste ’me sa qala ho sebetsa ha ho tšolloa mali a hae. (Luka 22:20) Jesu ke Mokena-lipakeng oa selekane se secha, ’me batlotsuoa ba tšepahalang bao e leng karolo ea sona ba putsoa ka bophelo ba leholimo.—Baheb. 8:6; 9:15.

15. Ke bo-mang ba selekaneng sa ’Muso, hona ba tla fuoa moputso ofe haeba ba tšepahala?

¹⁵ Ba jang litšoantšetso tsa Sehopotso baa tseba hore ba selekaneng sa ’Muso. (Bala Luka 12:32.) Balateli ba Jesu ba tlotsitsoeng ba ileng ba mo khomarela ka botšepehi, ’me le bona ba mamella liteko, ba tla busa le eena leholimong. (Bafil. 3:10) Kaha batlotsuoa bana ba tšepahalang ba selekaneng sa ’Muso, ba tla busa le Kreste e le marena ka ho sa feleng leholimong. (Tšen. 22:5) Ke bona ba lokelang ho ja litšoantšetso Lijong Tsa Shoalane Tsa Morena.

16. Ka bokhutšoanyane, hlalosa se boleloang ke Baroma 8:15-17.

¹⁶ Ke feela bao moea o ba pakelang hore ke bana ba Molimo ba lokelang ho ja litšoantšetso tsa Sehopotso. (Bala Baroma 8:15-17.) Ha Pauluse a hlalosa kamano ea bona le Molimo, o ile a sebelisa lentsoe la Searame e leng “Abba,” e bolelang “Ntate!” Ke tsela eo ngoana a ka ’nang a bitsa ntate oa hae ka eona, e bontšang hore o na le kamano e haufi le eena ebile o oa mo hlompha. Bana ba Molimo ke ba ‘nketsoeng lapeng e le bara’ le ba tlotsitsoeng ka moea o halalelang. Moea o oa ba pakela, o ba tiisetsa hore ke  bara ba Jehova ba tlotsitsoeng. Hase taba feela ea hore ha ba sa batla ho phela lefatšeng. Ba kholisehile hore e tla ba majalefa-’moho le Jesu ’Musong oa leholimo haeba ba tšepahala ho isa lefung. Kajeno, ho na le masala a seng makae a balateli ba Kreste ba 144 000, bao ‘ho tlotsoa ha bona ho tsoang ho mohalaleli’ Jehova. (1 Joh. 2:20; Tšen. 14:1) Kaha ba tlotsitsoe ka moea, ba re, “Abba, Ntate!” Ruri ba hlohonolofalitsoe ka ho ba le kamano e joalo le Molimo!

17. Batlotsuoa ba na le tšepo efe, hona ba ikutloa joang ka eona?

¹⁷ Haeba u Mokreste ea tlotsitsoeng, ’me u na le tšepo ea ho phela leholimong, u lokela ho kenyelletsa taba eo lithapelong tsa hao. Ha Bibele e bua ka hore Monyali ea leholimong Jesu Kreste o tšepisitse moroetsana oa hae lenyalo, u lebisa mantsoe ao ho uena, ’me u labalabela ho ba karolo ea “monyaluoa” oa Kreste. (2 Bakor. 11:2; Joh. 3:27-29; Tšen. 21:2, 9-14) Ha Molimo a hlalosa ka Lentsoeng la hae kamoo a ratang bana ba hae ba moea kateng, u re, “O bua ka ’na.” Hape, ha Jehova a fa bara ba hae ba tlotsitsoeng tataiso ka Lentsoeng la hae, moea o halalelang o u susumelletsa ho mamela ’me u re ka pelong, “Tataiso eo e sebetsa ho ’na.” Kahoo, moea oa Molimo o oa u pakela hore u na le tšepo ea ho phela leholimong.

18. “Linku tse ling” li na le tšepo efe, hona u ikutloa joang ka eona?

¹⁸ Ka lehlakoreng le leng, haeba u e mong oa “bongata bo boholo” ba “linku tse ling,” Molimo o tšepisa hore u tla phela lefatšeng. (Tšen. 7:9; Joh. 10:16) U batla ho phela ka ho sa feleng Paradeiseng, ’me u ua thaba ha u thuisa ka tsela eo Bibele e reng bophelo bo tla ba ka eona lefatšeng nakong e tlang. U labalabela ho phela ka khotso u e-na le beng ka uena le batho ba bang ba lokileng. U lebeletse ka tjantjello ha batho ba tla be ba phela ho se na tlala, bofutsana, mahlomola, ho kula le lefu. (Pes. 37:10, 11, 29; 67:6; 72:7, 16; Esa. 33:24) U lakatsa ho amohela ba tsositsoeng bafung le e-na le tebello ea ho phela ka ho sa feleng lefatšeng. (Joh. 5:28, 29) Ruri u ua leboha hore ebe Jehova o u file tšepo ea ho phela lefatšeng! Le hoja u sa je litšoantšetso, u ba teng Sehopotsong ho bontša hore u ananela sehlabelo sa thekollo sa Jesu Kreste.

19, 20. (a) U lokela ho etsa’ng e le hore seo Molimo a u tšepisang sona se phethahale? (b) Ke hobane’ng ha u lokela ho ba teng Lijong Tsa Shoalane Tsa Morena?

¹⁹ Ebang u na le tšepo ea ho phela lefatšeng kapa leholimong, seo se ka phethahala haeba u bontša tumelo ho Jehova Molimo, ho Jesu Kreste le sehlabelong sa hae. Ha u ba teng Sehopotsong, u tla ba le monyetla oa ho nahana ka tšepo eo u nang le eona le ka bohlokoa ba lefu la Jesu. Kahoo, ikemisetse ho ba e mong oa ba limilione ba tla ba teng Lijong Tsa Shoalane Tsa Morena, tse tla tšoareloa Liholong Tsa ’Muso le libakeng tse ling lefatšeng ka bophara, mantsiboeeng a Labohlano la la 3 April, 2015.

²⁰ Ho ba teng Sehopotsong ho ka etsa hore u ananele sehlabelo sa thekollo sa Jesu ka ho teba. Ho mamela puo ka hloko ho ka u susumelletsa hore u bontše baahelani ba hao lerato ka ho ba bolella seo u ithutileng sona ka lerato leo Jehova a re ratang ka lona le seo a se rerileng ka batho. (Mat. 22:34-40) Etsa sohle se matleng a hao ho ba teng Lijong Tsa Shoalane Tsa Morena.